Josuwa 22
22
Josuwa ta tengwida mazimo gokoUpumezuva kwawo
1Makura Josuwa yipo nye ga zigidire womazimo goRubena naGada noVamanase wokoUpumezuva, 2ta va tantere asi: “Muna mana kurugana nayinye eyi ga mu pangera Mosesa muntu gwaHompa, asi yiyo mu rugana, nonompangera dange nado mwa di limburukwa. 3Kapi mwa tarerera vakweneni siruwo nasinye dogoro nakwanayina ngesi. One kwa limburukwa nawa‐nawa konompangera daHompa Karunga gweni. 4Ano ntaantani Hompa Karunga gweni ana pe Vaisraeli vakweneni mpora, moomu ga yi tumbwidira. None tengureni nye kosirongo seni, semesinya mwina korwaUpumezuva waJorodana, esi ga mu pa Mosesa, muntu gwaKarunga. 5Simwe po sesi asi omu limburukwe kosipango nokoVeta, ezi ga mu pa Mosesa, muntu gwaHompa ezi: o hare Hompa Karunga goge, to rugana mpango zendi, to sikisa mo nompangera dendi, to mu limburukwa, makura o mu ruganene nomutjima goge nagunye nomwenyo goge nagunye.” 6-8Josuwa ta va tungike, makura ta va ninki va ze. Apa ga rekerere Josuwa vantu ava va ze kwawo netungiko lyendi, kwa va tanterere asi: “Tomu tengura kweni muna ngawopa unene, noyiunda yoyinene yoyimuna nosisiliveli nongorodo nongoporo nosivera noyikoverero yoyinzi. Ngomu ka pe ko vakweneni eyi muna gusa kononkore deni.”
Mosesa kwa gavere sirongo moBasani koharufa zimwe zezimo lyaManase, nye ezi harufa nkwawo, Josuwa yige ga zi pere sirongo koUtokero waJorodana, kumwe nomazimo peke. 9Makura vantu womazimo goRubena naGada noharufa zezimo lyaManase, tava tengura kwawo. Vaisraeli vakwaawo tava va sigi poSiro, mosirongo saKanani, tava zi kosirongo saGiliyata, sirongo savene esi va gusire, moomu ga va pangerere Hompa mwaMosesa.
Sizambero poJorodana
10Apa va ya sikire poGeliroto poJorodana moKanani, makura tava tungu po emuzambero lyemunene pomukuro. 11Vaisraeli vamwe kwa yi zuvhire, va va tantere asi: “Tareni! Womazimo goRubena naGada noharufa zezimo lyoVamariase wokoUpumezuva vana tungu sizambero poGeliroto, popepi nomururani gwaKanani, koyiha eyi yetu yaJorodana!” 12Apa va yi zuvhire eyi, makura mbunga mudima zaIsraeli tazi ya pongo poSiro, va ze va ka rwise mazimo gokoUpumezuva.
13Mbunga zaIsraeli tazi tumu Pinehasa, munwamupristeli Eliyasara, a ze komazimo goRubena naGada noharufa zezimo lyoVamanase womosirongo saGiliyata. 14Noforomani murongo da zire kumwe naPinehasa, mwankenye ezimo lyaIsraeli zimwe. Nkenye ogu kwa kere esimbi lyepepata pomazimo gaIsraeli. 15Tava wiza mosirongo saGiliyata, tava tantere womazimo goRubena naGada noharufa zezimo lyoVamanase wokoUpumezuva, 16eyi za tente mbunga mudima zaHompa yeyi: “Yinke eyi muna ruganene sininke sosidona mu vyuke Karunga gwaIsraeli? One kuna katukire nye Hompa pokulitungira nyamweni esi sizambero sa! Kapi muna kumukwama hena! 17Diworokeni nzo zopoPeoro, apa ga futisire Hompa mbunga nouvera womukagu. Nelyezuva simpe atu hepa mwarwazo. Ozo nzo nani kapi za gwana? 18Apa ngesi one tomu sigi nye kukwama Hompa ndi? Nsene mu mu katukira naina, mungura age ta handukire mbunga mudima zaIsraeli. 19Ano sirongo seni nsene kapi sa wapera kutongamenena mo, dirukireni mosirongo saHompa omu mwa kara Nkongoronzugo zendi zoMagwanekerero, ngomu tunge mokatji ketu. Nokukatukira si Hompa ndi mu tu katukire ose, mu litungire sizambero sokukambeka kosizambero saHompa Karunga gwetu. 20Diworokeni asi, Akani zaSera, kwa nyokere kulimburukwa kompangera zokuhamena koyininke eyi va tokwerere kezonaguro, makura mbunga mudima zaIsraeli tava zi futisa. Kapisi Akani gelike ga fire asi morwa yige ga zonene.”
