ପେରିତ 13
13
ଆବର୍ନବାଲା ମାରି ଆସାଉଲ୍ଲା ମାପ୍ରୁନା କାମ୍ ଡିନ୍ଡେମ୍ପୁଲେଇ ସିରେଲ'ସେକ୍ ବେନ୍ଟାଇବାର୍ଡେନ୍
1ଆନ୍ତିୟକିଆ ମୁନା'ଉଂଗମ୍ବକ୍ ଆଜିସୁଲା ବିସ୍ବାସ୍ ଡେମ'ସେକ୍ ଡୁକୁନୁଂ ରେମଲେନ୍ ବିତ୍ରେ ଏନ୍ତୁକ୍ର ବାବବାଦିଲେ ମାରି ଏନ୍ତୁକ୍ର ଆରେମଲେ ଅମାକ୍ରେମ୍ ଡୁକୁ । ମା'ଏ ଜାଜା ଡ'ନା: ବର୍ନବାଲା, ନିଗର ଡ'ସେକ୍ କିୟାଲି ଇମିକୁନୁଂ ସିମିୟନ୍ଲା, କୁରିନିୟ ଉଂଗମ୍ନା ଲୁକିୟଲା, ମାରି ଏରଦ୍ଲାବୁରଂ ମାଇନା ଡିଂଅଁବକ୍ ବ'ରଲ'କୁନୁଂ ମନଏମ୍ଲା, ମାରି ସାଉଲ୍ଲା ଡି'ତା ଡୁକୁଗା' । 2ମା'ଏ ଗୁଲାଇର ଆପ୍ରବୁଲା ସୁନ୍ଡ୍ରକ୍ସେକ୍ ଆଂଡାକ୍ସ ପାର୍ତନା ଡେମ'ସେକ୍ ଡୁକୁନୁଂବେଲା ପବିତ୍ର ଆତ୍ମା ସୁନ', “ମା କାମ୍ ଡିନ୍ଡେମ୍ପୁଲେଇ ନିଂ ଆବର୍ନବାଲା ମାରି ଆସାଉଲ୍ଲା ସିରେଲ'ତିଂ ଗୁତୁନ୍ କାମ୍ ଡିନ୍ଡେମ୍ପୁଲେଇ ଆମାଇପା ସିରେଲ'ସେକ୍ ପାଲ୍ ବୁଂ” ଡ'ସେକ୍ ସୁନ' । 3ସା' ମା'ଏ ଡୁ'ତୁନ୍ଉ ଆଂଡାକ୍ସ ପାର୍ତନା ଡେମ'ସେକ୍ ମାପ୍ରୁ ଆମାଇପା ସାନ୍ଡୁଂଏଇ' ଡ'ସେକ୍ ମା'ଏ ଗୁଲାଇର ମାଇପାନା ବ'ବ୍ବକ୍ ତିତି ବୁଂଅଁ' ପାର୍ତନା ଡେମ'ସେକ୍ ଆମାଇପା ବେନ୍ଟାୟ' ବେଡ' ।
ବର୍ନବାଲା ମାରି ସାଉଲ୍ଲା କୁପ୍ର ଦିପ୍ବକ୍ ଉଇସେକ୍ ଡେମ'କୁନୁଂ କାମ୍
4ପବିତ୍ର ଆତ୍ମା ଆବର୍ନବାଲା ମାରି ଆସାଉଲ୍ଲା ବେନ୍ଟାୟ'ସା' ମାଇପା ସେଲୁକିଆ ଡ'ସେକ୍ ମୁଇ ଉଂଗମ୍ବକ୍ ଉଇଗା' । ଆତାକୁରୁଂ ମାଇପା ମୁନା' ଡଂଗାବକ୍ ଲେଇ'ସେକ୍ କୁପ୍ର ଦିପବକ୍ ଉଇଗା' । 5ମାଇପା ସାଲାମି ମୁନା'ଉଂଗମ୍ବକ୍ ସାକ୍ସେକ୍ ଜିଉଦିରେମଲେନା ପାର୍ତନା ଡିଂଅଁବକ୍ ଉଇସେକ୍ ମାପ୍ରୁନା ତୁମ' ଆଗୁଲାଇର ସୁନ' । ଜଅନ୍ଲାସା ଆମାଇପା ସାନ୍ଡୁଂପୁଲେଇ ମାଇପାବୁରଂ ଡୁକୁଗା' ।
