Rukasa 24

Evhumbuko lyaJesus

1Ngurangura zonene zezuva lyokuhova lyosivike, vakadi makura tava menekere novakwaawo kontoko, va tware yidumba eyi va wapaikire. 2Emanya lyokontoko va ka li gwana vana li sindumuna ko. 3Apa va hwililire mo, simpu saJesus nokusigwana mo si. 4Va kara opo, awo yina va limbi, va liharuka ko, vagara vavali woyikoverero yoyizera yokupaima vana sikama pwawo. 5Apa gwa va pwagere unene va nyongame, makura owo vagara tava va pura asi: “Yinke muna kupaparera munamwenyo movafe? 6Mutupu omu, ana vhumbuka. Diworokeni omu ga mu tanterere, age simpe moGalireya asi: 7‘MunwaMuntu yige kumugava momawoko govananzo, ngava mu pampare kosilivindakano, nye mezuva lyautatu nga vhumbuka koufe.’ ” 8Vakadi makura tava diworoka nonkango dendi. 9Awo tava tundu ko kontoko va ze, makura tava ka sansekera vena murongo nagumwe nayinye novakwaawo hena navenye. 10Ava va yi sansekerere vapostoli, oMariya Mangadarena naJohana naMariya zinyaJakopo novakadi hena vamwe ava va kere nawo. 11Nye nonkango dovakadi, vapostoli kwa di tere ngwendi yitanterwa, kapi va di pulire. 12Nye Peturusa age ta katuka, ta dukire kontoko. Eyi ga zunza mo, hawe, makehe gomazera gelike mo. Makura ta zi kembo, age yina mu tetura eyi ya horokere.

Jesus ta monekere varongwa vavali monzira zokoEmausi

13Varongwa vavali kwa zire ugenda mezuva lyoolyo komukunda gwa likara naJerusarema ngwendi nokilometa murongo nambali ngoso, edina lyago Emausi. 14Awo kwa liyongere yininke nayinye eyi ya horokere. 15Hava za mokuuyunga oku tava lipuragere, makura Jesus mwene ta va hedere pepi, ta gendi kumwe nawo. 16Nye awo meho gawo kwa ga uvikire, asi va dire kumudimburura. 17Age makura ta va pura asi: “Nonkango musinke edi muna kugenda oku tomu tompwere?” Nye awo hava sikamena, yipara yawo kuna guvarara. 18Ano gumwe po edina lyendi Kiliyopasa, ta mu limburura asi: “Ntudi o munayirongo sa ove moJerusarema, gokudira kudiva eyi yina horoka mo momazuva aga?” 19Age ta va pura asi: “Ee, yininke musinke?” Awo tava mu limburura asi: “Yininke yokuhamena Jesus Munasareta, ogu ga kere muporofete gononkondo moyirugana nomononkango komeho zaKarunga nokovantu navenye. 20Ano vapristeli vetu wovanene novapangeli yiyo va mu gava va mu tokwere nomfa, yiyo va mu pampara kosilivindakano. 21Ose kwa huguvarere ose asi yige gokuyazowora Israeli. Nye nayinye eyi, mwanaina ngesi eli ezuva lyautatu, kutunda apa kayi horokere eyi. 22Nye vakadi vamwe womombunga zetu vana tu tetura. Kava zi ngurangura kontoko, 23nye kapi vana ka si gwana mo simpu. Apa vana ka tengura yiyo vana ya tu tantere asi, kuna ka mona emoneko lyovaengeli ava vana va tantere asi muzuni. 24Ano vakwetetu hena vamwe ava twa kara nawo, nawo kava zi kontoko, yiyo vana ka yi gwana moomu kava tanta vakadi, nye age ko kapi vana ka mu mona.”

