Levitikus 26
26
Matungiko morwaelimburuko
(Deut 7:12-24; 28:1-14)
1 Hompa ta tanta asi: “Mwa ha kara novakarunga woyimpempa ndi asi mu lidikire mafano nonongundi domamanya ndi asi mu tjokore mamanya, mu ga tongamene. Ame nyame Hompa Karunga gweni. 2Daneni nawa yipito youkereli waKarunga oku tomu fumadeke Nkongoronzugo zange zoKupongoka. Ame nyame Hompa.
3“One nsene ngomu sikisa mo noveta dange nokulimburukwa konompangera dange, 4ngani mu tumina mvhura poruveze roruwa po, asi mapya ngaga yime muzangu, nokoyitji ngaku yime enyango. 5Muzangu gweni ngagu kara gomunzi unene. Poruveze rokupotagura mandjembere one simpe kuna kuhwaga nombuto deni, ano poruveze rokukuna nombuto deni one simpe kuna kupotagura mandjembere. One ngomu kara nonondya dononzi dokulya pahepero zeni, hena ngomu kara nompora mosirongo seni.
6“Ame ngani mu pa mpora mosirongo seni. One ngomu ponyoka nawa mwa hana woma, morwa nagumwe si ogu nga mu tjilisa. Yikasama nayinye yoyidona ngani yi tjwayura mo mosirongo, noyita si yeeyi kapi ngayi kara mo hena. 7One ngomu funda nonkore deni. 8Vatano womumweni ngava ka funda efere. Ano vefere ngava ka funda womayovhi murongo. 9Ame ngani mu swera, ni mu pe vana wovanzi. Kombinga zange ame ngani sikisa mo nawa malikwatakano gange, aga na paka po kumwe neni. 10Nomuzangu deni ngadi vhuka unene. One nyone kutjisa mo eyi ya hupire ko komuzangu gomukuru‐kuru, mu gwane evango lyokupungura yoyipe. 11Ame ngani tunga mokatji keni moNkongoronzugo zange zoKupongoka. Ano narumwe si ngani mu roroka ndi asi ni mu nyegenye. 12Ame ngani kara Karunga gweni, ano one ngomu kara mbunga zange. 13Ame Hompa Karunga gweni, nyame na mu gusa mosirongo saEgipite, mu dire kukara hena vapika. Ame kwa teza po nomudigo edi da mu remenenene, yiyo na mu ninka, mu vyukilire kugenda, mu kankure nomutwe deni.”
Mafutiro morwauhalimburukwi
(Deut 28:15-68)
14 Hompa ta tanta asi: “One nsene kapi ngomu limburukwa konompangera dange, ngomu gwana mafutiro. 15Ano nsene ngomu taguruka malikwatakano aga na paka po neni, mu nyoke kulimburukwa konoveta nokonompangera dange, 16ame ngani mu futisa. Ame ngani tuma yihuna mokatji keni, ngani mu tumina mauvera gokudira kuvhura kugaverura noyikunkira yokutwiza meho geni nokuseta nomwenyo deni. Ngomu kuna nombuto deni, nye kapi ngamu tunda uwa wongandi, yeeyi nonkore deni ngadi mu funda. Ado ngadi lya po eyi ngomu kuna. 17Ame ngani di mu vyuka, makura one ngava mu funde. Ava va mu nyenga, yiwo ngava mu pangera. One ngau mu kwata woma, tomu ka fira mo nampili kutupu ogu ana kumutjida.
18“Ano nsene ngomu nyoka kulimburukwa nge, nampili ya mu horaukira yininke oyo, ntani nye ngani vhukisa mahepeko gange pwarutano‐naruvali. 19Tani tezagura po etangararo noukeka weni. Kapi ngaku roka hena mvhura. Mapya geni ngaga kukuta ngwendi ukukutu wosivera songoporo. 20Yirugana yeni nayinye yoyidigu kapi ngayi mu tompwera yuma, yeeyi asi momapya geni kapi ngamu yima nombuto, nokoyitji yeni si kapi ngaku yima enyango.
21“Ano nsene ngomu twikira simpe kudivyuka nge ngorooro nokunyoka kulimburukwa kwange, ame ngani vhukisa hena simpe mahepeko geni rutano‐naruvali. 22Tani tumu yikasama yoyidona mokatji keni, ayo ngayi lya po vana veni nokuharaganesa po yimuna yeni, ngayi hupisa po vamwe womumweni wovasesu tupu, makura nonzira deni ngadi kare nye mawoko‐woko.