6ମା'ଏ ଗୁତୁନ୍ କୁପ୍ର ଦିପନା ଗୁଲାଇ କୁନ୍ଡା ବୁଲ୍ଲ'ସେକ୍ ପାପସ୍ ଡ'ସେକ୍ ମୁଇ ମୁନା'ଉଂଗମ୍ବକ୍ ଡେଲ' । ସା' ଆତା ବର୍ଜିସୁ ଡ'ସେକ୍ ମୁଇନ୍ଡା ଏରେମ୍ବକ୍ ଜୁଲ' । ମାଇ ମୁଇନ୍ଡା ଜିଉଦିରେମ ଡୁକୁ । ନିଂ ମୁଇନ୍ଡା ବାବବାଦି ଡ' ଆଗୁଲାଇର ମାଇ ସରଉ ସୁନ'ସେକ୍ ନାଡାୟ'କୁ । 7ମାରି ମାଇ ଗୁତୁନ୍ ଦିପନା ମୁନା'ରେମ୍ ସେର୍ଗିୟ ପାଉଲଲା ଡ'କୁନୁଂ ମୁଇନ୍ଡାବୁରଂ ଡୁକୁ । ଗୁତୁନ୍ ସେର୍ଗିୟ ପାଉଲଲା ଅବୁଦି ବୁଦିଗିୟାନ୍ ଡୁକୁନୁଂ ରେମ । ଆମାଇ ମାପ୍ରୁନା ତୁମ' ଅଂପୁଲେଇ ମୁନ୍ଡେଂଗା'ସା' ମାଇ ଆବର୍ନବାଲା ମାରି ଆସାଉଲ୍ଲା ମାଇନ୍ବକ୍ ୱାୟ' ଇନ୍ଡ୍ରିଂପୁଲେଇ ବେନ୍ଟାୟ' । 8ମାତର୍ ଗୁତୁନ୍ ଅଲିମାଲା, ଡ'ନା ଗିରିକ୍ ସାମ୍ବକ୍ ଗୁତୁନ୍ ଇମିନା ଅର୍ତ ଏରେମ୍ ଡ'ସେକ୍ ଡୁତା, ମାଇ ଆବର୍ନବାଲା ମାରି ଆସାଉଲ୍ଲା ମନା ଡେମ' । ମାରି ଆଜିସୁଲା ବିସ୍ବାସ୍ ଆଡେମ' ଡ'ସେକ୍ସା ମାଇ ଆତୁନ୍ ମୁନା'ରେମ୍ ସୁନ' । 9ସା' ପାଉଲ ଡ'ସେକ୍ ଅ'ଇମିଲ'କୁନୁଂ ଆସାଉଲ୍ଲା ପବିତ୍ର ଆତ୍ମା ସାନ୍ଡୁଂଅଁସା' ଆତୁନ୍ ଅଲିମାନା ସାର୍ମ'ଉ ଜୁଲ'ସେକ୍ ସୁନ', 10“ଅ ସଇତାନ୍ନା ଉଁ'ଉଁ, ଇମ୍ବ'ନା ବଲ୍ ଡୁତା ଗୁତୁନ୍ବକ୍ ନ ବିଡ୍କାୟ'ତୁନ । ନ ଅବୁଦି ନାଡାଇବାର୍ବାଇ' ମାରି ଗୁଲାଇ ଅଲିରାକ୍ବାଇ' ଡିନ୍ଡେମ୍ ରେମ । ନ ପ୍ରବୁନା ସତ୍ବାଇ' ଡୁକୁନୁଂ ଗୁଲାଇ ବିସୟବକ୍ ଅଲିରାକ୍ବାଇ' ଡିନ୍ଡେମ୍ନା ଇନ୍ଡ'ୟା ବନ୍ଦ୍ ଡେମ୍ତୁନ? 11ଆ'ନା ଜୁ, ଆ'ନାଉ ପ୍ରବୁ ଆନ ଡନ୍ଡ୍ ବିବେ'ଡେନ୍ । ସା' ନନା ମ' କାନାକ୍ଉଇତା ମାରି ନ ଆ'ଇ ଗନ୍ଟାସୁଗ ଆସିଂଇଁସା ବାସ୍ ଜୁଜୁ ଆଗଂତୁନ” ଡ'ସେକ୍ ସୁନ' ।
ସା' ଆଇ'କୁ ମାଇନା ଇମ୍ବାରୁ ମ' ସେମ୍ପୁତାପ୍ ସାକ୍ନା ମି ଞୁର୍ଉଇତା ଡୁ'ତୁନା ଡେଂଗା'ସା' ଗୁଲାଇ କୁନ୍ଡା ଞୁର୍କୁନୁଂସୁଗ ଆମାଇ ତୁନାକୁଗା' । ସା' ଆନିଂ ଜାଏସା ତୁଂତୁଂଅଁ'ସେକ୍ ରିଂଅଁ' ଉୟା ଡ'ସେକ୍ ମାଇ ତଂରିତଂକେ ଆରେମଲେ ତୁର'କୁ । 12ଡି'କେନ୍ ଡେଂକୁନୁଂ ଗୁଲାଇ ଜୁଲ'ସେକ୍ ଗୁତୁନ୍ ଦେସ୍ନା ମୁନା'ରେମ୍ ଆଜିସୁ ବିସ୍ବାସ୍ ଡେମ' । ମାରି ବର୍ନବାଲା ମାରି ସାଉଲ୍ଲା ପ୍ରବୁନା ବିସୟ ଅମାଗ'କୁନୁଂ ଗୁଲାଇ ଅଂଅଁ'ସେକ୍ ମାଇ ଅବୁଦି କାବାକାବା ଡେଂଉଇଗା' ।
