NDANIYERA 11

1Age kwa mu pa sinka sokukwafa nge nokupopera nge. 2Ano eyi nani ku tantera yousili.”

Sirongo saEgipite naSiliya

Muengeli ta tanta asi: “Vahompa vatatu ngava pangera simpe Peresiya, makura nga va sikure gwaune, ogu nga kara ngawo a pitakane povakwawo navenye. Ano nonkondo douhompa wendi noungawo wendi ngayi vhuka ta ka rwisa sirongo saGereka.

3“Hompa gependa nga horoka. Age nga pangera sirongo sosinene ta rugana moomu ana hara. 4Ano apa ngadi sika po nonkondo dendi, sirongo sendi ngasi teka po, makura ngava si gaunune nombinga ne. Ohompa ava va dira kutunda mezimo lyendi yiwo ngava pangera mevega lyendi, nye kapi ngava kara nononkondo ngwendi dendi.

5“Hompa gwaEgipite yige nga kara nononkondo. Ano gumwe gomomarenga gendi, yige nga kara nononkondo, ta pangere sirongo sosinene. 6Konyima zonomvhura dimwe, hompa gwaEgipite nga ka likwata ukwawo nahompa gwaSiliya, ta ka mu pa munwendi gomukadi a kware. Nye ukwawo ou kapi ngau kara po. Ano mukadi nayendi namunwendi novapika ava ava gendi nawo ngava va dipaga. 7Konyima zeyi, gumwe gemekoro lyendi yige nga kara hompa. Age nga tjida‐tjida mbunga zovakwayita vaSiliya ta hwilire momapoperonzugo gawo makura nga va funde. 8Age nga tengwida koEgipite mafano govakarunga vawo noyininke yongorodo nosisiliveli eyi va pongwera vakarunga vawo. Konyima zonomvhura dimwe dombili, 9hompa gwaSiliya nga homona Egipite, nye nga tewa, ta tengura kosirongo sawo.

10“Vana wovagara vahompa gwaSiliya ngava liwapaikira yita. Awo ngava pongaika mbunga zonene zovakwayita. Gumwe gomumwawo nga komba ngwendi moomu aru sara ruhanzo mapoperonzugo gononkore. 11Hompa gwaEgipite nga za koyita, age ana u kuta a ka rwise hompa gwaSiliya nokukwata mbunga zovakwayita vendi wovanzi‐wovanzi. 12Age nga linenepekera efundo lyendi novakwayita wovanzi ava ana dipaga, nye kapi nga twikira kufunda ngorooro.

13“Hompa gwaSiliya nga tengura, makura ta ka pongaika mbunga zonene zovakwayita kupitakana pwezi ga kere nazo nare, Ano siruwo esi va panga nsene ngasi sika mo, makura ntani nye nga ka wiza hena nombunga zovakwayita ava vana humata nawa. 14Vantu wovanzi ngava rwisa nye hompa gwaEgipite. Ano vagara vamwe wononkondo womuhoko goge ove Ndaniyera, ngava ka rwa, morwa emoneko eli vana mono, nye ngava va funda. 15Ano hompa gwaSiliya, nga umbilikida mapoperonzugo gositata, ta si kwata. Vakwayita vaEgipite, kapi ngava twikira hena kurwa, nonontoni deedi kapi ngadi kara nononkondo dina gwana po. 16Muhomokeli goMusiliya nga rugana moomu ana seyere, pwa hana ogu ana kumukandana. Age nga kara mosirongo somatumbwidiro, tasi kara nawa‐nawa mepangero lyendi.

17“Hompa gwaSiliya nga ninka ekonakono mokuruganesa vakwayita vendi navenye. Mokuninkira asi a hanagure po sirongo nononkore dendi, nga likwata ukwawo nendi mokugava munwendi gomukadi va likware, nye egazaro lyendi, kapi ngali ragopa. 18Konyima zeyi nga za nye a ka rwise nomuhoko edi da kara kefuta, makura ta fundu sinzi sawo. Nye mupangeli gomunayirongo nga mu funda a hagese po malitumbo gendi, malitumbo aga nga ga tengwidira hena hompa gwaSiliya. 19Hompa nga tengwira komapoperonzugo gosirongo sendi, nye ngava mu funda, makura ngali kara nye ehagero lyendi.

20“Age nga mu kwama hompa gwapeke, ogu nga tuma marenga ngaga ka hepeke vantu nonomutero, morwa kuvhukisa emona lyosirongo sendi. Ano mokaruwogona tupu, makura hompa ogo ngava mu dipaga, nye kapisi moyitarameho ndi moyita.”

Hompa gomudona gwaSiliya

21Muengeli ta twikire ko kufwaturura asi: “Hompa gokukwama ko gwaSiliya nga kara mugara gomudona ogu ga dira kufira kukara hompa, nye age nga wiza va hana kuyindindira, ta gusa nononkondo moyineya. 22Nkenye ogu ana kulilimba nendi nomupristeli si gomunene gwaKarunga googu, tava mu kombo po va mu dimise mo. 23Mokuninka magwanekero, nga kumbagera nomuhoko peke, makura nonkondo dendi tadi nenepa, nampili ngomu nga pangera muhokogona. 24Nga livakera monomukunda dougawo ga hana kurondora, ta rugana eyi va dira kurugana rumwe ozinakuru. Makura nga gavere vakwami vendi yininke nougawo ou nga kwata moyita. Nga gazara kurwisa nohotepopero, nye siruwo sendi ngasi genderera kupwa.

