YISEWE 30
30
Nonkango daAgura
1Edi yido nonkango douporofete waAgura, muna gomugara gwaJake, edi ana kutanta asi: “Karunga patupu po pwange, Karunga patupu po pwange. Ame kutupu ko hena sirugana.
2Ame kuna fana unene ngwendi sikorama kupitakana pomuntu. Ame kapi nina kara nonondunge dopasiuntu, moomu ga fira ngano kukara nado muntu.
3Ame kapi na lironga nampili kaunongo kongandi.
Kapi na diva yuma yongandi yokuhamena Karunga.
4Yilye ogu ga ronda meguru ndi asi a humburuke mo?
Yilye ogu ga fungatera rumwe mpepo mokuwoko kwendi?
Ndi asi a dingire mema mosintau sekehe?
Ndi asi a koreke nomururani devhu? Yilye ogo, wa mu diva tupu ndi? Munwendi gomugara yige yilye?
5“Karunga kusikisa mo matumbwidiro gendi nagenye. Age kwa fana silikandwiso sanavenye ava ava papara egameno lyendi. 6Nsene to mu pe usima asi age kuuyunga eyi ga dira kuuyunga rumwe, ta ku pangura o moneke munayimpempa.”
Simpe yisewe
7Tani ku hundire Karunga, o pe nge nge yininke eyi yivali ame simpe kapi na fu. 8Gusa nge moyimpempa. Wa ha ninka nge ngawo ndi hepere. Pe nge tupu nondya edi dina gwana, moomu ani di hepa. 9Nsene ni kara neyi yoyinzi, ame kuvhura ni uyunge asi, kapi nina kuhepa. Ano nsene ni kara hena hepere, ame kuvhura ni vake ni swawise Karunga gwange.
10Walye o pe usima mukareli pwahekurwendi. Ove ngava ku finga, ngo yi hepere.
11Vantu vamwe kufingilira oguhyawo, awo kapi ava likida ozinyawo etungiko lyawo.
12Ano vantu vamwe kugazara asi va hungama, nampili awo kapi va va kuhura konyata zawo.
13Vantu vamwe kugazara asi va wapa. — Ee, yireru tupu omu ava gazara asi awo vawa!
14Vantu vamwe kuhakana eyi ya tumbukira nohepere novatokere; mwangoso yimo nye ava parukire.
15Ehunzu kwa kara novana wovakadona vavali. Navenye kwa va rukire “Pe nge!”
Kwa kara yininke yine eyi ayi dili
kugwana elimbururo:
16sirongo sovafe
mukadi gonganze
evhu lyekukutu eli lya hepa mvhura
nomundiro gokudira kuvhura kupangera.
17Nkenye ogu a swawisa oguhwe ndi a sense ozina poukurupe wawo, yige kumulya makuvi. Ano meho gendi yigo kugandjomona mo makuvigona.
18Kuna kara yininke yine eyi ya horama nge unene kuyikwata egano:
19ekangakodi lyokutuka meguru,
ezoka lyokuwovana pomamanya,
sikepa kutaura mema mefuta
ano mugara nomukadi wokulihara.
20Mukadi gokudira kulimburukwa yimo a rugana ngesi: Age kuhondera, ta likuhu ta tanta asi: “Nayimwe si nina rugana yoyidona!”
21Pa kara yininke yine, eyi ali diri kutarerera evhu:
22mupika gokukara hompa,
mugova gokukara nanayinye eyi ana hara kulya.
23Mukadi ogu va tonda a kware, nomukareli gomukadona gokuronda pouro wamugolikadi zendi.
24Mouzuni kwa kara mo yinamwenyo yimwe yoyinunu, nye kwa kara nonondunge dononzi unene:
25Yimbumburu kapi ya paka nonkondo, nye kupungura nondya dayo pokurombo.
26Novamburu si kapi va kara kara nononkondo, nye kutunga mambo gawo momamanya.
27Simbonde: kapi ga kara nahompa, nye age kutuka madugi.
28Vamusuguru: Ove kuvhura o mu kwate mokuwoko nye to va gwana monombara.
29Kwa kara yininke yine, eyi ayi fuura mokugenda:
30Nyime, sinamwenyo sononkondo si pite yinamwenyo nayinye, age kapi a tjira yuma.
31Nkambe sokuduka,
menye zongara
nohompa mokatji kovantu vawo.
32Ove nsene egova unene mokulinenepeka to panga udona, hageka nye o gazare tanko!
33Nsene to siki masini, to gwana magadi. Nye nsene to panga ugara, to vyuka moudigu.
Currently Selected:
YISEWE 30: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
