Levitikus 7
7
Nonzambo detengwido
1Edi yido nompangera dononzambo detengwido: Nzambo ezi kwa pongokerera. 2Simuna sonzambo ezi kusidipagera korwaMuzogo‐zogo gosizambero, oku ava dipagere yimuna yononzambo deswakerero. Honde zaso va zi nagagere komaruha nagenye gane gosizambero. 3Magadi gaso nagenye kugagusa mo, makura va ga zambe kosizambero: magadi gokomusira naga geyi yemezimo 4nonongera nomagadi gado nomagadi nagenye gekehuli. 5Mupristeli a swakererere magadi nagenye kosizambero, zi kare nzambo zonondya kwaHompa. Ozo ngoso nzambo zetengwido. 6Nkenye mugara gomomazimo govapristeli kulya ko tupu. Kuzilira mEvega lyoKupongoka, yeeyi azo kwa pongokerera.
7Nzambo zononzo nezi zetengwido, nadinye mouvali wado, mpangera zado zimwe tupu. Nyama zado zi kare zomupristeli, ogu ana kuzamba nzambo. 8Sipapa sosimuna, esi vana kuzamba nzambo zeswakerero, si kare somupristeli, ogu ana kuzamba nzambo ozo. 9Nkenye nzambo zonombuto, ezi vana kanga mesuga ndi posipana, zi kare zomupristeli, ogu ana kuzizambera Karunga. 10Ano nonzambo nadinye donombuto dokudira kutereka dokuduva nomagadi nedi dokudira kuduva, di kare dovapristeli navenye wonkwaArona. Ado kudivagawinina paheteko zimwe tupu.
Nonzambo dombili
11Nompangera dononzambo dombili dokugava kwaHompa dedi: 12Muntu, nsene ta gava nzambo zangesi morwa?-?kupandura Karunga, a gave kumwe nosimuna, esi vana kukazamba, nzambo zonomboroto da hana muhahu zezi: Nomboroto dononene dousura wokunakuka wokuduva nomagadi gononzwe nampili yikuhuna yokukwita magadi gononzwe ndi nampili yikuhuna yousura wokunakuka yokuduva nomagadi gononzwe. 13Kononzambo odo a gwede ko nomboroto, edi vana kanga domuhahu. 14A zambere Hompa ruha rumwe rwankenye rudi ronomboroto, ru kare sigava sokupongoka. Aro ru kare romupristeli, ogu ana kugusa honde zosimuna, a zi nagagere kosizambero. 15Nyama zosimuna kuzilya lyoolyo ezuva vana kuzizamba, nokutulika ko si zimwe dogoro komungura.
16Muntu, nsene ta gava nzambo zombili asi a sikise mo mugano, ndi ta gava nzambo zemeharo lyamwene, nonzambo dangesi nadinye va di lye ezuva lyoolyo vana kudizamba. Ano nkenye eyi yokuhupa po kuyilya tupu nampili komungura. 17Nye nyama nazinye zokuhupa po dogoro kezuva lyautatu kuziswakerera po ntani. 18Ogu ana kuzilya mezuva lyautatu, Karunga kapi nga tara eho nzambo zendi. Nzambo zangoso kutupu sikwafa, nye kuzitara asi kapi zina kuhuka pampo, ano nkenye ogu ana kuzilya, ta kara ngorooro mononzo dendi. 19Ano nyama, nsene zi guma kwankenye esi sa dira kukuhuka pampo, nokuzilya si, kuziswakerera ntani.
Nkenye ogu ana kuhuka pampo, kulya tupu nyama ozo, 20nye nkenye ogu ana dili kukuhuka pampo, makura ta li ko, kapi hena ngava mu tara asi nage gombunga zaKarunga. 21Hena asi nkenye tupu ogu ana kulya nyama zonzambo ezi, age ana howo kuguma sininke sokunyata pampo, ku kare komuntu ndi kosimuna, kapi hena ngava mu tara asi nage gombunga zaKarunga.
22 Hompa kwa geve nompangera edi dokukwama ko kwaMosesa, 23a di tantere mbunga zaIsraeli asi, nokulya si magadi gonongombe ndi gononzwi ndi goyikombo. 24Magadi gosimuna sokulifira sene ndi sokulikana kosikasama nokugalya si, nye va ga ruganese yininke yapeke. 25Nkenye ogu ana kulya magadi gosimuna, esi vana zamba, si kare nzambo zonondya kwaHompa, kapi hena ngava mu tara asi nage gombunga zaKarunga. 26Nkenye tupu oku nga ka tunga Muisraeli, nokanunu si asi a ture honde zoyidira ndi zosimuna monondya. 27Nkenye ogu ana kuteza veta ezi, kapi hena ngava mu tara asi nage gombunga zaKarunga.
28 Hompa kwa geve nompangera edi dokukwama ko kwaMosesa, 29a di tantere mbunga zaIsraeli asi: Nkenye ogu ana kuzamba kwaHompa nzambo zombili, a gave kwaHompa ruha rwazo rumwe, ru kare sigava sokupongoka. 30A ru tware mwene, ru kare nzambo zonondya. A tware magadi gosimuna kumwe nokagogero, a yi gave kwaHompa, yi kare sigava sokupongoka. 31Mupristeli a swakererere magadi posizambero, nye kagogero taka kara kovapristeli. 32Sirama setako sorulyo sosimuna, oso silyo 33somupristeli, ogu ana kuzamba honde nomagadi gonzambo zombili. 34Kagogero kosimuna ka kare sigava sokupongoka, ano sirama setako sorulyo, oso silyo sokupongoka, esi a gusa Hompa kombunga zaIsraeli, a si pe vapristeli. Eyi yiyo ya va tumbukira yokutunda koVaisraeli, va yi va pe nokomeho oko. 35Oru yiro ruha ronondya rokuzambera kwaHompa. Aro yiro rokugava kwaArona novana vendi wovagara, kutundilira mezuva eli va va pongwere, va kare vapristeli. 36Mezuva olyo, Hompa kwa pangerere mbunga zaIsraeli asi azi va pe ruha oru ronzambo. Ezi yizo mpangera ngazi limburukwa mbunga zaIsraeli nokomeho oko.
37Edi yido nye nompangera dokuhamena nonzambo deswakerero nedi donombuto nedi dononzo nedi detengwido nedi depongoro nedi dombili. 38Hompa kwa gaverere nompangera edi kwaMosesa koNdundu zaSinayi, mwina momburundu, mezuva eli ga tantererere mbunga zaIsraeli, zi gave nonzambo dazo.
© Egwanekerobibeli Lyanamibia 1987, 2003
© Bible Society of Namibia 1987, 2003