MAPISAROME 135
135
Rusumo rwehamberero
1Hamberereni Hompa!
Hamberereni edina
lyendi, one vakereli vaHompa,
2ava mwa sikama monzugo zaHompa,
moUpongoki waKarunga gwetu.
3Hamberereni Hompa,
yeeyi age muwa;
dimbeni mu hamberere
edina lyendi, yeeyi age muwa;
4Mwene ga lihorowera Jakopo,
Vaisraeli va kare muhoko gwamwene.
5Na diva asi Hompa gwetu munene;
age munene ga pitakana vakarunga navenye.
6Age kurugana nkenye eyi ana seya
meguru nepevhu,
mefuta nokonhi zevhu kwii.
7Age yige a katwisa maremo
oku wa ka twa uzuni;
kuninka nombadi di kare momvhura,
ta gusa mo mpepo moupunguro wendi.
8Age kwa dipagere nombeli nadinye moEgipite,
nadinye nedi dovantu
nedi doyimuna.
9Age yimo ga ruganenene
yirugana yononkondo noyitetu,
ta futisa Farawo novantu vendi navenye.
10Age kwa hanagura po nomuhoko dononzi,
yiyo ga dipaga ohompa wononkondo ava:
11Sihoni, hompa gwaAmoli,
Ogo, hompa gwaBasani,
nohompa navenye vaKanani.
12Age kwa gavere sirongo sawo
komuhoko gwendi,
kwa si pere Vaisraeli.
13 Hompa, vantu ngava ku diva
nkenye apa asi nyove Karunga;
ava ngava kara ko
navenye ngava ku diworoka.
14 Hompa nga zaverera vantu vendi;
nga mangurura vakereli vendi.
15Vakarunga wonomuhoko wosisiliveli nongorodo;
awo mawoko govantu ga va rugana.
16Tuna nato va kara,
nye kapi ava uyunga,
meho kogeli, nye kapi ava mono.
17Awo kwa kara nomatwi,
nye kapi ava zuvhu;
awo kapi va paka muhesero
motuna twawo.
18Ava va va rugana
nava va va huguvara
ngano tava lifana novakarunga
woyimpempa ava va rugana!
19Hamberereni Hompa, one Vaisraeli;
mu hamberereni,
one vapristeli vaKarunga!
20Hamberereni Hompa, one Varevhi;
mu hamberereni one ava
omu mu tjira!
21Hamberereni Hompa moSiyoni,
moJerusarema membo lyendi.
Hamberereni Hompa!
Currently Selected:
MAPISAROME 135: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
