2 SAMWERE 7
7
Mbudi zaNatana kwaNdafita
(1 Hist 17:1-15)
1Ano hompa Ndafita age haga kerera mombara zendi, age Hompa ana mu pe mpora zokononkore dendi nadinye, 2makura Hompa ta tantere muporofete Natana asi: “Ko tara si, ame kwa hingira monzugo zoyitji yomusedeli, nye Sikesa saKarunga sEgwanekero kwa kara motenta!”
3Natana ta tantere hompa asi: “Kuza tupu to ka rugana nkenye eyi guna kugazara mutjima goge, yeeyi Hompa noge ana kara.” 4Nye googo masiku ogo nonkango daHompa tadi wiza kwaNatana asi: 5“Ka tantere muntu gwange Ndafita asi: ‘Nyove nye gokutungira nge nzugo ni kare mo ndi? 6Ame kapi na kara rumwe monzugo hana tundira kezuva eli na gusire Vaisraeli moEgipite dogoro naina eli, nye ame kwa gendera motenta. 7Nakunye oku na genda mokatji koVaisraeli, kapi na uyunga rumwe nkango nezimo limwe pomazimo gaIsraeli, eli na tura po li kunge mbunga zange Israeli asi, yinke yokudilira kutungira nge nzugo zoyitji yonomusedeli!’
8“Yimo nye no ka tantera muntu gwange Ndafita ngoso asi: ‘Hompa Munankondo nadinye ta tanta asi, nyamwange na ku gusa ko kousita wononzwi asi o kare mupangeli gombunga zange Israeli. 9Ame nkenye apa ngo zi noge ngani kara, nonkore doge nadinye yipo na di mana ko komeho zoge. Ano edina lyoge ngani li fumbura li sike pomadina govanene ava va kara konauzuni. 10-11Ano ame ngani paparera mbunga zange Israeli evega, ngani zi tapeka po, asi ngazi kare pevega lyazene, za ha hepa rure. Vakorokotji kapi ngava va hepeka hena ngwendi mwanare, kutunda pezuva eli va pa mbunga zange Israeli vapangeli. Nye ame ngani ku parura kononkore doge nadinye. Ano Hompa kuna hara a ku divise asi, yige nga ku pa ruvharo. 12Nsene ngaga sika mo mazuva goge ngo ka rare ponyokokuru, ngani tumba munoge gwaamoge nga kare hompa, ano uhompa wendi ngani u koreka. 13Ogo yige nye nga tungira edina lyange nzugo, ano ame uhompa wendi ngani u paka po dogoro narunye. 14Ame ngani kara guhwe, age nga kara munwange gomugara. Kuninka asi nsene nga zona, ngani mu toonesa sinyanyi sopasintu, ame ngani mu pisura moomu a pisura guhya munwendi gomugara. 15Nye ufenkenda wange kapi ngau tunda po pwendi, moomu na u gusire po pwaSauru ogu ga hovere koge mouhompa. 16Ezimo lyoge nouhompa woge ngayi karerera narunye kosipara sange, sipundi soge sepangero ngasi karerera dogoro narunye!’ ”
17Natana kwa tanterere Ndafita nayinye eyi ga mu horwerere Karunga.
Ekanderero lyaNdafita lyompandu
(1 Hist 17:16-27)
18Hompa Ndafita ta hwilire moNkongoronzugo zekaropo lyaHompa, ta hingire, makura ta kanderere asi: “Kapi ya fira nge nepata lyange eyi wa ruganena nge, ove Hompa Mupangeli. 19Nye ntaantani ove simpe kuna kugwederera ko kurugana, Hompa Mupangeli; ove kwa gava matumbwidiro gokuhamena koruvharo rwange komeho oko. Ove kwa pulisira asi muntu a yi mone eyi, ove Hompa Mupangeli! 20Yinke hena eyi nani twara‐twarera mo kuuyunga noge? Wa diva nge, ame muntu goge. 21Morwanonkango doge nompangera zoge yiyo ono rugana yininke eyi yoyinene asi o yi divise muntu goge. 22Ee, yireru omu wa nenepa ove Hompa Mupangeli! Ove kutupu ogu ga ku heteka; twa yi diva nakwanare asi nyovelike Karunga. 23Kutupu muhoko gumwe pevhu ogu gwa fana Israeli, ogu wa yoworora moupika, yiyo wa va ninka va kare mbunga zaamoge. Yininke yoyinene yoyitetu eyi wa va ruganena ya hanesa efumano lyoge mouzuni mudima. Wa tjida mo nomuhoko peke novakarunga vado, eyi vana kugenda vantu woge, mbunga ezi wa yowerere moEgipite zi kare zaamoge. 24Ove kwa horowora mbunga zoge Israeli, zi kare mbunga zoge dogoro narunye, ano ove Hompa yiyo wa kara Karunga gwawo.
25“Hompa, ninka nye nonkango edi wa uyunga dokuhamena muntu goge noruvharo rwendi, ngadi sike mo dogoro narunye, ngo rugane moomu wa tanta. 26Efumano lyoge ngali nenepa, ano vantu ngava tanta narunye asi: ‘Hompa Munankondo nadinye yige Karunga gwaIsraeli.’ Ano ezimo lyomuntu goge Ndafita ngali kora kosipara soge dogoro narunye. 27Hompa Munankondo nadinye, Karunga gwaIsraeli! Ame kuna lidivi momeho ni ku kanderere ekanderero eli, morwa wa yi horwera nge nayinye eyi, yiyo wa tantera nge asi, ngo ninka ruvharo rwange ru kare ohompa.
28“Ano Hompa Mupangeli, ove nyove Karunga, ano nonkango doge dosili, ove yiyo ono tumbwidire muntu goge eyi yininke yoyiwa. 29Tani ku hundire o tungike ruvharo rwange, asi ngava karerere ngorooro monkenda zoge. Ove Hompa Mupangeli, nyove wa yi tumbwidira eyi, ano etungiko lyoge ngali kara poruvharo rwange narunye.”
© Egwanekerobibeli Lyanamibia 1987, 2003
© Bible Society of Namibia 1987, 2003