JESAYA 56

Mbunga zaKarunga ngazi paka mo nomuhoko nadinye

1 Hompa ta tantere mbunga zendi asi: “Ruganeni yousili neyi ya hungama, yeeyi ntaantani ni mu parure. 2Ame ngani tungika ava ava dameke nkenye apa Esabata, kapi ava li zono. Ame ngani tungika ava ava dili kurugana udona.”

3Munayirongo ogu ga lipakerera nombunga zaHompa ga ha tanta asi: “Hompa kapi nga yi tara nge yokutongamena mombunga zendi.”

Mugara ogu va rutura ga ha gazara nampili kanunu asi, morwa age kapi a vhuru kureta vana, nokuwapasi a kare gombunga zaKarunga. 4Hompa kuna kutantera mugara ogo asi: “Nsene o fumadeka nge pokudameka Esabata, o rugane yokuhafesa nge oku to sikisa mo egwanekero lyange, 5edina lyoge ngano ngava li diworoka montembeli zange nomokatji kombunga zange ngwendi nyove ogu wa reta vana wovagara nava wovakadi. Ove kapi ngava ku divara nampili kanunu.”

6 Hompa ta tantere vanayirongo ava va kara wombunga zendi, ava va mu hara oku tava mu kerere, ava ava dameke Esabata, tava sikisa mo nawa‐nawa egwanekero lyendi asi: 7“Ngani mu twara koSiyoni, kondundu zange zokupongoka, tani mu pe ehafo monzugo zange zomakanderero, makura ngani tambure nonzambo dange edi ngomu zambera posizambero sange. Ntembeli zange ngava zi tumbura asi nzugo zomakandererero zovantu wonomuhoko nadinye.”

8Mupangeli, Hompa ogu ga gusa mbunga zendi moupika, kwa yi tumbwidira asi nga reta ko hena vamwe ngava lipakerere nawo.

Vagendesi vaIsraeli tava va pangura

9 Hompa ta tantere nomuhoko dovanayirongo di wize ngwendi yikasama di ya lye po vantu vendi. 10Age ta tanta asi: “Vagendesi navenye ava ngano ava rondora vantu vange, va twika! Awo neisi va diva. Awo kwa fana ngwendi nombwa edi adi nomene, nye kapi adi huda — awo kurara tupu nokurota nonzodi makura. Ee, yireru omu va hara kuponyoka! 11Awo hena kwa fana nombwa dedowo edi adi dili kukuta nampili nakauke. Vagendesi ava kapi va diva yuma. Nkenye ogu kurugana tupu moomu ana yi harere, ta papara uwa wamwene makura. 12Nonkorwi edi kuuyunga asi: ‘Tu guseni vhinyu tu nweni, moomu tuna harere, asi mungura ngatu zuvheni nawa kupitakana naina!’ ”

Currently Selected:

JESAYA 56: KWN

Highlight

Copy

Compare