23“Ano nsene ngomu nyoka kuzuvha dange, mu twikire kurwisa nge, nampili ya mu horaukira yininke nayinye oyo, 24ngani di mu vyuka nye, ni mu futise unene pwarutano‐naruvali kupitakana pwanare. 25Ame tani mu tumine yita, ni mu futise morwakuteza po Malikwatakano getu. Ano nsene ngomu ponga moyitata yeni pokupapara rugami, ngani mu tumina mauvera gokudira kuvhura kuverura, tani mu gava momawoko gononkore deni. 26Ame ngani silika po eyi ayi mu retere nondya, asi vakadi murongo ngava kange mesuga limwe tupu nomboroto nadinye edi ngava kara nado. Awo ngava heteka pokudigaununa, nye apa ngomu mana kudilya nadinye, kapi ngomu kuta.
27“Ano konyima zeyi nayinye, nsene one simpe kuna kutwikira kudivyuka nge, mu nyoke kulimburukwa kwange, 28ame ngani mu handukira, tani gwederere simpe kehandukiro lyeni rutano‐naruvali kupitakana pwanare. 29Nzara zeni ngazi neneperera dogoro tomu ka lira mo vana veni. 30Ame ngani haraganesa po mavango geni nagenye, aga omu tongamenene konondundu, tani zungurura po yizambero yeni yomanganganga oku omu tutumikidire. Ngani zugumina yimpu yeni kontunda zoyikarunga yeni yoyimpempa nokumuneuna unene. 31Ame ngani ka zungurura po yitata yeni, pa ka hupe marunda gelike, tani haraganesa po mavega geni gokutongamenena. Kapi hena ngani tambura nonzambo deni. 32Ame ngani haraganesa po sirongo seni nuunu. Ano nonkore deni edi da si kwata ngagu di buruka kezonauko olyo. 33Ngani mu tumina yita yi mu haraganese moyirongo ya hana si yeni. Sirongo seni ngasi kara mburundu noyitata yeni ngayi zunguruka po. 34-35Makura sirongo ngasi kara nehafo lyonomumvho depwizumuko lyokupongoka, eli mwa nyokere kulisipa. Aso ngasi kara mburundu siruwo esi ngomu kara moupika mosirongo sononkore deni.
36“Ano vakweneni ava ngava hupa mo, ngani ka va zumbilira moyirongo yononkore dawo, ni ka va ture woma wokufa nokutara monomwenyo dawo. One ngali mu dukisa nye nampili ngano ezwi lyosihako sina kurerauka. Ngomu duka ngwendi vava vana kudirapatesa. One ngomu liganda nampili patupu gonkore zeni ogu ana kumutjida. 37One ngomu lironda‐ronda pokulivinda‐vinda moomu ava duka rufuro, nampili patupu gonkore zeni ogu ana kumutjida. Makura kapi ngomu kara hena nononkondo dokusikamena nkenye tupu gonkore zeni. 38One ngomu haraganena moyirongo yava wonkore zeni, ngomu ka vevere mo. 39Ava ngava hupa mo mosirongo sononkore deni, ngava worera mo mokonda zononzo deni nedi dozinyakurweni.
40“Ano ruvharo rweni ngaru tongonona nonzo darwene nedi dozinyakurwaro ava ngava di vyuka nge, tava kondjesa nge, 41ame makura yiyo nina va handukilire, ni va tume koupika mosirongo sononkore dawo. Ano moruhura, apa ngaru linunupika ruvharo rweni, ru zuvhe kukora morwanonzo daro nokurunda mutwe kwaro, 42ntani nye ngani diworoka malikwatakano gange naJakopo naIsaka naAbirahamu. Tani pepeke etumbwidiro lyokugava sirongo kombunga zange. 43Nye muhowo sirongo va si sige, asi si ka vhure kuhafera epwizumuko lyaso lyokupongoka. Awo yiwo kufuta mfuto zina gwana po morwakunyoka noveta nonompangera dange. 44Ano awo, nampili va ka kare siruwo mosirongo sononkore dawo, ame kapi ngani va sigilira ndi asi ni ka va hanwinine mo nuunu. Yangoso ngano ngayi gusisa po malikwatakano gange nawo. Ame nyame Hompa Karunga gwawo. 45Ame tani pepeke malikwatakano gange, aga na paka po kumwe nozinyakurwawo, apa na likidire nomuhoko nadinye nonkondo dange pokugusa mbunga zange mosirongo saEgipite. Yangoso kwa yi ruganenene ame Hompa, asi ngano ni kare Karunga gwawo.”
46Edi nadinye yido nye noveta nonompangera edi ga gavere Hompa kwaMosesa koNdundu zaSinayi kombunga zaIsraeli.
© Egwanekerobibeli Lyanamibia 1987, 2003
© Bible Society of Namibia 1987, 2003