AMOSA 1

1Edi yido nonkango daAmosa, musita gononzwi moTekoa. Komeho zonomvhura mbali alyo ekankamo lyevhu simpe, age Usiya hompa gwaJuda, ano Jerobiyamu zaJehoyasi hompa gwaIsraeli, Karunga ta horwere Amosa yininke nayinye eyi yombinga zaIsraeli.

2Amosa ta tanta asi:

“Hompa kuna kuura pondundu zaSiyoni;

ezwi lyendi kuna kundunduma moJerusarema.

Maliro gana kukuta, ano wayi

kondundu zaKarumeli kuna gehe.”

Karunga ta pangura vamaparambo vaIsraeli

Siliya

3 Hompa ta tanta asi: “Vantu vaDamasikusi kuzona‐zona, yipo nye ngani va futisira nawa‐nawa. Awo kwa rugana Giliyata nonyanya zondigu. 4Ngani tuma mundiro kombara ezi ga tunga hompa Hasayeli, ngani hwike po nohotepopero daBenihadadi. 5Ngani tezagura marungavero gaDamasikusi, tani gusa mo ava va kara momuramba gwaAveni nomupangeli gwaBete‐Edeni. Vantu womoSiliya ngava va twara nonkwate kosirongo saKire.”

Filisitiya

6 Hompa ta tanta asi: “Vantu womoGasa kuzona‐zona, yipo nye ngani va futisira nawa‐nawa. Awo kwa gusa muhoko mudima, tava ka gu randesa vapika kovantu vaEdomu. 7Ano ame ngani tuma mundiro komakuma gositata saGasa, ngagu hwike po nohotepopero daso. 8Vapangeli womoyitata yaAsidodo naAsikeroni ngani va gusa mo. Ngani futisa sitata saEkironi, ano Vafilisiti navenye ava va hupa po ngava fa.”

Tirusi

9 Hompa ta tanta asi: “Vantu womoTirusi kuzona‐zona, yipo nye ngani va futisira nawa‐nawa. Awo kwa twara muhoko mudima koupika mosirongo saEdomu, tava nyoka kusikisa mo egwanekero lyoukwawo eli va peke po. 10Ano ame ngani tuma mundiro komakuma gositata saTirusi, ngani hwike po nohotepopero daso.”

Edomu

11 Hompa ta tanta asi: “Vantu womoEdomu kuzona‐zona, yipo nye ngani va futisira nawa‐nawa. Awo kusana vakwaawo, Vaisraeli, kapi ava va fire nkenda. Ehandu lyawo kapi lya paka uhura, narumwe si kulidimisa. 12Ano ame ngani tuma mundiro kositata saTemani, ngani hwike mundiro nohotepopero daBosira.”

Amoni

13 Hompa ta tanta asi: “Vantu womoAmoni kuzona‐zona, yipo nye ngani va futisira nawa‐nawa. Moyita yawo yokunenepeka sirongo novakadi womazimo womoGiliyata nawo kwa va tuvagura. 14Ano ame ngani tuma mundiro komakuma gositata saRaba ngani hwike nohotepopero daso. Nkugo ngazi kara po mezuva lyoyita, ano yita ngayi sikama ngwendi kakunguru. 15Hompa gwawo nomarenga gendi ngava za koupika.”

Currently Selected:

AMOSA 1: KWN

Highlight

Compare

Copy