Varoma 13
13
Kulimburukwa kepangero
1Nkenye muntu a limburukwe kepangero eli ali mu pangere. Yeeyi epangero nalinye kwa kunda kwaKarunga. Ano vapangeli ava va kara po, Karunga ga va tura po. 2Ogu a lilimbi nepangero, kulilimba nompangera ezi ga tura po Karunga. Ano ava ava yi rugana, kulitwara vene mepanguro. 3Yeeyi vapangeli kapi va kerera po asi va tjilise ava ava rugana uwa, awo kwa kerera po vaava ava rugana udona. Nsene kapi wa hara kutjira epangero, o rugane uwa, makura alyo ngali ku pandure. 4Epangero alyo mukwafi gwaKarunga ogu a ku popere. Nye nsene o rugana udona, tjira, yeeyi alyo kapi lya dwarera rufuro mawoko‐woko. Alyo mukwafi gwaKarunga ogu a handukire ava ava zono. 5Ano o limburukwe nye kepangero, nye kapisi morwehandukiro lyelike, nani morwezwi lyoge lyomomutjima hena.
6Morweyi yiyo omu futire hena mutero. Vapangeli yiwo vakareli vaKarunga apa vana kusikisa mo sirugana sawo. 7Omu va pe navenye eyi ya va hamena: mutero kwava womutero, mutero gopomururani kovafutisi vago. Omu tjire ava va fira kuvatjira, omu fumadeke ava lya hamena efumano.
8Walye omu kara nomakongo govantu, ntudi gaaga gokulihara‐hara no. Yeeyi nkenye ogu ga hara mukwawo, Veta a sikisa mo. 9Yeeyi asi, “Walye o hondere, Walye o dipaga, Walye o vaka, Walye o dovaukire yuma,” yipango eyi noyikwawo nayinye nkenye oku ya ka twa, kwa yi manga kumwe montanto ezi asi, “Hara mukweni moomu wa lihara nyamoge.” 10Ogu ga hara mukwawo kapi a mu ruganene yoyidona. Yiyo nye asi eharo kusikisa mo Veta mudima.
Ewizo lyaKristusa pepi
11Ano eyi omu yi rugane, morwa muna diva asi siruwo musinke esi: siruwo ntaantani sina siki mo nye asi mu pinduke mo monompofu deni. Ano siruwo sokutuparura kuna tu sikakana nye, kupitakana apa twa pulire petameko. 12Masiku mokupita nye gana kerere, ezuva li pume. Tu sigeni nye yirugana eyi ya hamena komundema, makura tu dwareni yirwisiso eyi ya hamena kouzera. 13Atu lipangereni nyosevene nawa‐nawa moomu ava lipangere vantu momutenya, kapisi tu kare momakurulya nomomakurunwa, kapisi moruhonda nomokulizumbilira ndi monomutangu nomomfudu. 14Nye one lidwarekeni yaHompa Jesus Kristusa. One hena walye omu twara seke marutu geni asi madowo gago ga ga pwe.
© Egwanekerobibeli Lyanamibia 1987, 2003
© Bible Society of Namibia 1987, 2003