ପାଉଲଲା ମାରି ବର୍ନବାଲା ପିସିଦିଆ ଜିଲାନା ଆନ୍ତିୟକିଆ ମୁନା'ଉଂଗମ୍ବକ୍ ଉଇଡେନ୍
13ତିର୍ଗି' ପାଉଲଲା ମାରି ମାଇବୁରଂ ଡୁକୁନୁଂ ରେମଲେ ଗୁତୁନ୍ ପାପସ୍ ଉଂଗମ୍କୁରୁଂ ମୁନା' ଡଂଗାବକ୍ ଲେଇ'ସେକ୍ ପଂପୁଲିଆ ଦେସ୍ନା ପର୍ଗି ଡ'ସେକ୍ ମୁଇ ଉଂଗମ୍ବକ୍ ସା'ଗା' । ଆତା ଜଅନ୍ଲା ଆମା'ଏ ଅନ୍ତୁର'ସେକ୍ ଜିରୁସାଲମ୍ ମୁନା'ଉଂଗମ୍ବକ୍ ଆନ୍ଡେଇଁଗା' । 14ମାତର୍ ସାଉଲ୍ଲା ମାରି ବର୍ନବାଲା ଆତା ପର୍ଗିକୁରୁଂ ତୁର୍ସେକ୍ ପିସିଦିଆ ଜିଲାନା ଆନ୍ତିୟକିଆ ମୁନା'ଉଂଗମ୍ବକ୍ ସା'ଗା' । ବିସ୍ରାମ୍ଦିନ୍ ମାଇପା ଜିଉଦିରେମଲେନା ପାର୍ତନା ଡିଂଅଁବକ୍ ଉଇସେକ୍ ଲେଇ'ଗା' । 15ସା' ମୁଇନ୍ଡା ଆତା ମାପ୍ରୁନା ଉଲାକ୍ବକ୍ ମସାଲା ଲେକ୍ଲ'କୁନୁଂ ନିୟମ୍ ମାରି ବାବବାଦିଲେ ଲେକ୍ଲ'କୁନୁଂ ଡମ୍ପଡ୍ଗା'ସା' ଗୁତୁନ୍ ପାର୍ତନା ଡିଂଅଁନା ମୁନା' ରେମ ଆମାଇପା “ଅ ମେ' ପା, ମାମା ସୁନ୍ତୁନାଂ ଡ'ନା ପା ସୁନ'ସେକ୍ ଆରେମଲେ ଇ'କି ଅ'ସୁଗୁର୍” ଡ'ସେକ୍ କବର୍ ବେନ୍ଟାୟ' ।
16ସା' ପାଉଲଲା ଆତା ତଂସେକ୍ ଆଗୁଲାଇର ଜୁକ୍ଲା ଡ' ତିତି ଅସୁୟ'ସେକ୍ ସୁଁସୁ ମୁଲାୟ' । ମାଇ ସୁନ': “ଅ ଇସ୍ରାଏଲ୍ ରେମଲେ ମାରି ଆମାପ୍ରୁ ସୁନ୍ଡ୍ରକ୍ସେକ୍ ଡୁକୁନୁଂ ପାଲ୍ ଜାତିନ୍ ରେମଲେ, ପେ ଗୁଲାଇର ନିଂନା ତୁମ' ବଲ୍ ଅଂ । 17ଇସ୍ରାଏଲ୍ ରେମଲେନା ମାପ୍ରୁ ଆନେ'ନ୍ ୟା'ତୁତାଲେ ସିରେଲ' ମାରି ମା'ଏ ମିସର୍ ଦେସ୍ବକ୍ ଡୁକୁନୁଂବେଲା ଆମା'ଏ ଅବୁଦି ଅବୁଦି ଅ'ଲାଇଁୟ' । ତିର୍ଗି' ମାଇନା ବପୁବୁରଂ ଗୁତୁନ୍ ଦେସ୍କୁରୁଂ ମାଇ ଆମା'ଏ ଅ'ତୁର' ରିଂଗା' । 18ମାରି ସାଲିସ୍ ବରସ୍ ମା'ଏ ଟାଂରାବାଟା ପାଦାବକ୍ ଡୁକୁନୁଂବେଲା ମା'ଏ ଆମାଇ ଅବୁଦି ପାଲି ମମାନ୍ବାର୍ ଡୁକୁ ଡ'ନାସା ମାଇ ଆମା'ଏ ବଲ୍ ଜୁଲ'କୁଗା' । 19ମାରି କିନାନ୍ ଦେସ୍ବକ୍ ଡୁକୁନୁଂ ସାତ୍ଟା ଜାତିନ୍ ରେମଲେବକ୍ ମାପ୍ରୁ ନାସାୟ'ସେକ୍ ମା'ଏନ୍ ଦେସ୍ ଆଇସ୍ରାଏଲ୍ରେମଲେ ବେଡ' । 20କେନ୍ ଗୁଲାଇ ଡିନ୍ଡେମ୍ପୁଲେଇ ସାର୍ସ ପସାସ୍ ବରସ୍ସୁଗ ଡେଂଗା' ।