25“Nga tumba noupampi mbunga zonene zovakwayita a ka rwise Egipite, ogu nga liwapaikira nage kulipopera nombunga zonene zononkondo zovakwayita. Nye hompa gwaEgipite ngava mu kumbagera, kapi nga ragopa. 26Vagavindunge vendi woponyonga yiwo ngava mu teza po. Vakwayita vendi wovanzi ngava va dipaga, ano mbunga zendi zovakwayita ngava zi komba mo. 27Makura ohompa owo vavali ngava hingira positafura simwe va lye, nye nompepo dawo ngadi yipa, ngava likumbagera vene navene. Kapi ngava gwana eyi ngava hara, morwa siruwo kapi sina siki mo simpe. 28Hompa gwaSiliya nga tengura kwawo nanayinye eyi ga ka kwata, age ana tokora kuhanagura po ukerelikarunga wovantu vaKarunga. Nga rugana nkenye eyi nga hara, makura ta tengura kosirongo sawo.

29“Konyima ta homona hena Egipite, nye apa ngesi ngayi kara namopeke. 30Varoma ngava wiza moyikepa va mu vyuke, makura ngava mu tjilise.

“Age nga tengura nehandu, ta kambadara kuhanagura po ukerelikarunga wovantu vaKarunga. Age nga kwama evyukiso lyava va zumba nare ukerelikarunga owo. 31Vakwayita vendi vamwe ngava nyateka ntembeli. Ngava silika nonzambo dankenye ezuva, tava tura po ezonauko lyedona. 32Moyimpempa yendi hompa nga gwana ekoreko lyava va zumba nare ukerelikarunga wawo, nye ava ava kwama Karunga, nawo ngava rwa va lipopere. 33Vagendesi wonondunge ngava pukurura wovanzi. Nye siruwo sosire ngava va dipaga moyita ndi tava va swakerere, ava vamwe ngava va hakana oku tava va zedilire monodorongo. 34Alyo edipago kuna kutwikira, vantu vaKarunga ngava gwana nakauke ekwafo, nampili wovanzi ava ngava lipakerera, nawo ngava yi ruganena mokuligazara vene. 35Vagendesi owo vamwe wonondunge ngava va dipaga, nye mweyi ngesi vantu ngava va kuhura. Eyi ngayi twikira ngorooro dogoro ehagero tali wiza, siruwo esi ga paka po Karunga.

36“Hompa gwaSiliya nga rugana moomu ana hara. Age nga likanganga asi age munene kupitakana vakarunga navenye, ga neneperera kupitakana naKarunga gekeguru‐guru googu. Age nga yi rugana eyi dogoro siruwo esi nga mu futisa Karunga. Karunga nga rugana nawa‐nawa eyi ga gazara. 37Hompa nga zumba karunga ogu ngava ruganene ozinakuru nakarunga ogu va hara vakadi. Ano nga zumba vakarunga navenye, morwa age nga gazara asi age munene kupitakana navenye. 38Nga fumadeka age karunga ogu a popere nohotepopero. Nga gava uhwi wongorodo nosisiliveli nomamanya gondiro nomauhwi gondiro kwakarunga ogu va dira kukerera rumwe ozinakuru. 39Mokugamena nohotepopero dendi age nga ruganesa vantu ava ava tongamene karunga gwapeke. Age nga fumadeka unene ava va mu tambura a kare mupangeli, ta va tura moyirugana yokuzeruka, ta va pe sirongo ngomfeto.

40“Apa ngasi sikilira mo nye siruwo sahompa gwaSiliya, makura hompa gwaEgipite ta mu rwisa, ano hompa gwaSiliya nage ta ru a lipopere nononkondo dendi nadinye, a ruganese turukara toyita nononkambe noyikepa yoyinzi. Age nga homona yirongo yoyinzi ngwendi mema goruhanzo. 41Nga homona nosirongo somatumbwidiro seesi, ta dipaga mayovhi nomurongo, nye yirongo yoEdomu naMowaba neyi ya hupa moAmoni ngayi yoworoka. 42Apa nga homona yirongo nayinye, naEgipite googu kapi nga tupuka. 43Nga twara emona lyaEgipite eli va horeka lyongorodo nosisiliveli noyiweka yendi yapeke yondiro. Nga kwata Libiya naSudani. 44Makura mbudi ezi ngazi tunda koUpumezuva nokoMuzogo ngazi mu tjilisa makura ta ru unene, a dipage vantu wovanzi. 45Age nga tomeka notenta dendi dosiuhompa pokatji kefuta nondundu apa za kara ntembeli. Nye nga fa, apo pwa hana kukara gokumukwafa.”

Currently Selected:

NDANIYERA 11: KWN

Highlight

Compare

Copy