Yirugana Yovapositoli 1
1
Etumbwidiro lyoMpepo zoKupongoka
1Mukwetu Tiyofirusa! Mobuke zange zomuhowo ame Rukasa kwa tjanga nayinye eyi ga rugene Jesus neyi nga rongo 2dogoro ezuva eli va mu zerwire a ze meguru. Age simpe pevhu, yipo ga gavere nompangera kononkondo doMpepo zoKupongoka kovapositoli ava ga horowere. 3Momazuva nomurongo ne kutunda kevhumbuko lyendi nga va monaikilire rorunzi pankedi zokuvapulisisa asi age muzuni, makura ta uyunga nawo yokuhamena Untungi waKarunga. 4Apa va pongere kumwe, ta va tantere asi: “Mwa ha tunda mo moJerusarema, ndindireni eyi ga tumbwidira Tate, eyi na mu tantera. 5Yeeyi Johanesa nga kuhu nomema, nye one ngava mu kuhwa noMpepo zoKupongoka, kapi napa pita mazuva gomanzi.”
Jesus tava mu twara meguru
6Vapositoli apa va pongere kumwe, tava pura Jesus asi: “Hompa, ntaantani tupu ngesi o tengwidire Vaisraeli nonkondo dokupangera vene sirongo sawo ndi?” 7Jesus ta va limburura asi: “Eyi kapisi yeni yokudiva yiruwo noyinema eyi ga panga Tate mononkondo damwene. 8Nye one ngava mu zwida nonkondo, apa ngazi wiza Mpepo zoKupongoka pweni, makura ngomu kare nombangi dange moJerusarema nomoJudeya nazinye nomoSamaliya, dogoro nokooku wa ka twa uzuni.” 9Age kwa mana tupu kuyitanta, makura tava mu gusa po, awo kuna kutara. Eremo yilyo lya mu gusire po pwawo, li va vive a va dongonoke momeho.
10Hava za mokuziuka va tare keguru omu ana kukaza, va tara ko, vagara vavali woyikoverero yoyizera vava, vana sikama pwawo. 11Makura tava tanta asi: “Vagara one woVagalireya, eyi muna sikamene neyi muna kutara keguru hena yinke? Jesus ogu vana mu gusa a ze meguru, yimo ngorooro nga wiza, moomu muna mu mono ta zi meguru.”
Matiyasa ta pinganene pevega lyaJudasa
12Vapositoli makura tava tengura koJerusarema, va tunde koNdundu zoMauzwe, sinano sokuhura ngwendi pokilometa ngoso. 13Eyi va ka sika mositata, makura tava rondo konzugo zekeguru ezi ngava pongo, awo yiwo oPeturusa naJohanesa naJakopo naAndiliyasa naFilipusa naTomasa naBarotoromeusa naMateusa naJakopo, munwaArufeusa naSimoni goMupampi naJudasa, munwaJakopo. 14Awo makura tava lipakerere va kare mbunga zimwe, makura tava kanderere nomutjima nagunye kumwe novakadi vamwe naMariya, ozinyaJesus, novamumbya vendi.
15Eyi pa pita mazuva gamwe, makura tapa kara sigongi sovapuli, ano ava va pongere po kwa hulire ngwendi pefere nonomurongo mbali ngoso. Peturusa makura ta sikama, ta tanta asi: 16“Vakwetu, etjango eli lina siki mo, eli za pumba Mpepo zoKupongoka mokana kaNdafita yokuhamena Judasa, ogu ga kere mupitisili gwava va kwatere Jesus. 17Judasa nage gombunga zetu ga kere, yeeyi nage kwa mu horowere asi nage a gwane mo sendi moyirugana yetu.”
18(Yimaliva yosirugana sendi sokudira kuhungama Judasa kwa yi randesesere ko epya, makura yiyo ga gwa kawomba, yiyo ga tauka ezimo, yomonda zendi nayinye tayi tjupuruka mo. 19Ava va kere moJerusarema, navenye va yi divire, makura olyo epya tava li ruku meraka lyawo asi Akelidama, kuninka asi Epya lyomponde.)
20“Yeeyi mobuke zoMapisarome kwa tjanga mo asi:
‘Sigeni embo lyendi li kare erunda,
mwa ha kara nampili muntu gumwe.’
Kwa tjanga hena asi:
‘Sigeni gumwe gwapeke, a guse sirugana sendi!’
21“Yipo nye natu hepereni gumwe, a ya kare mbangi kumwe nose zokuhamena evhumbuko lyaHompa Jesus. 22Age a tunde ntani movagara, ava ngatu kara nawo siruwo nasinye esi nga gendagura Hompa kumwe nose, kutunda apa ga kuhwire Johenesa Jesus dogoro nekezuva eli va mu tu yambwire meguru.” 23Awo makura tava tumbura po vavali: oJosefa ogu ngava tumbura asi Barasabasi, edina lyendi lyokulirundumuna Jusitusa, naMatiyasa. 24Awo makura tava kanderere asi: “Hompa, ove kwa diva nomutjima dovantu navenye. Ano pwava vavali tu likida po ogu wa horowora, 25a ze moyirugana youpositoli, eyi ga zumba Judasa, a vyukililire kevega eli lya mu hamena.” 26Awo makura tava va horowora pasifungu‐fungu, sihoroweso makura tasi kwata Matiyasa. Age makura tava mu gusa a kare mupostoli, va mu gwederere kwava murongo nagumwe.
© Egwanekerobibeli Lyanamibia 1987, 2003
© Bible Society of Namibia 1987, 2003