MIKA 7
7
Udigu waIsraeli
1Kutupu hena sikwafo! Ame kuna fana ngwendi muntu gokufa nzara, ogu ana dili kugwana enyango koyitji ndi mandjembere koyisokombwa. Ekuzu nalinye vana li nyanga ko. 2Mosirongo kapi muna hupu hena muntu gokuhuguvara, nagumwe si gokulimburukwa kwaKarunga. Nkenye ogu kuna kundindira tupu ruveze rokudipaga. Nkenye ogu kuna kusana mukwawo gomosirongo. 3Awo navenye vanandunge vana kara mokurugana udona. Marenga novapanguli, kuna kupura mfuto zombumbo. Mugara gomunankondo kuvatantera eyi ana hara, makura tava ligava mwayo. 4Ano novawa vaava nava ava limburukwa unene, vana kara womawoko‐woko ngwendi wayi.
Ezuva ngali sika mo apa nga pangura Karunga mbunga, moomu ga va rondwera movaporofete. Ano awo ntaantani yina va limbi nye. 5Walye o huguvara munamaparambo goge ndi asi o huguvare mukweni. Kotokera eyi ono kuuyunga noku kwamukadoge kooku. 6Poyiruwo ngesi vana wovagara ngava ninka oguhyawo ngwendi magova, ano vana wovakadi ngava kondjesa ozinyawo. Vakadi wovadinkantu ngava tangwisa ongumweyi zawo. Nonkore domuntu, ngadi tunda mwava vepepata lyendi.
7Nye ame ngani tara kwaHompa, tani ndindire nehuguvaro Karunga ogu nga parura nge. Karunga gwange nga zuvha nge.
Hompa ta reta eparu
8Nonkore detu kutupu yokudihafesa morwetu. Ose tuna gu, nye ngatu pinduka hena. Ntaantani ose kuna kara modovera, nye Hompa nga tu pa uzera. 9Ose tuna zono kwaHompa, ose nyose kusimba ehandu lyendi karuwogona tupu. Nye moruhura nga tu popera ta tu vyukisire yininke yoyidona eyi va tu ruganena. Age nga tu twara mouzera, tatu kara nomwenyo tu tare omu ana kutuparura. 10Ano nonkore detu ngadi mona eyi, tadi swauka — nonkore tupu deedi ngadi tu zoro, tadi pura asi: “Hompa Karunga gweni hena kupi ana kara?” Ose ngatu va mona vana va fundu, kuna kuvalyatangera pevhu ngwendi etata lyomononzira.
11Mbunga ove zaJerusarema, ruveze rokutungurura makuma gositata runa siki mo. Ano poruveze oro, sirongo seni ngava si nenepeka. 12Vantu veni ngava tengwira kweni va tunde komaruha nagenye, korwaUpumezuva waAsiliya nokorwaMbindakano zaEgipite nokomukunda gwaEufurata nokomafuta gokoure nokonondundu dokoure. 13Nye evhu ngali kara mburundu morwavantu wovadona ava va tunga mo.
Hompa ta zuvhire Israeli ruhodi
14 Hompa, kara musita gombunga zoge ezi wa horowora. Nampili ngomu vana liharaganene momburundu, kwa kara tupu evhu lyetapa eli lya va kundurukida. Va siga va ze va ka lisire komaliro gomawa gaBasani naGiliyata, moomu ngava yi rugana nanare.
15Tu ruganena yirugana yokutetura Hompa, moomu wa yi ruganene momazuva gena wa tu gusire mosirongo saEgipite. 16Nomuhoko ngadi mona eyi tayi va limbi nononkondo dawo nadinye. Awo ngava kumateka tuna twawo nokulisitika matwi gawo morwawoma. 17Awo ngava wovana pevhu ngwendi mazoka. Awo ngava tunda mo monohotepopero dawo, tava kankama nokutjira. Awo ngava tengwira kwaHompa Karunga gwawo, una va kwata woma.
18 Hompa, kutupu Karunga ogu ga ku fana. Ove kudongonona po nonzo dovantu woge ava va hupa po. Ove kapi o kara nehandu dogoro narunye, nye kuhafa to tu likida eharo lyoge lyokukarerera. 19Ove ngo tu fira hena nkenda. Nonzo detu ngo di lyatangera konhi zonompadi, makura ngo di tume konhiinhi zefuta! 20Ove ngo likida ulimburukwi woge neharo lyoge lyokukarerera kombunga zoge nontekuru doAbirahamu naJakopo, moomu wa tumbwidilire ozinyakurwetu nare‐nare.
Currently Selected:
MIKA 7: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
