2 Peturusa 2
2
Varongi woyimpempa
1Novaporofete woyimpempa nawo ngava horoka nare moVaisraeli, ano varongi woyimpempa ngava horoka nomokatji keni hena. Awo ngava reta mo marongo gomadona goyimpempa, ngava patane Hompa ogu ga va zowora, makura ngava likokere vene ezonauko lyahararasi. 2Wovanzi ngava kwama nonzira dawo donondona. Eyi ngava rugana, yiyo ngayi ninkisa vantu va uyungire Nzira zoUsili momudona. 3Edowo lyemona yilyo ngali va gwanesa yimaliva kweni pokumusansekera masanseko goyimpempa. Epanguro lyawo nare‐nare lya pwa kutokora, ano Muzonaguli gwawo kapi a kumauka.
4Karunga kapi ga lipakera vaengeli ava va zonene, nye kwa va zugumina konhi kwi memundema lyEzonauko lyanarunye. Omo yimo ava va nomene, awo moyipandeko, va ndindire Ezuva lyoMpanguro. 5Karunga kapi ga ruvire uzuni wanare, nye kwa retererere ruhanzo uzuni wovadinikarunga. Nowa gelike ga parwire, ogu nga udisa uhungami, navamwe vatano‐navavali. 6Karunga kwa tokwere yitata yaSodoma naGomora a yi pe usima. Ta yi hanagura nomundiro, a gave sihonena sokukorangedesa vadinikarunga ava ngava ka kara ko komeho oko. 7Age kwa yowerere Roto, muntu gomuhungami, ogu ngayi retere kukora yikara yoyidona yovadiniVeta. 8Muntu gomuhungami ogu nkenye ezuva nawo nga kara. Nga mono oku ta zuvhu omu yina kugenda, makura yirugana yawo yoyidona tayi koresa unene mutjima gwendi gomuhungami. 9Ano Hompa ga diva omu a yoworora vatjilikarunga momaheteko gawo, nomu a tulire ntere vadinikarunga Ezuva lyoMpanguro, 10unene vaava ava kwama yorutu momadowo gokunyata, va dine epangero lyaKarunga.
Varongi owo mapenda, awo valinenepeki. Kapi ava fumadeke vanankondo wouyerere wekeguru; awo kuvaswaura. 11Novaengeli si vaava, nampili ngomu va kara vanene va pitakana unene varongi ava woyimpempa mononkondo, kapi ava va vyuka va va swaure komeho zaHompa. 12Nye vantu ava kurugana ngwendi yikorama yomowiza, eyi va vharera asi va yi kwate va yi dipage. Nawo morwakuswaura yininke eyi va dira kudiva, ngava va zonagura po ngwendi yikorama yomowiza. 13Awo ngava gwana mfuto zondona zeyi va rugana yoyidona. Awo kwa hafera kukara moyipito eyi aga panga madowo gawo gorutu momutenya. Awo nomuga, awo nyata. Nsene vana kara none pokulya mombungakriste, nkenye apa awo kuhafera yikara yawo yoyimpempa. 14Kapi ava tara hena yapeke, awo woowo vakadi woruho velike ava tara; kuzona kapi ava ku kuta. Awo kukokera varupirankondo konontenda. Nomutjima dawo va di rongesa edowo lyemona. Awo kwa kara konhi zefingiliro lyaKarunga. 15Va zumba nzira zokuvyuka, za va zumbana nzira zawo; yiyo ava kwama nzira ezi ga gusa Barama zaBeworo, ogu ga here kugwanena yimaliva mokurugana udona, 16makura tava mu tugumukilire usima wendi. Yeeyi sindongili sa hana kuuyunga kwa uyungire ngwendi muntu, si kave ugova womuporofete.
17Vantu ava kwa fana ngwendi marunone gokupwira, ngwendi maremo aga azi rerura mpepo zemukundungu. Karunga ga va wapaikira endema lyawii‐wi. 18Moruho romarutu gawo, pokuuyunga kwawo nonkango doyinyami da hana mulyo, yipo ava kwatere ava vana kuhara kutunda moupagani. 19Awo kuvatumbwidira emanguruko, nye awo vene ko vapika vezonauko yeeyi ogu ya kwata yuma, mupika gwayo ga kara. 20Yeeyi vantu nsene va henduka nyata zouzuni zokureta nomfa mokudiva Hompa noMuzowoli gwetu Jesus Kristusa, makura zi va kwate hena, zi va diinine po, uhura wovantu owo ngau kara nye woudona kupitakana petameko. 21Ya va waperere ngano yokudira kudiva nzira zouhungami, kapisi kumwe neyi yokuzidiva, makura va zumbe hena sipango sokupongoka esi va va pere! 22Awo yiwo sina hamene sisewe, esi asi tanta asi, “Mbwa kurugwira poyirusi yazo,” hena asi, “Singuru esi vana kuhu, kuza hena si ka ligarumune metata.”
© Egwanekerobibeli Lyanamibia 1987, 2003
© Bible Society of Namibia 1987, 2003