JESAYA 61
61
Mbudi zongwa zemanguruko
1Mupangeli Hompa
kwa zwida nge mpepo zendi.
Age kwa horowora nge
yiyo ga tuma nge ni tware
mbudi zongwa komapongo,
ni verure mutjima gwanyanyauka,
ni zuvhise emanguruko lyononkwate
nezegururo lyava womodorongo.
2Age kwa tuma nge ni sanseke
asi siruwo sina siki mo
sokuparura Hompa mbunga zendi
a funde nonkore dazo.
Age kwa tuma nge ni hengagwide
navenye ava vana kulira,
3ni gave kwava vana kulira moSiyoni
ruhafo nepemburo pevega lyeguwo,
rusumo rwehamberero pevega lyoruhodi.
Awo ngava fana ngwendi yitji
eyi ga tapeka mwene Hompa.
Navenye ngava rugana youhunga,
Karunga ngava mu fumadekera
eyi ga rugana.
4Awo ngava tungurura yitata eyi
ya kara siruwo sosire
nondambo domarunda.
5Ove mbunga zange, vanayirongo
ngava ku ruganena.
Ngava kara vasita woyiunda
yoge yononzwi
tava limi mapya goge, oku tava
wapeke yikunino yoge yomandjembere.
6One ngomu divikwa asi
vapristeli vaHompa,
vakereli vaKarunga gwetu.
One ngomu lya emona lyonomuhoko
tomu litumbu asi lina kara lyeni,
7nomuga neswau lyeni lina haga.
One ngomu kara mosirongo sanyamweni,
emona lyeni ngali vhuka pavali;
ehafo lyeni ngali karerera narunye.
8 Hompa ta tanta asi:
“Ame kwa hara uhungami
yiyo na nyenga ehepeko nomahaka.
Ame ngani pa mbunga zange
mfeto zazo noulimburukwi
tani paka po egwanekero
lyanarunye kumwe nawo.
9Awo ngava fumana pokatji konomuhoko
nkenye ogu nga va mona
nga diva asi awo mbunga ezi
na tungika.”
10Jerusarema kuna kuhafera
eyi ga rugana Hompa.
Age kuna fana mufuko ogu ana
dwarerere sipito sendi sononkwara.
Karunga ga mu dwareka eparu nefundo.
11Moomu tupu azi mene mbuto
nye tazi kuru,
Mupangeli Hompa nage yimo
nga parura mbunga zendi,
Ano nomuhoko nadinye
ngadi mu fumadeka.
Currently Selected:
JESAYA 61: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
