MAPISAROME 132
132
Ehamberero lyontembeli
Rusumo rorugendo rokuza koUpongoki
1 Hompa, wa ha divara Ndafita
neyi nayinye ga rugana.
2 Hompa, diworoka eyi
ga ku tumbwidira,
mugano ogu ga ku ganena,
ove Munankondo nadinye,
Karunga gwaIsraeli, asi:
3“Kapi ngani za membo
ndi asi ni ligonone pouro,
4kapi ngani pwizumuka
ndi asi ni rare,
5dogoro noku ngani gwanena
Hompa evega,
ngani gwanene embo Munankondo,
Karunga gwaIsraeli.”
6Twa zuvha yoSikesa
soMalikwatakano moBeterehema,
asi sa moneka momazana gaJeyalimu.
7Ose kwa tente asi:
“Tu zeni konzugo zaHompa;
tu ka tongamene
kosipundi souhompa!”
8Wiza pevero lyoge lyomapwizumukiro,
Hompa, kumwe noSikesa soMalikwatakano,
sidiviso sononkondo doge.
9Vapristeli woge va udise asi ove
kuparura vantu woge;
vantu woge navenye
ngano tava pembura!
10Ove kwa tumbwidira mukereli goge Ndafita;
wa ha nyenga mugwavekwa goge
ogu wa horowora, hompa!
11Kapi ngo yi rundurura
eyi wa tumbwidilire
mukereli goge Ndafita asi:
“Gumwe gomoruvharo roge
ngani mu tura mouhompa,
nga ronde kosipundi soge.
12Vana woge nsene va kara
momalikwatakano gange,
nomonompangera edi ani va pe,
vana vawo nawo ngano
ngava ku kwama mouhompa narunye‐narunye.”
13 Hompa kwa horowora Siyoni,
kwa hara a dike ko embo lyendi:
14“Apa yipo ngani kara narunye‐narunye;
apa yipo na hara ni pangerere po.
15Ame ngani hepurura Siyoni
momaruhepo gendi nagenye;
ngani mu kutika monzara zendi.
16Ngani ninka vapristeli vendi
va udise asi ame kuparura,
vantu vendi ngava dimba
oku tava sakere morwaehafo.
17Apa yipo ngani tumbira
munwaNdafita gumwe
nga kare hompa gomunene,
tani wapaikire mugwavekwa gwange siminikiliso.
18Nonkore dendi ngani di fisa nomuga,
nye sirongo sendi ngasi ragopa,
tasi kuru.”
Currently Selected:
MAPISAROME 132: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
