Varoma 11
11
Nkenda zaKarunga komuhoko gwaIsraeli
1Ame tani pura asi: Karunga kwa zumba nye muhoko gwendi ndi? Nampili kuna manga! Ame ko nyamwange ni Muisraeli, ruvharo rwaAbirahamu, gemezimo lyaMbenyameni. 2Karunga kapi ga zumba muhoko gwendi ogu ga horowora nakwanare. Kapi mwa resa nani eyi va tjanga momatjangwa yokuhamena Eliya? Age kwa tovanenene Vaisraeli kwaKarunga asi, 3“Hompa, vana dipaga vaporofete woge, yizambero yoge yiyo vana yi kumagura po. Nyamelike nina hupu po, nye awo kuna hara asi va dipage nge name.” 4Nye Karunga ngapi omu ga mu limbwilire? Ngesi asi, “Na lihupisire po vagara mayovi gatano‐nagavali ava va dira kutwira nongoro Bara.” 5Nantaantani yimo: pokeli kambungagona kovantu ava ga horowora Karunga morwankenda zendi. 6Ano nsene asi kwa va horowora morwankenda, kapisi morwayirugana hena. Ngano morwayirugana, ngano nkenda kapi hena za kara nkenda‐nkenda.
7Ngapi nye? Eyi ava papara Vaisraeli, kapi va yi gwana. Nye vahoroworwa velike va yi gwana, vapeke kwa kukutika nomutjima dawo. 8Moomu ga tanta matjangwa asi, “Karunga kwa va pa mpepo zougova, meho gawo ga dire kumona, ano matwi gawo ga dire kuzuvha, dogoro nekezuva eli lyanaina.” 9Moomu ga tanta Ndafita asi:
“Nondya dawo ngadi kara ekwe lyawo,
yipito yawo ngayi kara rutenda rwawo
nepundukiso nomfuto zawo.
10Wuvilika meho gawo ga dire kumona,
o tungure nomugongo dawo
ngadi penge narunye.”
11Ame tani pura asi: Vajuda kwa pundukilire asi va gwe ndi? Nampili kuna manga! Kuzona kwawo kwa retera vapagani eparu, ano Vaisraeli yiyo ya va retera mfudu. 12Nonzo doVajuda da retera uzuni erago lyenene. Ano ruhepo rwawo ropampepo rwa retera vapagani ugawo wounene. Ee, eragogona ngali kara nsene asi sivaro nasinye soVajuda naso ngasi zililira mo!
Eparu lyovapagani
13Tani mu tantere, one ava mwa tunda moupagani asi, moomu na kara mupositoli govapagani, tani lifumadekere yirugana yange. 14Nampo ngani pindura mwava womuhoko gwange mfudu, nampo ngani parura po vamwe. 15Nsene asi kuzumba kwawo kwa retera uzuni ukwawo naKarunga, etamburo lyawo yinke hena? Amesi epinduro lyokoufe? 16Mboroto zokulihunga nsene asi mpongoki, yiduwo nayinye yipongoki. Ano di kare nondandani dositji nsene nompongoki, nonomutayi nado nompongoki. 17Nomutayi dimwe domuzwe gokutapeka kwa di teta mo, makura yiyo va gugikira ko nomutayi domuzwe gomowiza. Kuninka asi nyone vapagani muna hokere mo, yiyo muna likwata kumwe nedi lyomuzwe, mu zamwe mo masini gago. 18Walye o linenepeke, o dine nomutayi edi va teta ko. Nsene to linenepeke, diva asi kapisi nyove wa simba edi, edi yilyo lya ku simba.
19Makura ngo tante asi, “Nomutayi kwa di tetera ko asi ame va gugikire nge ko.” 20Hawe yimo. Awo kwa va tetera ko morwakudira kupura kwawo. Ove ko kwa ku gugikira ko morwakupura koge. Nye walye o yi likangangere, kara noutjirwe. 21Karunga kapi ga siga ngorooro nomutayi dopansitwe, ove nyove nye na siga ngorooro ndi? 22Tara uwa waKarunga nehandu lyendi! Age kuhandukira ava va gwa. Nye age muwa koge, nsene o kara mouwa wendi. Nsene yimo sa, nove ngava ku teta mo. 23NoVajuda nawo nsene va dira kukara ngorooro mouhapuli wawo, ngano nawo ngava va gugikira ko hena. Yeeyi Karunga kuvhura kuvagugikira ko. 24Nyove nye va teta komuzwe gokudira kutapeka, yiyo va ku gugikira komuzwe gokutapeka. Ava va hamena komuzwe gokutapeka, ureru kuvagugikira ko komuzwe ogu va hamena.
Karunga kufira nkenda navenye
25Vakwetu, posili sihoramo simwe esi na hara mu si dive. Aso ngasi mu gusa ko kokuhuguvara ukonentu wanyamweni. Aso sesi asi: malikukutiko goVaisraeli kapisi ganarunye, nye ngali kara po tupu dogoro nange si sikilire mo sivaro sovapagani ava ngava wiza kwaKarunga. 26Muhoko nagunye goVaisraeli yimo ngava gu parura ngoso, moomu va tjanga asi:
“Muzowoli nga tunda moSiyoni,
Age nga gusa po udiniKarunga mezimo lyaJakopo.
27Egwanekero lyetu nawo eli ngali kara po lyeli,
apa ngani dongonona po nonzo dawo.”
28Mokunyoka Mbudi zoNgwa Vajuda nonkore daKarunga vana kara, mwarweni one vapagani. Nye mokuvahorowora Karunga kwa va hara hena, morwozinyakurwawo. 29Yeeyi Karunga kapi a rundurura egazaro lyendi kogu ga horowora yiyo ga mu tungika. 30Nare one kapi ngomu limburukwa kwaKarunga, nye ntaantani ana mu fire nkenda morwakudira kulimburukwa koVajuda. 31Napaapa yimo, morwankenda ezi va mu fira, Vajuda yiyo va dilira kulimburukwa kwaKarunga, mokuninkira asi nawo Karunga ntaantani a va fire nkenda. 32Yeeyi Karunga kwa tura navenye mouhalimburukwi asi nga wape kufira nkenda navenye.
Rusumo rwehamberero
33Ee, ugawo waKarunga kounzi! Ukonentu wendi nediwo lyendi unzigona! Yilye ogu gokuvhura kusingonona nompangera dendi? Di kare nonzira dendi yilye ogu gokudikwata egano? 34Moomu ga tanta matjangwa asi:
“Yilye ogu ga diva rumwe magazaro gaHompa?
Yilye ogu gokuvhura kumupukurura?
35Yilye ogu ga mu pa rumwe yuma,
asi komeho nga yi mu tengwidire?”
36Yeeyi nayinye yige ga yi unga, mwarwendi ya kerera po, ayo kwendi ngayi tengura. Karunga va mu fumadeke narunye nanarunye. Amen.
Currently Selected:
Varoma 11: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003