1 Vatesaronika 4

Ukaro ou wa za Karunga komutjima

1Vakwetu, one kwa lironga kwetu youkaro wouwa wokuza Karunga komutjima, moomu tupu mwa kara. Ntaantani tatu mu korangedere mwaHompa Jesus, mu pitakane omu mwa kerera. 2Amesi mwa diva eyi ngatu mu pangerere medina lyaHompa Jesus. 3Ngesi yimo ga hara Karunga, mu pongoke oku tomu likerere koruhonda. 4One vagara, nkenye ogu a lize namukadendi ponkedi zepongoko zongwa zekuto, 5kapisi moyihora ngwendi vapagani, ava va dira kudiva Karunga. 6Oku hena walye omu zono vakweneni, ndi mu linyokome mondando momaruka. Ose nare twa gusa kuyimutantera nokumurondora sankondo‐nkondo, asi Hompa nga handukira ava ava lipuka ngesi. 7Karunga kapi ga tu zigidira tu kare mouhakuhuki, nani nye kwa tu zigidira tu kare moupongoki. 8Yipo nye, ogu a paya eyi, kapisi muntu a paya, Karunga a paya, ogu a mu pe Mpepo zendi zoKupongoka.

9Yokuhamena eharo lya hara mukweni a ku hare, kapi twa hepa kuyimutjangera. Karunga mwene ga mana kuyimurongesa yokulihara?-?hara. 10Yimo nye ngorooro mwa likara novakweneni navenye womoMakedoniya. Ose kuna kumuhundira, vakwetu, yangesi mu yi tware komeho. 11Kareni ngesi: litureni oku tomu lihuguvara momawoko ganyonevene, moomu twa mu pamperekedere. 12Ponkedi zangesi ntani ngomu gwana ekuto kovapagani. Makura ngano kapi ngomu hepa hena kuhuguvara vapeke va mu kwafe.

Ewizo lyaHompa

13Vakwetu, ose kwa mu harera kudiva yokuhamena ava va tu siga, mu dire kukara neguwo ngwendi vava va pira ehuguvaro. 14Ose twa pura asi Jesus kwa fire, yiyo ga vhumbuka hena. Yipo nye natu pulira asi Karunga nga reta kumwe naJesus ava va fa, awo va mu pura.

15Morwa eli yilyo eraka lyaHompa, yiyo tuna kumutantera: ose ava ngatu hupa po, ose simpe tu vanamwenyo pezuva eli nga wiza Hompa, ose kapi ngatu pitakana vafe. 16Apa ngazi zuvhika nzigo nezwi lyomuengeli gomunene nomuhagaro gorumbendo rwaKarunga, yipo nye nga wiza mwene Hompa, a tunde keguru. Ava va fira mepuro lyaKristusa, yiwo ngava lihova kuvhumbuka. 17Makura ntani ngava tu yambura kumwe nawo nose ava ngatu kara tu vanamwenyo posiruwo oso, tu simbagwire Hompa pomaremo keguru, tu gwanekere nendi. Makura ngatu ka kare narunye nendi. 18Yipo nye nomu likorangedesesa kononkango edi.

Currently Selected:

1 Vatesaronika 4: KWN

Highlight

Copy