Varoma 14
14
Walye omu pangura vakweneni
1Muntu gepuro lyereru, mu tambureni, kapisi mu mu tangwisire kweyi a gazara mwene. 2Gumwe ga pura asi kulya tupu nayinye. Nye ogu po ga kara nepuro lyereru, kulya yinahidi yelike. 3Ogu a li nayinye, ga ha dina ogu a dili kuyilya. Ano nogu a dili kulya nyama, ga ha pangura ogu a zi li, yeeyi Karunga nga mu tambura. 4Ove nyove nye yilye, ogu o pangura mukareli gwamukweni? Eyi yahekurwendi, a mu sikameke, mwene, a mu gande, mwene. Nye age nga sikama ngorooro, yeeyi Hompa ga kara nononkondo dokumusikameka ngorooro.
5Gumwe kutara ezuva limwe asi lya pita makwawo. Ano ogu gumwe kugazara asi mazuva nagenye kwa hetakana. Nkenye ogu a korerere moyigazo yendi. 6Ogu a horowora mazuva, kugahorowera Hompa. Ano ogu a li nayinye, kulira Hompa, yeeyi age kuhamberera Karunga. Nogu a dili kulya nayinye, kunyokera kuyilya morwaHompa, makura ta hamberere Karunga. 7Nagumwe si ogu a kara nomwenyo mwamwene tupu ndi asi a lifire mwene tupu. 8Yeeyi nsene asi nomwenyo tuna kara, kuna kerere nomwenyo Hompa, ndi asi tu fe, tatu fire Hompa. Tu kare nomwenyo ndi tu fe, ose kwaHompa twa hamena. 9Yeeyi eyi yigo ga fira Kristusa, ayo yiyo ya mu pindwisisa koufe a kare hena nomwenyo, asi a kare Hompa govanamwenyo novafe. 10Ano ove, yinke nye eyi o pangwire mukweni? Ndi nyove po nye, yinke nye eyi o swawire mukweni? Yeeyi natuvenye ngatu ka sikama kosipundi sepanguro saKarunga.
11Moomu va tjanga asi:
“Moomu na kara nomwenyo,
yimo ana kutanta Hompa, vantu navenye
ngava tongekera nge nongoro,
ano nkenye eraka ngali fumadeka Karunga.”
12Ano nkenye ogu mokatji ketu yige kuzeresa yirugana yendi kwaKarunga.
Walye o pukisa mukweni
13Walye atu lipangura‐pangureni hena. Sosiwa po sesi asi, nokutulira si mukweni silimbikiso ndi sipundukiso monzira. 14Ame na diva, ame hena na korerera mwaHompa Jesus asi, kutupu esi sa nyata mwasene, nye ogu ga si mona asi sa nyata, ogo yige nye sa nyatera. 15Ano mukweni nsene di mu koresa komutjima nondya doge, ntudi kapi ono kuyiruganena hena meharo. Walye o zonagura po nonondya doge mukweni ogu ga fira Kristusa. 16Walye omu tarerere yoyiwa po eyi mwa hama kwayo, va yi uyunge hena momudona. 17Yeeyi Untungi waKarunga kapisi kulya nokunwa, nani awo uhungami nombili nehafo lyomoMpepo zoKupongoka. 18Ogu a ruganene Kristusa mwangesi, kuza Karunga komutjima, vantu hena ngava mu panda nawo.
19Ano atu kondjereni eyi ayi reta mbili neyi ayi tu koraike‐koraike. 20Walye o haraganesesa sirugana saKarunga konondya. Nondya dene ko, nadinye kwa kuhuka. Nye eyi yokulya ko eyi ayi pukisisa vantu yidona. 21Yoyiwa po yokudira kulya nyama ndi o nwe vhinyu, ndi o rugane nkenye eyi yokupukisisa mukweni. 22Eyi wa panda, kara nayo nyamoge kosipara saKarunga. Gerago googu a dili kulipangura moyininke eyi ga mona asi yiwa. 23Nye ogu a singanyeke mokulya kwendi, Karunga nga mu pangura, morwa kapi ana kuyilya mepuro. Nayinye eyi ya hana asi yemepuro, oyo nzo.
© Egwanekerobibeli Lyanamibia 1987, 2003
© Bible Society of Namibia 1987, 2003