Hagayi 2
2
Efumano lyontembeli zompe
1Mezuva lyonomurongo mbali nalimwe lyokwedi kwautano‐nauvali komumvho googo, Hompa ta uyungire hena momuporofete Hagayi. 2Age kwa tanterere Hagayi a tantere Serubabeli, ngoronera gwaJuda, naJosuwa, mupristeli gomunene, novantu asi: 3“Mokatji keni nye mweli tupu ogu ana kudiworoka ewapeko lyontembeli zanare? Apa ngesi ngapi nye omu zina fana? Kuvhura zi moneke ngwendi sininke somawoko‐woko momeho geni. 4Nye ntaantani, kareni nomupampi namuvenye. Ruganeneni yirugana, morwa ame neni na kara. 5Apa mwa tundire moEgipite, ame kwa mu tumbwidilire asi ngani kara neni dogoro narunye. Nelyezuva simpe neni na kara, ano mwa ha tjira.
6“Kapisi siruwo ko sosire, makura ngani kankamese eguru nevhu, sirongo nefuta. 7Ngani zugumina kwina nomuhoko nadinye, emona lyawo ngava li reta omu, ano ntembeli ngazi zura ugawo. 8Sisiliveli nongorodo zomouzuni zange. 9Ntembeli zompe ngazi wapa unene kupitakana zanare, ano omo yimo ngani pera vantu vange erago nompora.” Hompa Munankondo nadinye yige ana yi uyunga.
Muporofete ta pura vapristeli
10Momazuva nomurongo mbali nagane mokwedi kwautano‐naune momvhura zauvali zouhompa waDaliusi, Hompa Munankondo nadinye ta uyungisa hena muporofete Hagayi. 11Ta tanta asi: “Pura vapristeli mayere gomoVeta epuro eli asi: 12Gazara asi gumwe kuvhura a guse ponzambo ntumba zokupongoka, makura ta zi vhunyine perwakani lyendi. Makura olyo erwakani lyendi nsene a li guma komboroto, nokonondya dokupya, novhinyu, nomagadi gononzwe, ndi nkenye tupu edi nondya, makura ta li pongora nye nodo nondya ndi?”
Apa ga li pulire epuro eli, vapristeli tava limburura asi: “Hawe.”
13Makura Hagayi ta pura asi: “Gazara asi mugara ta linyateke pokukwata kosimpu. Makura nsene a guma konondya edi, nado tadi nyata nye ndi?” Vapristeli tava limburura asi: “Nhi.”
14Makura Hagayi ta tanta asi: “Vantu womuhoko ogu nawo yimo nanayinye eyi ava gwana, nayo ngosikwawo; ano nayinye eyi ava zambere kosizambero kwa nyata.”
Hompa ta tumbwidire etungiko lyendi
15 Hompa ta tanta asi: “Kapi muna kumona eyi yina kumuhoraukira ndi? One simpe kapi muna tameke kutungurura ntembeli, 16ngomu zi kondambo zorukokotwa, tomu gazara asi mu gwane po nokilogarama mafere gavali, nye kugwana po efere limwe tupu. Tomu zi kosipako sovhinyu, mu ka vhete mo nolita efere, kukagwana mo nomurongo ne tupu. 17Ame kwa tumine nompepo doupyu nakamanya, yi hanagure nayinye eyi ngomu kambadara kukuna, nye one nokulitezurura si. 18Naina ezuva lyonomurongo mbali nane lyokwedi kwautano‐naune, ezuva eli lya pwa etateko lyontembeli. Kutunda apa tarereni nye eyi ngayi horoka. 19Nampili ngomu runa pili rukokotwa, ano yindjembere nomaukuzu nonopomegaranate nomauzwe kapi yina kuyima, nye kutunda apa ngani mu tungika tupu.”
Etumbwidiro lyaHompa kwaSerubabeli
20Mezuva lyoolyo lyonomurongo mbali nagane kokwedi, Hompa ta pe Hagayi mbudi zauvali 21zaSerubabeli, ngoronera gwaJuda ezi asi: “Ame pokunyunganga eguru nevhu na kere 22ngani kandura po mauntungi nononkondo dago. Ngani zonagura turukara toyita novarondi vato; nonkambe ngadi fa, ano varondi vado ngava lidipaga vene‐navene. 23Mezuva olyo ngani ku gusa ove Serubabeli, mukereli gwange, makura tani ku tura o pangere medina lyange. Ove nyove na horowora.” Hompa Munankondo nadinye yige ana yi uyunga.
