Exodus 6
6
1Nye Hompa ta limburura Mosesa asi: “Ntaantani o mone eyi nani ruganena Farawo. Yeeyi Munankondo nga mu sininika a va sige va ze, ano age ngani mu sininika a va tjide mo mosirongo sendi.”
Karunga ta zigida Mosesa
2Ga ninka Karunga ta tantere Mosesa asi: “Nyame Hompa. 3Ano ame kwa monekera oAbirahamu naIsaka naJakopo asi ni Karunga Munankondo nadinye, nye mokuninka asi ni va horwere edina lyange asi yilyo Hompa, mpaga. 4Ame hena kwa peke po malikwatakano nawo asi tani va pe sirongo saKanani, sirongo esi va kere vanayirongo. 5Ano kulira koVaisraeli ava va tura Vaegipite moupika, nako tani ku zuvhu, yiyo nina kudiworoka malikwatakano getu. 6Ano nye tantera Vaisraeli asi: ‘Ame nyame Hompa: ano ame ngani mu gusa mo moyirugana yoyidigu yoVaegipite, ni mu parure nokuwoko kwange kokugonoka nokomapanguro gomanene unene. 7Ano ame ngani mu tambura mu kare mbunga zange, ame ngani kare Karunga gweni. Apa ngani mu gusa mo moyirugana youdigu yoVaegipite, yipo ngomu yi divira asi ame nyame Hompa Karunga gweni. 8Makura ame ngani mu tware mosirongo esi na ganena oAbirahamu naIsaka naJakopo asi ngani si va pa, ngani si mu pa si kare seni, ame Hompa.’ ” 9Mosesa makura ta ka yi uyunga noVaisraeli, nye awo kapi va purakenene Mosesa morwamalimbiliro noupika wawo woudigu.
10 Hompa ta twikire ko hena kuuyunga naMosesa asi: 11“Zende o ka uyunge naFarawo, hompa gwaEgipite, asi a sige Vaisraeli va tunde mo mosirongo sendi.”
12Nye Mosesa ta uyunga kosipara saHompa asi: “Kumwe Vaisraeli vana dili kupurakena nge, Farawo yige nye na ka purakena nge ame nyame ogu ani liwora kuuyunga ndi?” 13Hompa makura ta uyunga naMosesa naArona, makura ta va tumu neraka koVaisraeli nokwaFarawo, hompa gwaEgipite, asi va ka guse mo Vaisraeli mosirongo saEgipite.
Ntundiliro zoruvharo rwaMosesa naArona
14Masimbi gomazimo momalikwamo gago ngesi: Vana wovagara vaRubena, mbeli zaIsraeli, oHenoka naParu naGeresoni naKaremi. Ogo yigo masimbi gezimo lyaRubena. 15Vana vaSimiyoni wovagara oJemueli naJamini naOhadi naJakini naSogara naSauru, gopomukadi goMukanani. Ogo yigo masimbi gezimo lyaSimiyoni. 16Aga yigo madina govana vaRevhi wovagara moomu va likwamena: Geresoni naKehati naMerali. Revhi kwa ka sikire konomvhura efere nonomurongo ntatu nantano‐nambali. 17Vana wovagara vaGeresoni oLibuni naSimei. Nawo va kere noruvharo rwawo. 18Vana wovagara vaKehati oAmuramu naJisara naHeburoni naUsiyeli. Kehati ga ka sikire konomvhura efere nonomurongo ntatu nantatu. 19Vana wovagara vaMerali oMagili naMusi. Ogo yigo nye masimbi gezimo lyaRevhi moomu va likwamena.
20Diva eyi asi, Amuramu kwa kwere Jogebedi, ozinagona, mpanzaguhwe, makura tava reta nendi oArona naMosesa. Amuramu kwa sikire konomvhura efere nonomurongo ntatu nantano‐nambali. 21Aga gana kukwama ko madina nye govana vaJisara wovagara: Kora naNefegi naSikili. 22Vana vaUsiyeli wovagara oMisayeli naElisafani naSitili.
23Arona kwa kwere Eliseba zaAminadaba, mpanzaNasoni; vana vawo wovagara oNadaba naAbihu naEliyasara naItamara. 24Vana vaKora wovagara oAsira naElikana naAbiyasafa. Ogo yigo nye masimbi goruvharo rwaKora. 25Eliyasara zaArona kwa kwere munwaPetiyeli, makura tava reta nendi Pinehasa. Ogo yigo nye masimbi gomwaRevhi goruvharo rwawo.
26Ava oArona naMosesa yiwo vaava ga tanterere Hompa asi: “Mangurureni nombunga doVaisraeli di tunda‐tunde mo moEgipite.”
27Yiwo ngava kovekeda kuuyunga naFarawo, hompa gwaEgipite yemangururo lyoVaisraeli moEgipite.
Mpangera zaHompa kwaMosesa naArona
28Mezuva eli ga uyungire Hompa naMosesa mosirongo saEgipite, 29yimo ga uyungire Hompa naMosesa nonkango edi asi: “Ame nyame Hompa. Ka tantere Farawo, hompa gwaEgipite, nayinye eyi nina uyunga noge.”
30Mosesa makura ta tanta kosipara saHompa asi: “Ame kuliwora kuuyunga. Farawo ngapi omu na ka purakena nge?”
Currently Selected:
Exodus 6: KWN
Highlight
Share
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