21Womazimo goRubena naGada noharufa zezimo lyoVamanase wokoUpumezuva tava limburura masimbi gomapata gaIsraeli asi: 22“Munankondo Karunga! Age yige Hompa! Munankondo Karunga! Age yige Hompa! Age ga yi diva eyi twa yi ruganena eyi, none yi diveni! Nsene asi twa mu katukira, yiyo twa dira kulimburukwa kwaHompa, mwa ha tu siga nomwenyo! 23Nsene asi twa nyoka kulimburukwa kwaHompa, yiyo twa tunga sizambero saamwetu sokuswakererera nonzambo, ndi tu si ruganesese nonzambo donombuto ndi dombili, sigeni Hompa mwene a tu futise. 24Ose eyi kwa yi ruganena asi, komeho oko ruvharo rweni neisi ngaru tantera rwetu asi: ‘One hena pwasinke naHompa, Karunga gwaIsraeli? 25Hompa kwa ninka Jorodana gu kare mururani pokatji ketu none wonkwaRubena naGada. Nayimwe si ko yeni one kwaHompa.’ Makura ruvharo rweni kuvhura nye ru hagekese ruvharo rwetu kutongamena Hompa. 26Yiyo nye twa tungira sizambero, kapisi asi sokuswakerera nonzambo ndi sononzambo dokutoma, 27nye sidiviso sonombunga detu edi mbali nesi sava ngava ka kara ko konyima zetu, asi ose kutongamena Hompa nononzambo detu deswakerero nononzambo dokutoma nononzambo dombili. Eyi kwa yi ninkira asi, ruvharo rweni neisi ngaru tantera ruvharo rwetu komeho oko asi: ‘Nayimwe si ko yeni one kwaHompa.’ 28Yimo nye twa yi gazarera asi, nsene ngayi horoka, ruvharo rwetu ngaru tante asi: ‘Tareni! Ozinyakurwetu kwa rugene sizambero sokufana saHompa. Nye aso kapisi sokuswakererera nonzambo ndi sononzambo dokutoma, nye sidiviso sava vetu nava veni.’ 29Yi humbuke oyo yokukatukira ose Hompa, ndi yokuhageka kumukwama ntaantani, asi tu tunge sizambero sokuswakererera nonzambo ndi sononzambo donombuto ndi dokutoma. Kapi twa tunga ko hena sizambero naso peke, sa hana asi sizambero saHompa Karunga gwetu, esi sa kara komeho zoNkongoronzugo zendi zomagwanekerero.”
30Mupristeli Pinehasa novagendesi murongo ava ga kere nawo nomasimbi gomapata gaIsraeli, tava zuvhu eyi ga tente mazimo goRubena naGada naManase, makura tadi va dama. 31Pinehasa, munwamupristeli Eliyasara ta tantere wonkwaRubena naGada nonkwaManase asi: “Ntaantani tuna yi diva asi Hompa nose ana kara, morwa kapi mwa katukira Hompa. Muna parura mbunga zaIsraeli kefutiso lyaHompa.”
32Makura oPinehasa novagendesi tava sigi wonkwaRubena nonkwaGada mosirongo saGiliyata, tava tengura koKanani, kombunga zaIsraeli, va ka va tantere. 33Eyi va ka tente, ya damesere nomutjima dombunga zaIsraeli. Tava pandura Karunga, makura kapi hena ngava uyunga yokuza koyitata va ka hanagure sirongo esi va kere wonkwaRubena nonkwaGada. 34WonkwaRubena nonkwaGada tava ruku oso sizambero asi ‘Mbangi’, yeeyi awo kwa tente asi: “Azo yizo mbangi kwanatuvenye asi, Hompa yige Karunga.”
© Egwanekerobibeli Lyanamibia 1987, 2003
© Bible Society of Namibia 1987, 2003