JESAYA 53
53
1Vantu tava limburura asi:
“Yilye ogu ga huguvara
eyi tuna kuzuvhisa ntaantani?
Nogu ga mona kuwoko
kwaHompa mweyi yilye?
2Age kwa hoka ngwendi
sihokweredi kosipara saHompa,
ngwendi ndandani zokutunda
mevhu lyekukutu.
Kapi ga peke mutaro ndi ewapo
asi tu mu tare,
kapi ga peke sipa asi tu mu hare.
3Vantu ngava mu swaura,
tava mu zumbu,
mugara gorunyando age kwa yova,
ngwendi gogu asi vantu
kulikudumika koyipara
asi va dire kumutara,
ngava mu swaura,
kapi ngava mu tara eho.
4“Nye age ta litwike mauvera getu,
marunyando getu ga simba.
Nye ose ngatu mu tara asi
Karunga ga mu handukira,
ga mu toona yiyo ga mu hepeka.
5Nye age mayipiko getu
ga mu wurwisa,
age kwa mu sansununa
morwanonzo detu.
Ehandukiro yige va li kandwilire
asi ose tu gwane mbili,
ano moyironda yendi
yimo twa gwana ukangure.
6Ose natuvenye kwa pukire
ngwendi nonzwi,
nkenye ogu kwa ligenderere
nonzira zendi,
nye Hompa ga mu twikire
nonzo detu natuvenye.
7“Age kwa mu hepeka,
nye ta ligava,
age kapi ga zahwire kana kendi,
moomu azi kara nzwi vana kutwara
kosidipagero ndi ngwendi nzwi
zina mwena pomukuruli gwazo,
nhi, nage kapi ga zahwire kana kendi.
8Ehepeko nepanguro
yiyo ya mu twaresere konomfa,
nye yilye gepupi lyendi
ga yi gazarere?
Yeeyi kwa mu gusire mo
mosirongo sovanamwenyo,
morwaunzoni wombunga zange
yiyo va mu handukilire.
9Ntoko zendi ezi va mu pere, zopovadinikarunga,
nye ponomfa dendi pongawo
ga ka kere,
morwa age kapi ga zonene,
noyimpempa si kapi ya kere mo
mokana kendi.”
10 Hompa ta tanta asi:
“Nyamwange na yi here asi
a nyande;
nomfa dendi kwa kere nzambo
zokureta edongonono lyononzo.
Yipo nye nga monena nontekuru dendi;
age nga kara nomwenyo gomure,
ano eharo lyange mwendi
ngali sikilira mo.
11Ngaru pwa runyando,
ta kara hena noruhafo;
age nga yi diva asi
kapi ga nyanda mawoko‐woko.
Mukereli gwange gokuligava,
ogu na tokomena,
nga simba ehandukiro lyovanzi
ano mwarwendi
ngani va dongwenena po.
12Yipo nye ngani mu pera evega lyefumano,
evega mokatji kovanene novanankondo.
Age kwa gava mwenyo gwendi,
tava mu varwilire kosigwana sovanzoni.
Age kwa gusa evega lyovananzo wovanzi,
ta kanderere asi
va va dongwenene po.”
Currently Selected:
JESAYA 53: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
