Sakaliya 7
7
Hompa ta pangura elidiliko lyoyimpempa
1Momumvho gwaune gwepangero lyaDaliusi, mezuva lyaune lyokwedi kwautano‐naune (kwedi kwaKisirevhu), Hompa kwa pere nge mbudi.
2Vantu womoBeteli kwa tumine Saresere naRege‐Mereki kumwe novantu vawo kontembeli zaHompa Munankondo nadinye, va ka kanderere etungiko lyaHompa, 3nokupura vapristeli novaporofete epuro eli asi: “Tu twikire ngorooro kulira, morwa ezonauko lyontembeli, tu lidilike nondya mokwedi kwautano, moomu twa yi rugana nomvhura dononzi ndi?”
4Mbudi zaHompa ezi za wizire kwange zezi, 5asi: “Tantera vantu womosirongo novapristeli asi, apa ngava dilire nokulira mokwedi kwautano noku kwautano‐nauvali posiruwo sonomvhura edi nomurongo ntano nambali, kapi va yi ruganenene morwakufumadeka nge. 6Apa ngava li tava nu, ngava yi ruganenene ekuta lyavene.”
7Eyi yiyo ga uyungire Hompa movaporofete vanare, posiruwo esi ga ragopere Jerusarema a zure vantu nava wovanzi va dilire kutunga moyitata mwelike eyi ya mu kundurukidire nye navaava va kere korwaMbindakano zosirongo nava va hamenene korwaUtokero womatako gonondundu.
Uhalimburukwi kureta upika
8 Hompa kwa gavere mbudi ezi kwaSakaliya asi: 9“Nompangera dange kwa di gava nare kovantu vange asi: ‘Omu tare asi uhungami tava u sikisa mo, one mu kare nezaverero nonkenda novakweneni. 10Mwa ha hepeka vafisaya nononsigwe novanayirongo ava va tunga mokatji keni, ndi nkenye munaruhepo. Walye omu gazara nonkedi dokukoresa vakweneni konomutjima!’
11“Nye vantu vange mokurundamutwe kwawo, kapi vana hara kupurakena. Nondunge dawo da limbandera 12nonomutjima dawo vana di kukutike ngwendi emanya. Awo kapi vana hara kupurakena kerongo eli na tumina movaporofete ava va kere ko nare. Ame nina handuka unene. 13Morwa kudira kupurakena eyi na uyunga, yiyo na dira kulimburura apa va kandererere. 14Ame kwa va pepura po ngwendi mpepo zokakundungu va ka tunge moyirongo younayirongo. Ano sirongo esi sosiwa, kwa si siga mavega gomawoko‐woko, mwa hana muntu ogu ana tungu mo.”
Currently Selected:
Sakaliya 7: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
