JOWERA 2
2
Simbonde ngerondoro lyezuva lyaHompa
1Sikeni mbendo; tooneni katenda poSiyoni,
ndundu zaKarunga zokupongoka.
Kankama, ove mbunga zaJuda!
Ezuva lyaHompa ntaantani li wize.
2Ngali kara ezuva lyomundema nodovera,
ezuva lyegcigci nomaremo.
Mbunga zonene zovakwayita
vasimbonde kuna kuza komeho
moomu agu lihanene mundema konondundu.
Kutupu muhoko ogu gwa heteka po
ako hena kapi ngaku kara ogu
nga gu heteka po.
3Age kulya yimeho ngwendi mundiro.
Komeho zendi sirongo ngwendi
sipata saEdeni,
nye konyima zendi mburundu zanywe.
Kutupu yokumusekuna.
4Kumutara ngwendi nonkambe;
age kuduka ngwendi nonkambe doyita.
5Nsene ta vatauka kondungu zonondundu
kuhagara ngwendi turukara toyita;
kucukauka ngwendi wayi pomundiro.
Age kuna fora mutete ngwendi
mbunga zonene zovakwayita
zina liwapaikire kurwa.
6Eyi ana kuza ngoso komeho,
nkenye ogu tau mu gwana woma;
yipara nayinye tayi kisumuka.
7Awo kurwana ngwendi vanayita;
kuronda makuma ngwendi vakwayita.
Namunye kuvyukilira kugenda
nokuzapuka si
8ndi asi a zundure mukwawo.
Ta piti mokatji komapopero,
nye nayimwe si yokumukandana.
9Ta homokere mo mositata;
ta duka a ronde makuma;
ta rondo nonzugo a hwililire
pomakende ngwendi vawidi.
10Mokugenda kwendi evhu
kuna kukankama;
eguru kuna kumenga.
Ezuva nokwedi kuna kusovagana,
nombungururu kapi dina
kutema hena.
11 Hompa ta ndunduma a gave
mpangera kombunga zendi zovakwayita.
Vakwayita ava ava mu limburukwa
vanzi, awo vanankondo.
Nani udigu musi ezuva olyo lyaHompa!
Yilye ogu nga li yoworoka?
Ekorangedo lyelitezururo
12 Hompa ta tanta asi:
“Nye nampili ngoso,
litezurureni nawa‐nawa, mu
tengwire kwange muna dilire
oku tomu lili nokukwenauka.
13Sigeni nomwenyo deni
dina tekauka di horore ruhodi,
kutavagura yikoverero yeni kwelike
kapi kuna gwana.”
Tengwireni kwaHompa Karunga gweni.
Age muzavereli ga zura nkenda;
age kuzuvha kukora, ta sikisa
mo matumbwidiro gendi,
age ga liwapaikira nare
kudongwenena po
kapisi kupangura kwelike.
14Mpamwe Hompa Karunga goge
nga rundurura magazaro gendi
nga ku ragopeke nokuvhukisa
muzangu goge, makura ngo vhure
kumuzambera yilya novhinyu.
15Fudireni mbendo kondundu
zaSiyoni, gaveni nompangera
dokulidilika, one mu ninke sigongi sokupongoka!
16Pongaikeni vantu one mu va
wapaikire sigongi sokupongoka,
twareni ko vakurupe
pongaikeni vanona
rambangako novakeke vaava
nava wononkwara donompe nawo
va sige nonzugo dawo va wize.
17Vapristeli ava ava ruganene Hompa
pokatji kosizambero
nerungavero lyontembeli
va lire, awo va kanderere.
“Hompa, tara mbunga zoge eho.
Wa ha sigilira nomuhoko dapeke
di tu dine nokutuswaura
mokuuyunga asi:
‘Karunga gweni oku ana kara
hena kupi?’ ”
Hompa ta wapeke ewogo lyosirongo
18Makura Hompa ta horora
yokuhamena kosirongo sendi;
age kwa zuvhilire nkenda
mbunga zendi.
19Age ta va limburura asi:
“Ntaantani ame tani ka mu pa yilya
novhinyu nomagadi gononzwe,
makura ngomu kute.
Nomuhoko dapeke kapi ngadi
mu dina hena.
20Ame ngani gusa po vakwayita
vasimbonde ava va tunda koMuzogo
makura ngani tjidire vamwe po momburundu.
Mbunga zokomeho ngani zi tjidira
mEfuta lyoKufa, ano ezi
zokonyima mEfuta lyoPokatji.
Yimpu yawo ngayi nuka.
Ame ngani va haraganesa,
morwanayinye
eyi na mu ruganena.
21“Sirongo ove, wa ha tjira
nye hafa, ove o lilikide
morwanayinye eyi
ga ku ruganena Hompa.
22Yinamwenyo one, mwa ha tjira,
maliro gana kara nowayi woutarara
yitji yina yimi yiyimwa
ekuzu nomandjembere yina vhuka.
23“Mbunga ove zaSiyoni, lilikida,
morwaeyi ga ku ruganena
Hompa Karunga goge.
Age kwa ku pa mvhura
zokwenye pauhungami wendi,
age kuna ku rokesere mvhura
zopokufu nezi zopokurombo
kupitakana zanare.
24Pomavega gomarupare ngapa
zura yilya
makero aga ga kara pepi
nomavega gokukamena
ngaga pupa vhinyu nomagadi gononzwe.
25Ame ngani ku tengwidira
eyi wa zumbanesa
monomvhura edi ga lire madugi
gasimbonde muzangu goge.
Nyame na tumine vakwayita ava
va ya ku rwise.
26Ano nye ntaantani ngo kara
neyi yoyinzi yokulya, to kuta.
Ove ngo hamberere Hompa
Karunga goge,
ogu ga ku ruganena yininke yokutetura.
Mbunga zange kapi ngava zi
swaura hena.
27Ove Israeli yipo nye ngo divira
asi ame mokatji keni na kara.
Ame Hompa, nyame Karunga gweni
kutupu hena gwapeke.
Mbunga zange kapi ngava zi
swaura hena.
Ezuva lyaHompa
28“Konyima zeyi,
ame ngani powomwena
mpepo zange nkenye ogu;
vana veni wovagara nava wovakadi
ngava divisa mbudi zange;
vakurupe veni ngava rota nonzodi.
Ano vadinkantu veni,
ngava mona mamoneko.
29Posiruwo tupu sooso, ame ngani
powomwena mpepo
zange novapika vaava,
vagara novakadi.
30“Ezuva olyo ngani gava
marondoro meguru nepevhu,
ezuva olyo ngaku kara etjiko
lyohonde nomundiro
nomaremo gomusi.
31Ezuva ngali sovagana
nokwedi ngaku lisitunuka
kokugeha ngwendi honde
alyo ezuva lyenene lyokutjilisa
lyaHompa lya hana kusika.
32Nye navenye ava ngava kuga
kwaHompa a va kwafe,
ngava paruka,
moomu ga tanta Hompa asi:
‘Vamwe womoJerusarema ngava
yomboroka mo;
ava na horowora ngava kara nomwenyo.’ ”
Currently Selected:
JOWERA 2: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
