Varoma 12
12
Mwenyo gomupe mwaKristusa
1Vakwetu, Karunga kwa tu fira nkenda. Yipo nye nina kumukorangedera asi mu gave marutu geni ga kare nzambo zonzuni zokupongoka, ezi azi zi Karunga komutjima. Eli yilyo eruganenokarunga lyeni lyokuzira mo. 2Mwa ha lifana nouzuni ou. Nye sigeni Karunga a rundurure magazaro geni, mu situnuke nawa‐nawa. Ntani mu diva kukoneka mpango zaKarunga neyi yoyiwa ya mu wapera ayo ya sikilira mo.
3Monkenda ezi ga pa nge Karunga, tani mu korangeda one namuvenye asi, walye omu pitakanesa mokuligazara nyamweni. Nye omu heteke kugazara nawa, nkenye ogu paheteko zepuro eli ga mu pa Karunga. 4Ose kwa kara nomaruha gomanzi morutu rumwe tupu. Ano maruha aga kapi aga rugana sirugana simwe tupu. 5Nose ngorooro tupu, nampili tu kare tu vanzi, nye rutu rumwe tupu mwaKristusa. Nye momalikaro ose kulikwatakana moomu aga likwatakana maruha gorutu. 6Ose kwa kara nomauhwi gonkenda ga lisiga‐siga poufenkenda ou ga tu pa Karunga. Ogu ga kara nouhwi wouporofete, a udise Mbudi zaKarunga mokuliza nepuro lyendi. 7Ogu ga kara mosirugana sokukwafa, a kwafe momuwa. Ano ogu a rongo, a ronge nomupampi. 8Ogu ga kara nouhwi wokukorangeda vakwawo, a kare mokukorangeda kwendi. Ogu a gava, a gave nomutjima gomuwa, ogu a pitisire, a pitisire nomupampi, ano ogu a zuvhire vantu nkenda, a va zakure nehafo.
Mapukururo gopakriste
9Omu lihara‐hare neharo lya hana uyilipaki. Nyengeni udona mu hame kouwa. 10Omu lihare‐hare neharo lyosiumbya lyomwaKristusa. Omu gave sihonena sokulifumadeka?-?fumadeka. 11Omu rugane nomupampi, walye omu dwapa. Hwameni noMpepo mu ruganene Hompa. 12Omu hafe mehuguvaro, tomu didimike momaudigu. Omu kanderere narunye, walye omu dwapa. 13Omu kwafe vapongoki momaudigu gawo, tomu tambura vagenda momambo geni.
14Omu swere ava ava mu hepeke; omu va swere, kapisi mu va fingilire. 15Omu hafese ko ava vana hafa, tomu lilisa ko ava vana kulira. 16Omu lize mutjima gumwe. Walye omu kondjere eyi yoyinene po, nye omu lipake kovasupi po. Walye omu lipaka kounandunge.
17Walye omu likwatere‐kwatere nonkoko. Omu rugane eyi ya wapera vantu navenye. 18Kombinga zeni, one kareni nombili kovantu navenye ntani. 19Vakwetu, walye omu lirugwidire‐rugwidire udona noudona. Sigireni ehandu lyaKarunga evega. Yeeyi kwa tjanga asi, “Ame nyame ani tengwida kuwoko nehandu, nyame ani futu, yimo ana kutanta Hompa.” 20Hena asi:
“Nkore zoge nsene ana fu nzara, mu pa nondya a lye.
Nsene ana fu enota, mu pa mema a nwe.
Nsene o yi rugana eyi, ngwendi nyove ogu ono kumurengwesa.”
21Walye omu tarerere udona u mu funde, nye one fundiseni udona kouwa.
© Egwanekerobibeli Lyanamibia 1987, 2003
© Bible Society of Namibia 1987, 2003