ତିର୍ଗି' ସାମୁଏଲ୍ ଡ'କୁନୁଂ ବାବବାଦି ଡୁକୁନୁଂପନ୍ତେ'କା ଆମା'ଏ ବିସାର୍ନା ଡିନ୍ଡେମ୍ପୁଲେଇ ମାପ୍ରୁ ଆରେମଲେ ସିରେଲ' ବେଡ'କୁ । 21ତିର୍ଗି' ମା'ଏ ଆନେଇ ମୁଇ ରାଜା ବେ' ଡ'ସେକ୍ ଆମାପ୍ରୁ ଲୁଡ' । ସା' ମାପ୍ରୁ ମା'ଏପୁଲେଇ ଆକିସନା ଉଁ'ଉଁ ଆସାଉଲ୍ଲା ରାଜା ଅ'ଏଲ' ବେଡ' । ମାଇ ବିନ୍ୟାମିନ୍ କୁଲ୍ନା ମୁଇନ୍ଡା ରେମ । ମାଇ ଆଇସ୍ରାଏଲ୍ରେମଲେ ସାଲିସ୍ ବରସ୍ ସାସନ୍ ଡେମ'କୁ । 22ମାରି ମାପ୍ରୁ ଆସାଉଲ୍ଲା ଅ'ତୁର'ସେକ୍ ଆଦାଉଦ୍ଲା ମା'ଏପୁଲେଇ ରାଜା ଅ'ଏଲ' । ମାପ୍ରୁ ଆଦାଉଦ୍ଲା ଜୁଲ'ସେକ୍ ‘ଜିସିନା ଉଁ'ଉଁ ଦାଉଦ୍ଲା ଡ'ନା ମାଇ ଆନିଂ ସାର୍ଦା ଅ'ଡେମ୍ରେମ୍ ଡ'ସେକ୍ ନିଂ ଜୁଲ'ତିଂ । ନିଂ ମୁନ୍ଡେଂକୁନୁଂ ଗୁଲାଇ ମାଇ ଡେମ୍ତ’ ଡ'ସେକ୍ ସାକି ସୁନ' ।
23ମାପ୍ରୁ ଇନ୍ତେ ତିତିବାଡ' ସୁନ'ବୁଂଅଁ'କୁନୁଂସୁଗଉ ଆଇସ୍ରାଏଲ୍ରେମଲେ ପାପ୍କୁରୁଂ ରକ୍ୟା ଡିନ୍ଡେମା ଡ'ସେକ୍ ଦାଉଦ୍ନା ପୁନ୍ଜିକୁରୁଂ ଆଜିସୁଲା ଇସ୍ରାଏଲ୍ ରେମଲେନ୍ବକ୍ ବେନ୍ଟାୟ' । 24#ମାର୍କ 1:4; ଲୁକ 3:3ସା' ଜିସୁଲା ସୁସାପ୍ ସିଁସେଇଁଉ ଜଅନ୍ଲା ଆଗୁଲାଇ ଇସ୍ରାଏଲ୍ ରେମଲେ ସୁନ' ‘ପେ ପାପ୍କାମ୍ ଡେମ'କୁନୁଂ ଗୁଲାଇ ଅନ୍ତୁର'ସେକ୍ ମାପ୍ରୁନ୍ବକ୍ ଆନ୍ଡେଇଁୟା । ଡୁ'ତୁନ୍ ଡେମ'ନା ନିଂ ଆପେ ବାପ୍ତିସ୍ମା ବେ'ତିଂ’ ଡ'ସେକ୍ ସୁନ' । 25#ଜଅନ୍ 1:20; ମାତିଉ 3:11; ମାର୍କ 1:7; ଲୁକ 3:16; ଜଅନ୍ 1:27ମାପ୍ରୁ ଆଜଅନ୍ଲା ଡେମ୍ ଡ'ସେକ୍ ବେଡ'କୁନୁଂ କାମ୍ ଅ'ଡମ୍ବେଲା ଜଅନ୍ଲା ଆରେମଲେ ସୁନ' ‘ଆନିଂ ଜା ଡ'ସେକ୍ ପେ ଏତ୍ଗୁତୁପେ? ମାପ୍ରୁ ବେନ୍ଟାଇତିଂ ଡ'ସେକ୍ ସୁନ'କୁନୁଂ ରେମ ମାଇ ଡ'ସେକ୍ ପେ ଆନିଂ ଏତ୍ଗୁତୁପେ ଡ'ନା ଗୁତୁନ୍ ରେମ ନିଂ ଆରାକ୍ । ମାତର୍ ଆନିଂ ତେଂଗି' ମୁଇନ୍ଡା ସୁସାପ୍ଡେନ୍ତା । ମାଇ ଅବୁଦି ଦରମ୍ରେମ୍ସା' ନିଂ ମାଇନା ମୁଇନ୍ଡା ଗତିରେମ୍ସୁଗ ଅ'ଲାଂସେ'ଗା ମାଇନା ପନ୍ଡଇଁନା ସୁତାସା ତକ୍ତକ୍ ଆଗଂତିଂ’ ଡ'ସେକ୍ ସୁନ' ।
