Yirugana Yovapositoli 3
3
Everuro lyosirema
1Ezuva limwe oPeturusa naJohanesa makura tava zi kontembeli motundi zautatu kositenguko, motundi zomakanderero. 2Ano pevero eli ngava tumbura asi Evero lyewa, pwa kere mugara, sirema somondambo hava mu hampurukira. Nkenye ezuva ngava mu twara kolyo evero, a ka hehere yimaliva kwava ngava zi montembeli. 3Ano oPeturusa naJohanesa apa va hwililire mo, ta va hundire asi va mu pe yuma. 4Ano oPeturusa naJohanesa tava mu nwike, makura Peturusa ta tanta asi: “Tu tara!” 5Makura age ta va tara, oku ta ndindire asi ngano va mu pe yuma. 6Nye Peturusa ta tanta asi: “Sisiliveli nongorodo ame kutupu; nye eyi na kara nayo tani yi ku pe: medina lyaJesus Kristusa goMunasareta, katuka o gende!” 7Age makura ta mu kwata kokuwoko kwendi korulyo, a mu kature. Poopo ngoso makura nompadi dendi nononcugu dendi tadi korerere. 8Age ta vatuka ta sikama ta gendagura, makura ta zi kumwe nawo montembeli, age kuna kugendagura oku ta vatauka oku ta hamberere Karunga. 9Ano mbunga nazinye tazi mu mono, omu ana kugenda oku ta hamberere Karunga. 10Awo makura tava mu dimburura asi yige gogu a hingire pEvero lyewa lyontembeli, a hehere. Awo makura tayi va retere sitetu, neisi vana kutanta vana kudiva kweyi ya mu horokerere.
Eudiso lyaPeturusa montembeli
11Mugara ogu va verwire eyi ga ligegerere poPeturusa naJohanesa, mbunga nazinye makura tazi tetuka unene, tazi dukire kwawo mombaraka ezi ngava tumbura asi zaSaromo. 12Ano Peturusa apa ga yi mwene, ta tantere vantu asi: “One Vaisraeli, yinke yina mu tetwire eyi, neyi muna kututarwilira ngoso hena yinke? One kuna kugazara asi, ose kuna yi ruganesa kononkondo danyamwetu ndi kouhunga wetu, yiyo ana kugenda? 13Karunga goAbirahamu naIsaka naJakopo, Karunga gozinyakurwetu, yige ana yererepeke Munwendi Jesus, ogu mwa gavere, mu mu patane kosipara saPiratusa, apa ga tokwere asi a mu mangurure. 14Age Mupongoki noMuhungami ga kere one yiyo mwa mu patana, mu hundire asi va mu mangwilire murudipagavantu. 15Ano ntundiliro zomwenyo yiyo mwa dipaga. Karunga ga mu pindura koufe, ano ose nyose nombangi dayo. 16Nonkondo dedina lyaJesus yido dina koreke ogu mugara. Eyi muna kumona, diveni asi, kuna yi rugana mepuro lyemedina lyendi. Ano epuro lyokupura Jesus, yilyo lina mu pe ukangure wangesi komeho zeni namuvenye.
17“Nye ntaantani, vakwetu, na yi diva asi one kwa yi rugene mokudira kudiva kweni, nomasimbi geni si nago ngosikwawo. 18Nye ponkedi zangoso, yipo ga sikisire mo Karunga, eyi ga zuvhisisire nare motuna tovaporofete navenye asi, Jesus nga nyanda. 19Litezurureni nye, mu tengure kwaKarunga, nonzo deni ngadi dongonoke po. 20Ntani ngasi wiza siruwo esi nga ya mu pepereresa Hompa, apa nga mu tumina ogu va mu horowera nare, Jesus Kristusa. 21Age nga kara meguru dogoro kosiruwo sokuninka yininke nayinye yi kare yipe, moomu ga uyungisisa Karunga kutunda kwanare tuna tovaporofete vendi wokupongoka. 22Yeeyi Mosesa kwa tanterere ozinyakurwetu asi: ‘Hompa Karunga gweni nga tumba muporofete movakweneni, ga fana nge ame. Ngomu yi limburukwe nayinye eyi nga mu tantera. 23Ano nkenye ogu nga dira kuzuvha ogo Muporofete, ngava mu gusa mo mombunga.’ 24Novaporofete navenye ava ngava uyunga, kutundilira kwaSamwere nava va kweme ko, nagaaga mazuva nago va ga pumba. 25Mapingido gaKarunga aga ga uyungisisa vaporofete vendi, kweni ga hama, negwanekero eli ga likwete Karunga nozinyakurweni, kweni lya hama, apa ga tanterere Abirahamu asi: ‘Mombuto zoge yimo ngava tungikira vantu navenye womouzuni.’ 26Karunga kwa mu pindwilire Munwendi Jesus koufe, yiyo ga hova kumumutumina, a ya mu tungike, asi nkenye ogu a mu tezwilise koudona wendi.”
© Egwanekerobibeli Lyanamibia 1987, 2003
© Bible Society of Namibia 1987, 2003