YISEWE 6
6
Marondoro gamwe hena
1Munwange, ove nyove nye ono litura mo yi ku hamene yifutwa yomuntu peke ndi? 2Ngoso nonkango danyamoge dina ku kwatesa, nomatumbwidiro ganyamoge gana ku kwatesa ndi? 3Ano nye munwange, ove kuna kara mononkondo domugara ogo, nye omu ava tundu mo ngesi: genderera o ze kwendi, o ka mu likwambere a ku sige. 4Wa ha litarerera nyamoge asi o rare ndi asi o kumauke. 5Tunda mo morutenda moomu asi duka sidira ndi sikorama mukongo.
6Ove mudwa, zende kouhwa o ka tare nonzira dawo o ka gwane ko nondunge. 7Mpili kapi wa paka mupangi ndi foromani ndi mupangeli, 8nye awo nondya kudipungura pokurombo, ano pokuteza tau lipongaikire yokulya. 9Dogoro siruwoke ngo rara ngorooro, ove mudwa, siruwoke ngo pinduka mo monompofu doge? 10Age ta tanta asi: “Tanko tani rara po nakauke, tanko ni fuse po ni pwizumuke po nakauke.” 11Ano siruwo nye oso ana kurara, makura ruhepo taru mu gwana ngwendi mumahaka ana humata.
12Vantu womawoko‐woko, vadinikarunga kugendagura oku tava sanseke yimpempa. 13Awo kufenya nomeho oku tava pyata nonompadi oku tava gava yidiviso nononyara va ku kumbagere, 14siruwo nasinye awo kugazara udona moyigazo yawo youmbudi, tava katura udigu napenye. 15Morweyi, yiyo ngali va gwanena ehanauko pwa hana erondoro, ngava remane urema wokufa nokutara.
16-19Poyili yininke yitano‐nayivali eyi ga nyenga Hompa, kapi a didimike:
Elinenepeko,
eraka lyoyimpempa,
mawoko gokudipaga vantu
vahana nzo,
mutjima gokugazara yigazo youdinikarunga,
nompadi da genderera kurugana udona,
mbangi zoyimpempa zokuhanesa yimpempa,
nomuntu ogu a katura udona
mokatji kovakwawo.
Erondoro koruhonda
20O rugane eyi vana kukutantera oguhwo, munwange, walye o divara eyi vana kukuronga onyoko. 21Nonkango dawo o kare nado nkenye apa, to di pungura momutjima goge. 22Erongo lyawo ngali ku pitisira nsene to gendi, tali ku gamene masiku, ano mutenya tali ku pe nondunge. 23Nompangera dawo uzera wokutema; mapukururo gawo kuvhura ga ku ronge omu ava kara. 24Ayo kuvhura kukukerera kovakadi wovadona, kononkango depukiso dovakadi wovantu. 25Wa ha ku hongorora uwa wawo, ano nonkope dawo da ha ku kwatesa. 26Mugara kuvhura a kare nomukadi ogu a randesa rutu rwendi momunhwi gomboroto, nye ruhonda taru mu gusa nayinye eyi ga weka.
27Opo ono kara kuvhura o simbire mundiro ponturo zoge, nye yikoverero yoge nokupya si ndi? 28Kuvhura o gende pomakara gana gehe, nye da hana kupya nompadi doge ndi? 29Yimo nye ya kara ngorooro nosimpagwa yokurara nomukadi govantu. Nkenye ogu a yi rugana nga mona kanyando. 30Vantu kapi ava swaura muwidi nsene a vakera nondya morwanzara; 31nye nsene va mu kwata, yige kufuta pwarutano‐naruvali kupitakana opo — yige kugava nayinye eyi ga weka. 32Nye mugara ogu a hondere kapi ga paka mazuru. Ogo mwene a lihanagura po. 33Ngava mu swaura tava mu toona; nomuga dendi danarunye. 34Kutupu ehandu lyomugarakwara lya pitakana po nsene ta ru esupa; nkoko zendi kapi za paka uhura. 35Kapi a tambura mfuto zongandi; ntunta zomauhwi nokudimisa si ehandu lyendi.
Currently Selected:
YISEWE 6: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