Currently Selected:
Hagayi 2: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
Hagayi 2
2
Efumano lyontembeli zompe
1Mezuva lyonomurongo mbali nalimwe lyokwedi kwautano‐nauvali komumvho googo, Hompa ta uyungire hena momuporofete Hagayi. 2Age kwa tanterere Hagayi a tantere Serubabeli, ngoronera gwaJuda, naJosuwa, mupristeli gomunene, novantu asi: 3“Mokatji keni nye mweli tupu ogu ana kudiworoka ewapeko lyontembeli zanare? Apa ngesi ngapi nye omu zina fana? Kuvhura zi moneke ngwendi sininke somawoko‐woko momeho geni. 4Nye ntaantani, kareni nomupampi namuvenye. Ruganeneni yirugana, morwa ame neni na kara. 5Apa mwa tundire moEgipite, ame kwa mu tumbwidilire asi ngani kara neni dogoro narunye. Nelyezuva simpe neni na kara, ano mwa ha tjira.
6“Kapisi siruwo ko sosire, makura ngani kankamese eguru nevhu, sirongo nefuta. 7Ngani zugumina kwina nomuhoko nadinye, emona lyawo ngava li reta omu, ano ntembeli ngazi zura ugawo. 8Sisiliveli nongorodo zomouzuni zange. 9Ntembeli zompe ngazi wapa unene kupitakana zanare, ano omo yimo ngani pera vantu vange erago nompora.” Hompa Munankondo nadinye yige ana yi uyunga.
Muporofete ta pura vapristeli
10Momazuva nomurongo mbali nagane mokwedi kwautano‐naune momvhura zauvali zouhompa waDaliusi, Hompa Munankondo nadinye ta uyungisa hena muporofete Hagayi. 11Ta tanta asi: “Pura vapristeli mayere gomoVeta epuro eli asi: 12Gazara asi gumwe kuvhura a guse ponzambo ntumba zokupongoka, makura ta zi vhunyine perwakani lyendi. Makura olyo erwakani lyendi nsene a li guma komboroto, nokonondya dokupya, novhinyu, nomagadi gononzwe, ndi nkenye tupu edi nondya, makura ta li pongora nye nodo nondya ndi?”
Apa ga li pulire epuro eli, vapristeli tava limburura asi: “Hawe.”
13Makura Hagayi ta pura asi: “Gazara asi mugara ta linyateke pokukwata kosimpu. Makura nsene a guma konondya edi, nado tadi nyata nye ndi?” Vapristeli tava limburura asi: “Nhi.”
14Makura Hagayi ta tanta asi: “Vantu womuhoko ogu nawo yimo nanayinye eyi ava gwana, nayo ngosikwawo; ano nayinye eyi ava zambere kosizambero kwa nyata.”
Hompa ta tumbwidire etungiko lyendi
15 Hompa ta tanta asi: “Kapi muna kumona eyi yina kumuhoraukira ndi? One simpe kapi muna tameke kutungurura ntembeli, 16ngomu zi kondambo zorukokotwa, tomu gazara asi mu gwane po nokilogarama mafere gavali, nye kugwana po efere limwe tupu. Tomu zi kosipako sovhinyu, mu ka vhete mo nolita efere, kukagwana mo nomurongo ne tupu. 17Ame kwa tumine nompepo doupyu nakamanya, yi hanagure nayinye eyi ngomu kambadara kukuna, nye one nokulitezurura si. 18Naina ezuva lyonomurongo mbali nane lyokwedi kwautano‐naune, ezuva eli lya pwa etateko lyontembeli. Kutunda apa tarereni nye eyi ngayi horoka. 19Nampili ngomu runa pili rukokotwa, ano yindjembere nomaukuzu nonopomegaranate nomauzwe kapi yina kuyima, nye kutunda apa ngani mu tungika tupu.”
Etumbwidiro lyaHompa kwaSerubabeli
20Mezuva lyoolyo lyonomurongo mbali nagane kokwedi, Hompa ta pe Hagayi mbudi zauvali 21zaSerubabeli, ngoronera gwaJuda ezi asi: “Ame pokunyunganga eguru nevhu na kere 22ngani kandura po mauntungi nononkondo dago. Ngani zonagura turukara toyita novarondi vato; nonkambe ngadi fa, ano varondi vado ngava lidipaga vene‐navene. 23Mezuva olyo ngani ku gusa ove Serubabeli, mukereli gwange, makura tani ku tura o pangere medina lyange. Ove nyove na horowora.” Hompa Munankondo nadinye yige ana yi uyunga.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003