Jakopo 2
2
Walye omu zi noyikara yovantu
1Vakwetu, one kwa pura Hompa Jesus Kristusa, Hompa gouyerere; walye omu zi noyikara yovantu. 2Nsene muna pongo, kuvhura pa wize muntu gokudwara nolinga dongorodo noyikoverero yokurerema, makura pa wize hena gohepere gosikoverero sokunyata. 3Ano ove makura ntene o tara po nye ogu goyikoverero yokurerema, o mu tantere asi, “Yo hingire apa posipundi sosiwa,” muhepwe makura o mu tantere asi, “Ka sikame pena,” ndi asi, “Yo hingire apa pevhu popepi nosipundi sange,” 4nani kapisi yigo malitondororo googo, one kupangura payigazo yoyidona?
5Purakeneni, vakwetu ava na hara. Karunga nani kapi ga horowora vahepwe wouzuni ou, va kare nongawo demepuro novapingi wosirongo esi ga tumbwidira ava va mu hara? 6Nye vahepwe kuvarugana yoyidona. Nongawo nani kapisi yido adi va hakana, tadi va heta kombara? 7Nani kapisi yido adi swaura edina lyenene eli ava mu tumbwisa asi vakriste.
8Ano nsene mu sikisa mo Veta zoUntungi waKarunga, moomu va tjanga asi, “O hare mukweni moomu wa lihara nyamoge,” ngoso kuhungika omu hungike. 9Nye nsene mu za noyikara yovantu, tomu tura nzo, makura Veta tazi mu pangura asi one vanzoni vazo. 10Yeeyi nkenye ogu a sikisa mo yipango yimwe yomoVeta, nye a limbike po sipango simwe, makura nayinye ana yi zono. 11Yeeyi ogu ga tanta asi, “Walye o hondere,” yige hena ga tanta asi, “Walye o dipaga.” Ano nampili kapi o hondere, nye mokudipaga kudipaga, makura o muzoni goVeta. 12Omu uyunge oku tomu rugana ngwendi vava ngazi pangwisa Veta zokumanguruka. 13Yeeyi epanguro lyaKarunga kapi ngali fira nkenda ava ava dili kufira nkenda vakwaawo; vanankenda kulitanga va dine epanguro.
Epuro noyirugana
14Vakwetu, yinke nayi ku kwafa, nampili o tante asi, “Ame kwa kara nepuro,” nye ove kapi wa paka yirugana? Epuro lyangoso nani kuparura muntu? 15Nsene pa kara mukweni gomugara ndi gomukadi gongaki, age hena da mu pira nondya dankenye ezuva, 16makura kuvhura nye kumutantera asi, “Zende nombili, o ka livive, ove hena o ka kute,” ove wa hana kumupa eyi rwa hepa rutu, ndi? Yinke nye nayi kwafa? 17Nepuro nalyo ngosikwawo, nsene kapi lya paka yirugana, lya fa.
18Gumwe kuvhura a tante asi, “Ove kwa kara nepuro, ame kwa kara noyirugana. Likida nge epuro lyoge lya pira yirugana, ame name ni ku likidise epuro lyange koyirugana.” 19Wa pura asi Karunga gumwe tupu makura. Hawe, uhunga, nye nompepo donondona nado da yi pura, ado hena kukankama. 20Egova ove, kapi wa yi diva asi, epuro lyelike lya hana yirugana, kutupu sikwafa? 21Nani Abirahamu, zinyakurwetu, kapi va mu hungamekesesere koyirugana, apa ga tulire munwendi Isaka posizambero asi a mu zambere? 22Ono yi mono sa asi, epuro kwa rugene kumwe noyirugana yendi, makura epuro yiyo lya sikilire mo koyirugana? 23Matjangwa ga sika mo, aga aga tanta asi, “Abirahamu kwa pulire Karunga, makura tava yi mu varwilire kouhungami.” Yipo ga tunda va mu tumbure asi mukwawo zaKarunga. 24Muna yi mono sa nye asi muntu kumuhungamekesera moyirugana, kapisi mepuro mwelike?
25Ndi Rahaba, gomuhondedi, nani kapi va mu hungamekesesere koyirugana, apa ga horekere nondadi, makura ta di ninki di ze nonzira peke?
26Moomu tupu rwa kara rutu, nsene ru pira mwenyo, runa fu, nepuro nalyo nsene li pira yirugana lya fa.
© Egwanekerobibeli Lyanamibia 1987, 2003
© Bible Society of Namibia 1987, 2003