2 Vatesaronika 1
1
1Mbilive ezi kuna kutunda kwaPaurusa naSilivanusa naTimoteusa, zi ze kombungakriste zokoTesaronika, ezi za hamena kwaKarunga Guhyetu naHompa Jesus Kristusa.
2Karunga Guhyetu naHompa Jesus Kristusa va mu fire nkenda oku tava mu pe mbili!
Kristusa nga wiza a ya pangure
3Ose nyose kupandura Karunga nkenye apa mwarweni, one vakwetetu. Nayene ya zira mo tupu, yeeyi epuro lyeni kuna kukura unene, neharo lyeni lya hara mukweni nalyo tali koro. 4Eyi yiyo nye tuna kulifumadekera nyamwetu mweni monombungakriste daKarunga morwedidimiko lyeni nepuro lyeni momahepeko geni nomaudigu nagenye aga mwa kara nago.
5Eyi yiyo ayi horora asi, epanguro lyaKarunga kwa hungama, asi none va mu ninke mu wapere Untungi waKarunga, ou muna kuhepera. 6Yeeyi Karunga kurugana yokuhungama: age nga rugwida kuwoko ava ava mu hepeke. 7Age nga mu pa epwizumuko one ava muna kuhepa kumwe nose, apa nga horoka Hompa Jesus a tunde meguru, kumwe novaengeli vendi wononkondo 8momaraka gomundiro. Nga wiza asi a ya futise ava va dira kudiva Karunga nava ava dili kulimburukwa koMbudi zoNgwa zaHompa gwetu Jesus. 9Apa nga wiza Hompa, awo ngava va pangwira mezonauko lyanarunye. Ngava va faga ko kosipara saHompa nokouyerere wononkondo dendi. 10Ezuva olyo ngava ya mu fumadeka vapongoki vendi oku tava mu tetuka navenye ava va pura. None yimo ngomu rugana, yeeyi mwa pura umbangi ou twa mu sansekera.
11Yiyo nye atu mu kandererere nkenye apa asi, Karunga gwetu ngano ta mu ninki mu wapere ehoroworo lyendi. Age hena ngano a mu sikisilire mo eharo lyeni lyokuhara uwa noyirugana yeni yemepuro. 12Pankedi zangesi ngali fumanena edina lyaHompa gwetu Jesus Kristusa mweni, ano none ngomu fumanena mwendi, mokuliza nonkenda zaKarunga gwetu naHompa Jesus Kristusa.
Currently Selected:
2 Vatesaronika 1: KWN
Highlight
Share
Copy
Want to have your highlights saved across all your devices? Sign up or sign in
© Egwanekerobibeli Lyanamibia 1987, 2003
© Bible Society of Namibia 1987, 2003