JESAYA 64

1Inke yokudilira kubwarura eguru o wize, o hegumuke? Nondundu kuvhura di ku mone di kankame koutjirwe. 2Awo kuvhura va menge ngwendi mema gana kuhekauka pediko lina gehe. Wiza, o horore nonkondo doge kononkore doge, nonomuhoko di menge moyipafi yoge! 3Pwa kere ruveze oru wa wizire o rugane yitetu eyi twa dilire kundindira. Nonondundu da ku mwene, makura tadi linyunganga, morwautjirwe. 4Nagumwe si ogu ga mona ndi ga zuvha Karunga gokukufana, ogu o ruganene yininke yangesi, ava va huguvara. 5Ove kutambura ava ava gwana ehafo, morwakurugana uhungami, tava diworoka, omu wa hara va kare. Ove kwa tu handukira, nye ose tatu twikire ngorooro kuzona mokurugana udona, kutunda tupu pomaruveze gozinyakurwetu. 6Natuvenye vanzoni twa kara noyirugana yetu narunye yokunyata. Ose kuna fana yihako ya kukuta, eyi azi reragura mpepo, morwanonzo detu. 7Nagumwe si a tengura koge mokukukanderera ndi asi a papare ekwafo. Ove ono tu lihoreke yiyo ono tu zumbu, morwanonzo detu.

8Nye ove nyove guhyetu, Hompa. Ose kwa fana ngwendi erova, ove ngwendi muhongi. Ove nyove wa tu unga, 9yipo nye wa ha tu handukira ndi asi o pungure nonzo detu dogoro narunye. Ose mbunga zoge, tu fira nkenda. 10Yitata yoge yokupongoka kuna fana ngwendi mburundu, ano Jerusarema kuna kara mapuku. 11Ano ntembeli zetu za pongoka nomavango gomawa aga ngava ku fumadekere ozinyakurwetu, mundiro gwa ga haraganesa po. Mavega aga twa kara nago ga zonauka po. 12Hompa, nani yangesi kapi yi ku tukukise? Kapi no rugana po yuma, to tu tarerere ngorooro tu hepe kupita pweyi tatu vhuru kulididimikira ndi?

Currently Selected:

JESAYA 64: KWN

Highlight

Copy

Compare