Varoma 9
9
Karunga naIsraeli, muhoko ogu ga horowora
1Ame kuna kuuyunga yosili mwaKristusa, kapi nina kuyilizaga. Ezwi lyange lyomomutjima kuna kugavera nge undipo moMpepo zoKupongoka asi eyi kapisi yimpempa. 2Mutjima gwange yilyo sa eguwo lyomu nokukora kwa ha si kuhaga. 3Ame ko nyamwange na hara ni kare ngano konhi zefingiliro lyaKarunga, ni zupuke ko kwaKristusa, nsene asi yiyo yokukwafa vakwetu womomuhoko gwetu. 4Awo yiwo Vaisraeli ava ga horowora Karunga va kare vana vendi, a va yererepeke nouyerere wendi. Yiwo ga panga nawo magwanekero oku ta va pe Veta noukerelikarunga nomatumbwidiro. 5Awo ruvharo rozinyakurwawo ava ga horowora Karunga. Yiwo ga hamena Kristusa parutu. Karunga ogu a pangere nayinye, va mu hamberere narunye nanarunye! Amen.
6Nye kapisi asi nonkango daKarunga kapi da sika mo. Yeeyi kapisi vantu ava ga horowora Karunga navenye kwa tunda mwaIsraeli. 7Hena asi, kapisi morwa awo ruvharo rwaAbirahamu, yiyo nava kerera navenye vana vaAbirahamu, nye asi, “MwaIsaka yimo ngava tumbagwira ruvharo roge.” 8Kuninka asi ava va hampuruka pasintu kapisi yiwo vana vaKarunga, nani nye vaava va hampurukira patumbwidiro lyaKarunga, yiwo va varura asi ruvharo rwendi. 9Nonkango domatumbwidiro dedi asi, “Posiruwo ngaseesi yipo ngani ka tengura komumvhogu, ngani ya gwana Sara ana kara nomukeke gomugara.”
10Kapisi yeeyi yelike. NaRepeka nage kwa hampurukire vana womugara gumwe, zinyakurwetu Isaka. 11-12Nye awo vanona awo simpe nokuvahampuruka si, va hana kurugana yoyiwa ndi yoyidona, yipo ga tanterere Karunga Repeka asi, “Mukurwamuntu nga ruganena mumbyendi.” Karunga kwa yi tanterere asi eharo lyendi lyokuhorowora gumwe po li sike mo, kapisi morwayirugana, morwezigido lyendi. 13Moomu va tjanga asi, “Ame kwa here po Jakopo, nye Esau kwa mu nyengere.”
14Ngapi nye omu natu yi tanta? Karunga kapi a yi hungike? Nampili kuna manga! 15Age kwa tanterere Mosesa asi, “Ame kufira nkenda ogu na hara kufira nkenda, ame hena kuzaverera ogu na hara kuzaverera.” 16Ano nayeeyi kapi ya hamena keharo ndi koyirugana yomuntu, nani nye koufenkenda waKarunga. 17Moomu ga tanta matjangwa kwaFarao asi, “Ame kwa ku tumbira negano eli asi nonkondo dange di monekere moge nedina lyange asi ngali divikwire po mouzuni naunye.” 18Ano Karunga kufira nkenda ogu ana hara, age hena kukukutika mutjima gogu ana hara.
Ehandu noufenkenda waKarunga
19Yipo nye ngo tanterera nge asi, “Opo ngoso Karunga yinke hena ana kupaparera simpe mapuko movantu? Yilye ogu ga nyoka rumwe mpango zendi?” 20Nyovelye nye ove muntu gokutomonona Karunga? Siungwa kapi asi tantere muungi gwaso asi, “Yinke wa ruganena nge ngesi?” 21Muhongi goyipako yerova nani kapi ga paka nonkondo kerova, a honge yipako yivali merova limwe, simwe sefumano, ano esi simwe sokupira efumano.
22Nani eyi kapi ya lifana neyi ga rugana Karunga? Age kwa hara kuhorora ehandu lyendi a monekese nonkondo dendi. Nye age kudidimikira nezaverero lyenzi yipako yemehandu, kuninka asi vantu ava va fira kuvazonagura po. 23Age kwa yi ruganena asi a divise uyerere wendi wounene mwetu ose yipako eyi ga zaverera. Age kwa tu wapaikira kutambura uyerere wendi, 24nyose ava ga zigida, kapisi moVajuda mwelike, nani nomoVapagani. 25Moomu ga tanta mobuke zaHoseya asi:
“Vantu ava va dilire kukara muhoko gwange,
ngani va tumbura asi ‘Muhoko gwange’,
nava na dilire kuhara,
ngani va tumbura asi ‘Wokuhara’.
26Ano pevega apa ngava va ninki asi,
‘One kapisi muhoko gwange’,
yipo ngava va tumbura asi,
‘Vana vaKarunga gomunamwenyo’!”
27Nye yokuhamena Israeli Jesaya ko kwa uyungire asi, “Nampili ngomu gwa vhuka muvaru goVaisraeli ngwendi muheke gwekefuta, vangapi tupu ngava paruka. 28Yeeyi Hompa kapi a likata‐kata mokusikisa mo nkango zendi mouzuni.” 29Moomu ga pumbire nare Jesaya asi, “Hompa gonombunga dovakwayita ngano kapi ga hupisire po vamwe womoruvharo rwetu, ngano twa kara ngwendi Sodoma, tu lifane naGomora.”
Israeli noMbudi zoNgwa
30Ngapi nye omu natu tanta? Ntudi ngesi asi: vapagani ava ngava dili kukondjera uhungami, kwa gwana uhungami, uhungami wokutunda mepuro. 31Nye muhoko gwaIsraeli ogu ngagu kondjere Veta zokumuhungamekesa, kapi gwa sika ko koVeta zangoso. 32Morwasinke? Morwa eyi ngava rugana kapi va yi tatekerere kepuro, kwa yi tatekerere koyirugana. Awo kwa lipundwire kemanya lyepundukiso, 33moomu va tjanga asi:
“Ame ngani tura moSiyoni emanya lyepundukiso,
emanya eli ngali zapura vantu.
Ano ogu nga mu pura,
kapi ngava mu fisa nomuga.”
Currently Selected:
Varoma 9: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003