26ଅ ଅବ୍ରାଆମ୍ନା ଉଁ'ଉଁନେ ଡେଂକୁନୁଂ ନିଂନା ବୁୟାଂଏଁ ମାରି ଆମାପ୍ରୁ ସୁନ୍ଡ୍ରକ୍ସେକ୍ ଡୁକୁନୁଂ ପାଲ୍ପାଲ୍ ଜାତିନ୍ ରେମଲେ, ପେ ଗୁଲାଇର ନିଂନା ତୁମ' ଅଂ । ମାପ୍ରୁ ଆରେମଲେ ମି ରକ୍ୟା ଡେମ୍ତ ଡ'ସେକ୍ ସୁନ'କୁନୁଂ କେନ୍ ବଲ୍କବର୍ ନେଇ'ପୁଲେଇଉ ବେନ୍ଟାୟ'ତା । 27ଜିରୁସାଲମ୍ ମୁନା'ଉଂଗମ୍ରେମ୍ ମାରି ମା'ଏନ୍ ମୁନା'ରେମଲେ ଗୁଲାଇର ମାପ୍ରୁ ବେନ୍ଟାୟ'କୁନୁଂ ଆଜିସୁଲା ଆସମ'ତ, ମାରି ଇସାଉ ବିସ୍ରାମ୍ଦିନ୍ବକ୍ ବାବବାଦିଲେ ଉଲାକ୍ବକ୍ ଲେକ୍ଲ'କୁନୁଂ ମା'ଏ ପଡ୍କୁଗା' ଡ'ନାସା ମାଇନା ବିସୟ ମା ଲେକ୍ଲ'ତା ଡ'ସେକ୍ ମା'ଏ ଆମାକ୍ତ । ମାତର୍ ମାପ୍ରୁନା ଉଲାକ୍ବକ୍ ରେମଲେ ମି ଆଜିସୁଲା ଡେମ୍ତ ଡ'ସେକ୍ ଲେକ୍ଲ'କୁନୁଂସୁଗଉ ମା'ଏ ଆମାଇ ଅଗୁଇ' ଡ'ସେକ୍ ଡନ୍ଡ୍ ବେଡ' । 28#ମାତିଉ 27:22,23; ମାର୍କ 15:13,14; ଲୁକ 23:21–23; ଜଅନ୍ 19:15ଆମାଇ ଅଗୁଇ'ପୁଲେଇ ମାଇନ୍ବକ୍ ମାଏସା ଅଲିରାକ୍ବାଇ' ଆବାମ୍ତା ଡ'ନାସା' ଆମାଇ ଅଗୁଇ' ଡ'ସେକ୍ ରେମଲେ ଆପିଲାତଲା ସୁନ' । 29#ମାତିଉ 27:57–61; ମାର୍କ 15:42–47; ଲୁକ 23:50–56; ଜଅନ୍ 19:38–42ରେମଲେ ଆଜିସୁଲା ମି ଅଗୁଇ'ତ ଡ'ସେକ୍ ଇନ୍ତେ ମାପ୍ରୁନା ଉଲାକ୍ବକ୍ ବାବବାଦିଲେ ଲେକ୍ଲ'ବୁଂଅଁ'କୁଗା' ଡୁ'ତୁନ୍ ସାମାନ୍ ମା'ଏ ଡେମ' । ତିର୍ଗି' ଏନ୍ତୁକ୍ର ଆମାଇନା ମଟ୍ ଗୁତୁନ୍ କୁର୍ସକୁରୁଂ ଆଲୁଂ ଅ'ଜର'ସେକ୍ ମୁଇ ଲାଗ୍ଲାଗ୍ବକ୍ ଅଡିରିଗ' ବୁଂଅଁ' । 30ମାତର୍ ମାପ୍ରୁ ଆମାଇ ଗୁଇ'କୁନୁଂକୁରୁଂ ମାରି ବ'ରଲ' । 31#ପେରିତ 1:3ତିର୍ଗି' ଗାଲିଲି ଜିଲାକୁରୁଂ ଜିରୁସାଲମ୍ ମୁନା'ଉଂଗମ୍ବକ୍ ମାଇବୁରଂ ଉଇଡେଂକୁନୁଂ ରେମଲେବକ୍ ମାଇ ଅ'ତୁନାଗା' । ସା' ଜାଜା ଆମାଇ ଜୁଲ' ଗୁତୁନୁଂଏଁ ଆ'ନା ନେଇ ଆଜିସୁଲା ଜୁଲ'ନେଇ ଡ'ସେକ୍ ଆଗୁଲାଇ ଜିଉଦିରେମଲେ ସାକି ସୁଁସୁ ଡେନ୍ତା ।