25Makura Jesus ta va tantere asi: “Vagova one wonomutjima donondigu mokupura nayinye eyi va uyunga vaporofete! 26Nani kapisi asi Kristusa nga nyande mweyi, makura ntani ana kuhwilira mouyerere wendi?” 27Age ta tameke kuvafwatwilira momatjangwa nagenye yininke eyi ya mu hamena, kutundilira kwaMosesa dogoro kovaporofete navenye.

28Vana kuheda pepi nositata esi va tambere, age ta ninki ngwendi gogu asi ta va pitakana. 29Nye vena tava mu kondo, tava tanta asi: “Kara pwetu, yeeyi ngurova, ezuva lina toko.” Age makura ta hwilire a kare pwawo. 30Apa ga kere nawo kosiliro, makura ta gusa mboroto, ta pandura Guhwe, ta zi bamuna, ta va pe. 31Makura meho gawo taga mahuka, tava mu dimburura, age makura ta va dongonoka momeho. 32Awo makura tava litantere asi: “Ngapi tupu omu kadi hwama nomutjima detu apa ka uyunga nose monzira, a tu fwatwire matjangwa?”

33Poopo ngoso makura tava katuka va tengure koJerusarema. Makura tava ka gwana vena murongo nagumwe nava va kere nawo, 34ava va tente asi: “Hompa ana vhumbuka sili‐sili, yiyo ana moneka kwaSimoni.” 35Nawo makura tava sanseke eyi ya horokere monzira nomu va mu divire pokubamuna mboroto.

Jesus ta monekere varongwa moJerusarema

36Havana zi mokuuyunga eyi, Jesus mwene ta sikama mo mokatji kawo, makura ta va tantere asi: “Mbili zi kare neni!” 37Awo makura tava tukuka, tagu va pwaga unene, awo kwa gazarere asi sinkisauka vana kumona. 38Nye age ta va tantere asi: “Yinke yina mu tjilisa neyi gana kuwizira matangano monomutjima deni yinke? 39Tareni komawoko gange nokonompadi dange, yeeyi nyame ogu. Gumeni nge mu tare. Yeeyi sinkisauka kapi sa paka yitumba noyisupa, moomu muna kumona omu na kara nayo ame.” 40Eyi ga mana kuyitanta, makura ta va likida mawoko gendi nonompadi dendi. 41Ano apa va dilire kupura simpe morwehafo nositetu, ta va pura asi: “Yuma ko one apa yokulya?” 42Awo makura tava mu pe ntumba zomfi zokuvava. 43Jesus makura ta zi gusa, ta li, awo kuna kutara.

44Makura Jesus ta va tantere asi: “Edi nonkango yido nye na mu tanterere ame simpe ponili pweni, asi ngayi sika mo nayinye eyi ya hamena nge, eyi va tjanga moVeta zaMosesa nomomatjangwa govaporofete nomoMapisarome.” 45Age makura ta mahura nondunge dawo va zuvhe matjangwa. 46Age makura ta va tantere asi: “Yimo va yi tjanga asi, Kristusa nga nyanda, ano mezuva lyautatu nga vhumbuka koufe. 47Elitezururo nedongonono lyononzo ngava li udisire medina lyendi nomuhoko nadinye, kutundilira moJerusarema nokomeho. 48One nyone nondipo deyi. 49Tareni, ame ngani mu tumina Mpepo zoKupongoka ezi ga mu tumbwidira Tate. Nye one tomu kara mositata saJerusarema dogoro noku ngava mu dwareka nonkondo demeguru.”

Jesus tava mu twara meguru

50Jesus kwa twere varongwa vendi dogoro koBetani. Makura ta zerura mawoko gendi a va tungike. 51Haga hokwa mokuvatungika, makura ta ligaunuka nawo, tava mu gusa va mu tware meguru. 52Awo makura tava mu tongamene, tava tengura koJerusarema nehafo lyenene. 53Awo ngava kara nkenye apa montembeli, va fumadeke oku tava panda Karunga.

Currently Selected:

Rukasa 24: KWN

Highlight

Compare

Copy