JESAYA 50
50
1 Hompa kuna kutanta asi:
“One kuna kugazara asi
vantu vange kwa va tuma va ze
ngwendi mugara ogu
ana zumbu mukadi ndi?
Nombapira domalizumbiso
oku dina kara kupi nye?
One kuna kugazara asi
ame kwa mu randesa koupika
ngwendi mugara ogu ana kurandesa
vana vendi ngovapika ndi?
Hawe, one kwa zira koupika
morwanonzo damweni, one kwa
mu tuma morwaunzoni weni.
2“Vantu vange yinke nye ya va
vhulira kulimburura, apa na
zire kwawo ni ka va parure?
Eyi va dilire kulimburura
apa na va zigidire hena yinke?
Nani ame kutupu ko nonkondo
dokuvaparura ndi?
Ame kuvhura ni kukutike efuta
netugumukiro nokuninka
nomukuro di kare mburundu,
yipo nomfi edi da kara mo di fe,
morwa kupira mo mema.
3Ame kuvhura ni sovadeke eguru
ngwendi moomu aga kara po
malirankali govafe.”
Elimburuko lyomukereli gwaHompa
4 Hompa, Mupangeli ana rongo nge
eyi nani uyunga,
yipo ni vhure kunkondopeka ava
vana roroka.
Nkenye ngurangura age
kuradipika nge ni ka zuvhe eyi
na ka ronga nge.
5 Hompa ana pe nge ukonentu,
ame kapi nina u rwisa
ndi asi ni mu nyoke.
6Ame kwa gava mugongo gwange
kwava ava toona nge.
Ame kapi na va silika apa va
zuvhisa nge yoyidona pokudura
nohuki dononzwedu dange
nokufizira nge mazeze kosipara.
7Nye nonkango dawo donondona
kapi adi vhuru
kuzuvhisa nge yoyidona,
yeeyi asi Hompa Mupangeli
kupa nge ekwafo.
Ame kuligava tani lididimike,
yeeyi nina diva asi, kapi ngava
ka fisa nge nomuga,
8yeeyi Karunga pepi name
ana kara,
age ta likida nge asi koutupu ko nonzo.
Pweli tupu ogu gokulipepekera nge?
Tu zeni natuvenye kepanguro!
Mu sigeni a rete muheti gwendi!
9 Hompa, Mupangeli mwene
a gamene nge — ogu na vhura
nye kupa nge nzo hena yilye?
Varundili vange navenye
ngava dongonoka po,
ngava komba po
ngwendi yidwara eyi yina likana koyimbumburu.
10Namuvenye ava omu fumadeke
Hompa nokulimburukwa
kononkango domukereli gwendi,
nzira ezi omu gendi ngava zi sovadeka
nye huguvareni mwaHompa,
mu zegame Karunga gweni.
11Namuvenye ava omu gazara
kuhanagura po vakwaneni
nyaamweni ngava haraganesa po
nomagazaro gaamweni gomadona.
Hompa mwene yige nga ninka
eyi yi horoke po.
One ngomu kara moudigu
woyihuna yoyinene.
Currently Selected:
JESAYA 50: KWN
Highlight
Copy
Compare
Share
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