32ଆପେ ନାଂ କେନ୍ ବାନିକବର୍ ସୁଁସୁ ଡେନ୍ତୁନାଂ, ଗୁତୁନ୍ ମା ଡ'ନା: ଆନେଇ'ନା ୟା'ତୁତାଲେ ଅଇନ୍ତେକନ୍ଡେ'କା ତିତି ବାଡ'ସେକ୍ ମାପ୍ରୁ ସୁନ'କୁନୁଂ 33ଆ'ନା ଆଜିସୁଲା ଗୁଇ'କୁନୁଂକୁରୁଂ ମାଇ ବ'ରଲ'ତାସା' ମାଏନ୍ ଇଗ୍ଲେଇଏଁ ଏକୁନୁଂ ଆନେଇ' ବେ'ତିଂ ଡ'କୁନୁଂ ସତ୍ ଡେଂଗୁତା । ଗିତସଂଗିତା ଦୁଇବକ୍ ମାଇନା ବିସୟ ଡି'କେନା ଲେକ୍ଲ'ତା, ମା ଡ'ନା:
‘ନ ନିଂନା ଉଁ'ଉଁ;
ଆ'ନା ନିଂ ନନା ବା ଏଗୁତିଂ’ ଡ'ସେକ୍ ଲେକ୍ଲ'ତା ।
34ମାପ୍ରୁ ଆମାଇ ଗୁଇ'କୁନୁଂକୁରୁଂ ମାରି ବ'ରଲ', ସା' ମାଇନା ମଟ୍ ଇନ୍ଡଇ'ଏସା ମାରି ନାସ୍ ଆଉଇତା । ଗୁତୁନ୍ ବିସୟ ମାପ୍ରୁ ଡି'କେନ୍ ସୁନ'ତା,
‘ଦାଉଦ୍ଲାବୁରଂ ନିଂ ତିତିବାଡ'ସେକ୍ ପର୍ମାନ୍ ସବ'କୁନୁଂ ଗୁତୁନ୍ ପବିତ୍ରବାଇ' ମାରି ସତଇସା ଡେମ୍ତିଂ ଡ'ସେକ୍ ପର୍ମାନ୍ ସବ'କୁନୁଂ ନିଂ ପେବୁରଂସା ଡେମ୍ତିଂ’ ଡ'ସେକ୍ ସୁନ' ।
35ସା' ପାଲ୍ ମୁଇ ଗିତସଂଗିତାବକ୍ସା ମାଇ ମାରି ସୁନ'ତା:
‘ନନା ପବିତ୍ରବାଇ' ରେମ ନାସ୍ ଉଇଏଇ' ଡ'ସେକ୍ ନ ଆମାଇ ଆବେ'ତୁନ’ ଡ'ସେକ୍ ସୁନ'ତା ।
36ଜୁ, ଦାଉଦ୍ ରାଜାଲା ମାଇନା ଜୁଲିନ୍ ରେମଲେବୁରଂ ଡୁକୁନୁଂବେଲା ମାଇ ଆମାପ୍ରୁ ମାନ୍ସେକ୍ ଗୁଲାଇ ଡେମ'କୁ । ମାରି ମାଇ ଗୁଇ'ଗା'ସା' ଆମାଇନା ୟା'ତୁତାଲେ ଆତିଲ'କୁନୁଂ ଜାଗାବକ୍ ଆମାଇସା ଆତିଲ'ସୁଂଅଁ', ସା' ମାଇନା ମଟ୍ ନାସ୍ଉଇଗା' । 37ମାତର୍ ଗୁଇ'କୁନୁଂକୁରୁଂ ଆଜା ମାପ୍ରୁ ବ'ରଲ' ମାଇନା ଞେରି ନାସ୍ ଆଉଇତା ।
38ସା' ଅ ନିଂନା ବୁୟାଂଏଁ, କେନା ପେ ମାଗ'ନା ଡେନ୍ତା ଡ'ସେ'ଗା ନିଂ ସୁନ'ତିଂ, ମା ଡ'ନା: କେନ୍ ଜିସୁଲା ଡେମ'କୁନୁଂ ଲାଗିରେ ପେନ୍ ଗୁଲାଇ ପାପ୍ ମାପ୍ରୁ କେମା ଡେମ୍ତ ଡ'ସେକ୍ ଆପେ ନେଇ ସୁନ'ତୁନେଇ । 39ମସାଲା ବେଡ'କୁନୁଂ ନିୟମ୍ ମାନ୍ସେକ୍ ଡୁତୁପେସା' ପେନ୍ ପାପ୍ ଗୁଲାଇ ଗୁଇଡାଗ'ସୁଂଅଁ'ତା ଡ'ସେକ୍ ଆଡୁତା । ମାତର୍ ଜିସୁଲା ଡେମ'କୁନୁଂ ଲାଗିରେ ଆମାଇ ବିସ୍ବାସ୍ ଡେମ'କୁନୁଂ ଗୁଲାଇ ରେମଲେନା ଗୁଲାଇ ପାପ୍ ମାପ୍ରୁ ଗୁଇଡାଗ'ସୁଂଅଁ'ତା । 40ସା' ବାବବାଦିଲେ ମାମା ସୁନ'କୁ ଗୁତୁନ୍ ଗୁଲାଇ ଆପେ ମଡିନେମ୍ପୁଲେଇ ପେ ବଲ୍ ସଇଗା ଡେଂସେକ୍ ଡୁକୁଲା । ମା'ଏ ମା ଡ' ସୁନ'କୁ ଡ'ନା:
