Exodus 27

Sizambero

(Ex 38:1-7)

1“Ngo rugane hena sizambero somusu. Monaure waso nometa mbali noharufa, ano monompatji nometa mbali noharufa. Sizambero ngasi kara sikwambando, ano musika gwaso meta zimwe noharufa. 2Nombinga daso to di hongere komakovhu gaso gane. Nombinga daso kudihonga nasene mositji simwe tupu, aso ngo si vambaike sivera songoporo. 3Ngo rugane tuyiga twapo tokukombera enoto, noyihupuro nomarupasa nonoforoko noyipana yomundiro. Yiruganeso nayinye eyi ngo yi rugana yosivera songoporo. 4Opo posizambero to ruganene po hena sikangero songoporo sokurugana pakwe. Koso sikangero komakovhu gaso, to tura ko nolinga ne dokusisimbisa. 5Sikangero songoporo sokurugana pakwe to si tura konhi zonontere dosizambero, si ka hulire keguru pokatji kosizambero. 6Sizambero ngo si ruganene hena yitji yonomudigo yomusu. Nayo ngo yi vambaike nosivera songoporo. 7Yitji yonomudigo kuyizweka monongondo, asi yitji yonomudigo ngayi kare komaruha nagenye gavali, nsene vana damuna sizambero. 8To si pangere noyipirangi, monda mu zahame. Moomu vana yi ku likida kondundu, yimo ngava yi rugana.

Rugumbo roNkongoronzugo zoMagwanekerero

(Ex 38:9-20)

9“Ngo rugane rugumbo roNkongoronzugo zoMagwanekerero romakehe golina zene‐zene. Unaure womakehe gokorwaMbindakano ngau hure ponometa nomurongo ne nane ngoso, 10ngo ga kulike konongundi nomurongo mbali dongoporo domatako nomurongo mbali gongoporo, noyinkongo yado nonongodi dado dosisiliveli. 11KorwaMuzogo‐zogo nako ngosikwawo. 12KorwaUtokero ngaku kare makehe gokuhura ponometa nomurongo mbali ngoso, nonongundi dago murongo nomatako gado murongo. 13KorwaUpumezuva kevero, rugumbo ngaru hure hena ponometa nomurongo mbali nambali ngoso monompatji. 14-15Kwankenye ruha rwevero ngaku kare makehe gokuhura ponometa ntano‐nambali ngoso nonongundi dago ntatu nomatako gado gatatu. 16Ano pevero lyene ko ngapa kare ekehe lyonometa ntano‐nane, lyolina zene‐zene, wa limbagura maurenga gonongodi dosineguru nedi dopurupuli nedi donongeha. Alyo ngo li kulike konongundi ne domatako gane. 17Nongundi nadinye dokukundurukida rugumbo kudigwanekedesa nonongodi dosisiliveli. Yinkongo yado ngayi kare yosisiliveli, ano matako gado gongoporo. 18Ure worugumbo ngau hure ponometa nomurongo ne nane, ano monompatji namunye nometa nomurongo mbali momusika nometa mbali noharufa. Ano aro ronongodi dolina dononderu dokurambakana kupoha. Ano mauzweko gonongundi dorugumbo ngaga kare gongoporo. 19Ano kombinga zoyiruganeso yomoNkongoronzugo nonongundi dazo nadinye nedi dorugumbo ngadi kare dongoporo.

Epakerombili lyokamba

(Lev 24:1-4)

20“Vaisraeli kuvatantera, ngava rete mawoli gomawa gononzwe dokuhopora gonoramba ntano‐nambali, asi di twere nkenye apa. 21MoNkongoronzugo zaHompa, kesinya oku lyekehe lyokutetesa, eli lya teta ko Sikesa soVeta, yiko kokudiwapaikira oArona novana vendi wovagara, nkumwe ngadi twere kutunda kongurova dogoro kongurangura kosipara saHompa. Ngazi kare mpangera zanarunye moVaisraeli nomomazimo gawo gokomeho oko.

Currently Selected:

Exodus 27: KWN

Highlight

Copy