MUUDISI 7
7
Yigazo yokuhamena ukaro
1Edina lyewa lya pitakana murora gondiro; ano ezuva lyonomfa doge lya pitakana ezuva lyehampuruko lyoge.
2Kuza kembo lyononkali kwa pitakana ogu ana kuza kosipito, morwa vanamwenyo kuvadiworokesa vene asi nomfa kwa tu ndindira natuvenye.
3Eguwo lya pitakana kuzora; sipara kuvhura si kare neguwo, nye ayo kuwapeka nondunge doge.
4Ogu a gazara nkenye apa yokuhamena ehafo, ogo mugova. Munandunge kugazara yokuhamena nomfa.
5Kupurakena etugumukiro lyovanandunge kwa pitakana kupurakena nonsumo domugova.
6Mugova nsene ta zoro, ngwendi mega tupu gana kucukauka momundiro. Ayo nayimwe si ayi tanta.
7Munandunge nsene a kumbagera muntu, ta rugana ngwendi egova. Ano nsene o tambura mfuto zombumbo, to zonagura ukaro woge.
8Ehagero lyankenye sininke lya pitakana etameko.
Edidimiko lya pitakana elinenepeko.
9Walye o genderere kuhandukisa mutjima goge, yeeyi ehandu kwa kara monturo zegova.
10Walye o pura asi: “Yinke ya waperere yininke pwanare?” Epuro olyo kapisi lyonondunge.
11Nkenye ogu ga kara nomwenyo ga fira kukara munongo; ayo kwa wapa ngwendi gogu ana kutambura upingwa 12ngau ku popera unene, moomu ayi ku popere yimaliva. Unongo tau ku gamene — ou yiwo uwa wediwo.
13Gazara kweyi ga rugana Karunga. Yilye ogu gokuvhura kuvyukisa eyi ga pengesa Karunga?
14Yininke nsene tayi ku gendi nawa, hafa. Nye udigu nsene tau wiza, diworoka asi, Karunga kureta nayinye eyi yivali, ehafo noudigu; nye ove nampili kuna manga asi o dive eyi ngayi horoka komeho.
15Ukaro wange kutupu sikwafa, nye mwawo na monena mo nayinye. Muntu gomuwa kuvhura a fe, ano ogu mukwawo simpe ta kara nomwenyo, nampili a kare asi yige mudona po. 16Ano wa ha kara gomuwa unene ndi asi o kare nounongo wounzi — yinke yokulidipagera nyaamoge? 17Wa ha kara mudinikarunga unene ndi asi o govape unene‐yinke no fira usimbu‐simbu ngoso? 18Kara ure neyi nayinye yivali. Nsene ove kukerera Karunga, ngo ragopa kwanayinye.
19Unongo kuruganena muntu yoyinzi, kupitakana pweyi ava vhuru kuruganena vapangeli murongo sitata.
20Kutupu nampili gumwe pevhu, ogu a rugana narunye youhunga ga hana kupuka.
21Walye o pakere mbili nkenye eyi vana kuuyunga vantu. Kuvhura o zuvhe omu vana kuswaura vakareli woge, 22nye ove ono yi lidiva asi ove kuswaura vantu nkenye apa.
23Ame tani ruganesa unongo wange ni konakone nayinye eyi. Ame kwa tokora kukara ni munongo, nye kwa kara nge ure. 24Ngapi nye omu na vhura muntu kusika po asi, ukaro yinke? Sininke esi kwa tu kara ure unene, udigu unene kuyikwata egano. 25Ame kuna ligava nyaamwange kediwo nokokulironga; kwa tokora ni gwane unongo nomalimbururo komapuro gange, ni lironge kudiva udinikarunga nougova asi, upote musinke.
26Ame na gwana hena yuma youruru unene kupitakana nomfa, mukadi. Sihoro esi a ku pe, ngasi ku kwata ngwendi siraha ndi ekwe; mawoko aga a ku dingire, ngaga ku manga ngwendi elyenge. Muntu ogu a hafesa Karunga kutunda po ta ka za, nye munanzo ta mu kwata. 27Nhi, yimo ana kutanta munaunongo asi, eyi kwa yi gwana kanunu kanunu mokundindira kwange asi ni gwane malimbururo. 28Ame kwa papara malimbururo peke, nye nalimwe si na gwana ko. Na gwana ko mugara gumwe tupu movagara eyovhi ogu na vhura kufumadeka, nye kovakadi nagumwe si. 29Eyi na lironga po yeyi: Karunga kwa unga muntu a wape age a rerupe, nye nyamwetu nyose atu lipaparere maudigu gomanzi.
Currently Selected:
MUUDISI 7: KWN
Highlight
Share
Compare
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003