41‘ଆନିଂ ଅ'କିୟାଲିକୁନୁଂ ରେମଲେ, ପେ ଅଂ,
ନିଂ ପେନ୍ବକ୍ ମୁଇ କାମ୍ ଡେମ୍ତିଂ,
ଗୁତୁନ୍ ମା ଡ'ସେକ୍ ଜାଏସା ଆପେ ସୁନ'ନାସା
ପେ ଗୁତୁନ୍ ଇନ୍ଡଇ'ଏସା ବିସ୍ବାସ୍ ଆଡେମ୍ତୁପେ ।
ସା' ଗୁତୁନ୍ ଜୁଲ'ସେକ୍ ପେ କାବାକାବା ଡେଂଉୟା ମାରି ଗୁଇ'ଉୟା ।’”
42ପାଉଲଲା ମାରି ବର୍ନବାଲା ଜିଉଦିରେମଲେନା ପାର୍ତନା ଡିଂଅଁକୁରୁଂ ଉଇବେଲା ଅବୁଦି ରେମଲେ ମାଇପାନ୍ବକ୍ ସାକ୍ସେକ୍ ଆ'ନା ସୁନ'କୁନୁଂ କେନ୍ ତୁମ' ସୁନାପ୍ ବିସ୍ରାମ୍ଦିନ୍ବକ୍ସା ପା ଇମ୍ବାୟ ମାରି ସାକ୍ସେକ୍ ମାର୍ ମୁସଉ ସୁଁ ଡ'ସେକ୍ ସୁନ' । 43ମାରି ରେମଲେ ଗୁଲାଇର ଗୁତୁନ୍ ପାର୍ତନା ଡିଂଅଁକୁରୁଂ ଉଇବେଲା ଅବୁଦି ଜିଉଦିରେମଲେ ମାରି ଆମାପ୍ରୁ ସୁନ୍ଡ୍ରସେକ୍ ଡୁକୁନୁଂ ଜିଉଦିରେମ ଏକୁନୁଂ ଏନ୍ତୁକ୍ ଜିଉଦି ଆରାକ୍ବାଇ' ରେମଲେସା ଆମାଇପା ତେଂଗି' ଉଇଗା' । ସା' ମାଇପା ମା'ଏବୁରଂ ଅଇଁୟ' ଅଇଁୟ'ସେକ୍ ଡୁକୁ ମାରି ମାପ୍ରୁ ଦୟା ଡେଂସେକ୍ ରେମଲେନା ପାପ୍ ଗୁଲାଇ କେମା ଡେମ୍ତ ଡ'ସେକ୍ ସୁନ'କୁନୁଂ ବିସୟ ପେ ବଲ୍ ବିସ୍ବାସ୍ ଡେମ'ସେକ୍ ଡୁକୁଲା ଡ'ସେକ୍ ଆମା'ଏ ସୁନ' ।
44ସୁନାପ୍ ବିସ୍ରାମ୍ଦିନ୍ ପ୍ରବୁନା ତୁମ' ଅଂପୁଲେଇ ଗୁତୁନ୍ ଆନ୍ତିୟକିଆ ମୁନା'ଉଂଗମ୍ନା ଅବୁଦିର ଆତା ରୁନ୍ଗା' । 45ଅବୁଦିର ରୁନ୍କୁନୁଂ ଜୁଲ'ସେକ୍ ଜିଉଦିରେମଲେନା ମୁନା'ରେମ୍ ଅବୁଦି ଆଂକାର୍ ଡେଂଗା' । ମାରି ମା'ଏ ପାଉଲଲା ସୁନ'କୁନୁଂ ଗୁଲାଇନା ବିରୁଦ୍ରେ ସୁନ' ମାରି ଆମାଇ ଅବୁଦି ଅଲିରାକ୍ବାଇ' ସୁନ' ।
