Exodus 23

Ehungiko noyikara yoyiwa

1“Walye o hanesa yininke ya hana kuzira mo. Walye o popere vanzoni, makura umbangi woge ngau tware udona komeho. 2Walye o kwama yoyidona, nampili va hame ko wovanzi. Ano nsene to gava umbangi moyininke yongandi, wa ha gava umbangi woyimpempa, nampili ku hame wovanzi. 3Nokudonga‐dongera si muhwepwe ogu ana kara nononkango dendi.

4“Nsene o gwana ngombe ndi sindongili sonkore zoge sina zumbana, to si mu twarere. 5Nsene o mona sindongili sonkore zoge guna si ganda murongero, nye kuwapa kukwafa to ka kwafa.

6“Kapisi o donga‐dongere muhepwe nonkango dendi. 7Walye o litwara moyimpempa, neisi ngo hwedesa ava va hana usima novahungami. Nsene va yi ku zuvhira eyi, kapi ngo yoworoka. 8Walye o tambura yokukufutira mononkango, neisi ngo twika mokuhamena kousili wokusikisa mo veta.

9“Nokuhepeka si munayirongo, yeeyi mutjima gomunayirongo mwa gu diva, morwa none vanayirongo mwa kere moEgipite.

Mumvho gwautano‐nauvali nezuva lyautano‐nauvali

10“Epya lyoge to li limi nomvhura ntano‐nazimwe, muzangu to pungura, 11nye momvhura zoutano‐nauvali to li sigi ngorooro li tetenene. Vahepwe woge va ka pupure mo nondya, eyi vana kuhupisa mo, tayi li yikorama. Sikunino soyindjembere nesi somauzwe nayo yimo mokuyirugana ngorooro.

12“Momazuva gatano‐nalimwe yimo mokurugana yirugana yoge, ano mweli lyautano‐nauvali to pwizumuka. Nongombe noyindongili nayo yi peperere po, ano vakareli novanayirongo ava wa kara nawo nawo va gwane ko nonkondo.

13“Ngomu kare nosinka sokusikisa mo nayinye eyi nina kumutantera. Madina govakarunga peke nokugatumbura si, nokanunu si ga pwage mo mokana koge.

Yipito yitatu yoyinene

(Ex 34:18-26; Deut 16:1-17)

14“To ruganene nge rutatu sipito momumvho. 15Sipito soNomboroto da hana muhahu tomu si kwaterere ngorooro. Mazuva gatano‐nagavali posiruwo esi sa kara po sokwedi kwaAbibu to li nomboroto da hana muhahu yeeyi posiruwo oso yipo wa tundire moEgipite. Tayi kara po moomu na ku tantera nare. Vantu nokuwiza si mawoko‐woko kwange.

16“Sipito seyi yoKulihunga eyi wa kuna mepya lyoge omu si dane.

“Sipito soNomuzangu pehagero lyomumvho pokuteza‐teza mu rete ponompare, naso omu si dane. 17Rutatu momumvho yiro rokuhoroka vagara navenye kwaHompa.

18“Honde zonzambo nokuzizamba si kumwe noyuma yomuhahu. Magadi gosipito sonzambo nokugarangeka si nokomungura.

19“Sipe sopokatji kombunga semepya lyoge sokutwara konzugo zaHompa, Karunga goge.

“Sikombogona nokusiterekesa si komasini gazinyaso.

Matumbwidiro nonompangera

20“Ngesi tani tumu nye muengeli komeho zoge a ku popere monzira, age a ku tware kevega eli na ku wapaikire. 21Hama kwendi ove o zuvhe mwendi, kapisi o mu patanese, yeeyi age kapi nga dongonona po mausima geni, morwa edina lyange mwendi lya kara. 22Ano ove nsene o limburukwa kononkango dendi, makura o sikise mo eyi nina kukutantera, makura ame tani kara nkore zononkore doge nomunayita nava woyita noge. 23Yeeyi muengeli gwange nga pita komeho zoge nga ku tware koVaamoli nokoVaheti nokoVaferesi nokoVakanani nokoVahevhi nokoVayebusi, makura ame ngani va zonagure po. 24Vakarunga vawo nokuvatongamena si ndi asi o va kerere. Nokugusa si nonkedi dawo. To tezagura nombundi dawo domamanya o di tavagure. 25Nye Hompa Karunga goge, yige gokuruganena, ntani nga ku pa nondya nomema age hena nga ku popera kouvera. 26Mosirongo soge kapi ngamu kara gokuzonaukisa ezimo ndi gonganze.

27“Ngani ku pa mwenyo gokupukura pevhu. Utjirwe wokutjira nge yiwo ngani pitisa komeho zoge, ame ngani piyaganeka nombunga nadinye edi ngo gwanekera nado. Nonkore doge nadinye ngani di ninka di tjwayuke. 28Vahevhi noVakanani noVaheti ngani va tumina mambondwe ga va tjide ko komeho zeni. 29Nye kapi ngani va tjida ko usimbu‐usimbu komeho zoge, neisi ngasi kara sirongo mapuku, makura yikasama ngayi vhuke mo. 30Ngani va tjida ko kanunu‐kanunu komeho zoge dogoro vantu woge tava ya siki mo mokugusa sirongo. 31Mururani goge ngagu tundilira kEfuta lyEgeha dogoro kEfuta lyoVafilisiti, ntani kutunda komburundu dogoro nokoEufurata. Vantu woyirongo eyi ngani va mu pa mu va tjide mo. 32Nokulikwatakana si nawo ndi novakarunga vawo. 33Va ha tunga mosirongo seni, neisi ngava mu zonesesa, ngomu kerere vakarunga vawo. Yeeyi nsene va kara mo, ngano ngava mu tura konhi.”

Currently Selected:

Exodus 23: KWN

Highlight

Copy