46ମାତର୍ ପାଉଲଲା ମାରି ବର୍ନବାଲା ମବୁତୁଂ ଆମା'ଏ ସୁନ' “ମାପ୍ରୁନା ବାନିକବର୍ ନେଇ ପେନ୍ବକ୍ ସିଁସେଇଁଉ ସୁଁସୁ ଡୁକୁଗା' । ମାତର୍ ପେ ଗୁତୁନ୍ ମନାଡେମ'ପେସା' ପେ ମଡୁନମ୍ ଜିବନ୍ ଆନେଇ ଦର୍କାର୍ ଆରାକ୍ ଡ'କୁନୁଂସୁଗ ଡେଂଗୁତୁପେ । ଗୁତୁନ୍ସା' ଆ'ନା ନେଇ ଜିଉଦି ଆରାକ୍ବାଇ' ରେମଲେନ୍ବକ୍ ମାପ୍ରୁନା ବାନିକବର୍ ସୁଁସୁ ଉଇଡେନ୍ତୁନେଇ । 47ମାସା'ଡ'ନା ପ୍ରବୁଲା ଆନେଇ ଡି'କେନା ସୁନ'ତା:
ଜାଜା ଜିଉଦିରେମ ଆରାକ୍ ଡୁ'ତୁନ୍ବାଇ' ରେମଲେନ୍ବକ୍ ତାରା'କୁନୁଂ ମୁଇ ବତିସୁଗ ଆନ ନିଂ ବୁଂଅଁ'ତିଂ ।
ସା' ଦର୍ତନିବକ୍ ଡୁକୁନୁଂ ଗୁଲାଇ ରେମଲେନ୍ବକ୍ ନ ଉଇସେକ୍ ଆମା'ଏ ଜା ରକ୍ୟା ଡେମ୍ତ ଡ'ସେକ୍ ନ ସୁନ୍ତୁନ ।”
ଡ'ସେକ୍ ସୁନ'ତା ଡ'ସେକ୍ ମାଇପା ସୁନ' ।
48ସା' ଜାଜା ଜିଉଦିରେମଲେ ଆରାକ୍ ମା'ଏ କେନ୍ ତୁମ' ଅଂଅଁ'ସେକ୍ ଅବୁଦି ସାର୍ଦାକ୍ସେକ୍ ପ୍ରବୁନା ବଲ୍କବର୍ ଅବୁଦି ବଲ୍ବେ ଡ'ସେକ୍ ସୁନ' । ମାରି ମାପ୍ରୁ ମଡୁନମ୍ ଜିବନ୍ ବେ'ତିଂ ଡ'ସେକ୍ ଆଜାଆଜା ସିରେଲ'କୁ ଗୁତୁନ୍ ରେମଲେ ଗୁଲାଇର ବଲ୍କବର୍ ଅଂଅଁ'ସେକ୍ ବିସ୍ବାସ୍ ଡେମ' ।
49ସା' ପ୍ରବୁନା ବଲ୍କବର୍ ଗୁତୁନ୍ ଦେସ୍ନା ଗୁଲାଇ କୁନ୍ଡା ଉନୁଂଗା' । 50ମାତର୍ ଜିଉଦିରେମଲେନା ମୁନା'ରେମେ ଗୁତୁନ୍ ଜୁଲ'ସେକ୍ ଆମାପ୍ରୁ ସୁନ୍ଡ୍ରସେକ୍ ଡୁକୁନୁଂ ଅବୁଦି ସାକାର୍ବାଇ' ସେଲାନେବୁରଂ ମାରି ଗୁତୁନ୍ ଉଂଗମ୍ବକ୍ ଡୁକୁନୁଂ ମୁନା'ରେମେବୁରଂ ଅଇଁୟ'ସେକ୍ ଆପାଉଲଲା ମାରି ଆବର୍ନବାଲା ଅ'ରିମ'ସେକ୍ ଆମାଇପା ଅବୁଦି କସ୍ଟ ବେଡ'ସେକ୍ ଗୁତୁନ୍ ଉଂଗମ୍କୁରୁଂ ଞନ'ସୁଂଅଁ' । 51#ମାତିଉ 10:14; ମାର୍କ 6:11; ଲୁକ 9:5; 10:11ସା' ମାଇପା ଗୁତୁନ୍ ଉଂଗମ୍କୁରୁଂ ଡୁଂଡୁଂବେଲା ମାପ୍ରୁ ଆପେ ଅନ୍ତୁର' ବେଡ'ତାସା' ଆପେ ଡନ୍ଡ୍ ବେ'ତ ଡ'ସେକ୍ ଅସୁଇ'ପୁଲେଇ ମାଇପାନା ତିକ୍ସୁଂବକ୍ ଡୁଲି ଗିଡ'କୁନୁଂ ଗୁତୁନ୍ ଉଂଗମ୍ବକ୍ ପୁପାକ୍ସୁଂସେକ୍ ଇକନିୟ ଡ'ସେକ୍ ମୁଇ ମୁନା'ଉଂଗମ୍ବକ୍ ଉଇଗା' । 52ମାରି ଆଜିସୁ ବିସ୍ବାସ୍ ଡେମ'ସେକ୍ ଡୁକୁନୁଂ ରେମଲେ ଗୁଲାଇର ଅବୁଦି ସାର୍ଦା ଡେଂସେକ୍ ଡୁକୁ ମାରି ପବିତ୍ର ଆତ୍ମା ମା'ଏନ୍ ଜିବନ୍ବକ୍ ଡୁକୁ ।
CC BY-NC-ND 4.0