Riwayat Rasul-Rasul Isa 26
26
Paul bela diri pang angkang Raja Agripa
1Teris beling mo Agripa lako Paul, "To ta kau yabeang isin umin bela dirimu."
Karing Paul angkat ima dadi tanda mulai ya bakarante, ta ling, 2"Raja Agripa ade mulia, kaji baruntung benar, apaling to ta kaji bauʼ bela diri kaji pang angkang sia kalis sarea ade yatudu ling tau-tau Yahudi lako kaji. 3Lebe-lebe ling sia tutu-tutu to kamiasa tau-tau Yahudi, ke apa ade pina taunan dadi basengkal ling. Ling luk nan kaji ngeneng lako sia mabau sia menong kaji kewa sabar.
4Sarea tau Yahudi ya to luk katelas kaji kalis masi kaji taruna, apaling kalis mula kaji telas pang tenga-tenga bangsa kaji pang Yerusalem. 5Kamo le taunan to kaji kewa balong, ke lamin taunan roa, taunan bauʼ dadi saksi luk kaji tutu-tutu telas kewa turit sarea pangajar tau Farisi, yanansi golongan tau-tau ade paling keras pati hukum agama Yahudi. 6Ke to ta kaji manang pang ta umin yatudu kalangan rea olo pangarap luk Alatala yasatunas jangi Diri, ade ka yabeang lako balo tolo kita. 7Jangi Alatala nan mo ade yaarap ling sadua olas suku bangsatu mabau yasatunas. Ling luk nan taunan sembayang lako Alatala kewa tutu-tutu petang ano. Raja Agripa, ling pangarap ade sama nan mo, kaji yatudu ling tau-tau Yahudi! 8Kakuda bua sia sarea tau Yahudi mikir luk mustahil Alatala satelas tau mate? 9Sabenar dunung kaji diri ka si kadu mikir luk kaji ta mesti tentang Isa tau Nazaret nan kewa keras. 10Luk nan ampo ka si kaji boat pang Yerusalem. Kasuda kaji tarima surat kawasa kalis imam-imam rea, peno tau nyadu ade kaji satama ko dalam bui, ke kaji setuju si muntu taunan yasamate. 11Pang dalam bale-bale ibada roa benar kaji hukum taunan, ke kaji sakekeʼ paksa mabau taunan man mo nyadu lako Isa. Ke kewa nafsu ade rea benar kaji lalo ko kota-kota lin umin sasakit taunan.
12"Kewa maksud nan si kaji lalo ko kota Damsyik kewa kawasa kalis imam-imam rea ke kalangan rea parinta taunan. 13Raja Agripa ade mulia, muntu kaji pang tenga ola pang tengari rea, embang-embang kaji gita caya kalis bao awan ade lebe mengas kalis mata ano. Caya nan yaliuk kaji ke tau-tau ade balangan barema ke kaji. 14Sarea kami teri ko tana, ke kaji menong seda ade beling lako kaji kenang basa Ibrani, 'Saul,#26:14 Saul yanansi singin Ibrani Paul. Saul, kakuda bua musasakit-Ku? Kau mara sampi ade teris-teris rangkewa lako tau baeng tatimu. Lamin teris-teris mukewa-Ku, ya mudapat kasusa bae umin dirimu diri.'
15Dadi kaji beling, 'Sai Sia, Tuan?'
Ke nyamung Junjungan, 'Aku ta Isa ade ka musasakit nan. 16To, koat ke manang mo! Kusangita diri-Ku lako kau mabau Kusanadimu tau ade enti boat umin Aku. Mesti musarungan lako tau lin apa ade ka mugita ano ta luk Aku ke luk apa ade ya Kusangita lako kau pang mudi. 17Ya Kusalamat kau kalis tau-tau Yahudi ke kalis tau-tau ade siong tau Yahudi. Ke ya Kuutusmu lako taunan, 18umin samelik mata taunan, mabau taunan lis kalis ungkap ke tama ko mengas, mabau taunan kalepas kalis kawasa Iblis ke ada pang dalam kawasa Alatala. Dadi, ola panyadu taunan lako Aku, dosa taunan ya ampin, ke taunan ya dadi anggota umat Alatala ade ka yapili ling Diri."
Paul sajelas luk boat nya sanapat Rungan Balong
19"Ling luk nan, Raja Agripa ade mulia, nongka kadu no kaji taat lako apa ade kamo kaji gita dalam pangita kalis Alatala nan. 20Mula-mula kaji samada luk nan lako tau-tau pang kota Damsyik, teris lako tau-tau pang kota Yerusalem, ke tau-tau pang sasir propinsi Yudea, ke lako tau-tau ade siong tau Yahudi ampo. Kaji sanapat luk taunan mesti tobat kalis dosa-dosa, datang ke nyadu lako Alatala, ke yasangita ola katelas taunan diri luk taunan kamo tobat kalis sarea dosa-dosa. 21Kalangan rea ade kaji sanapat nan, tau-tau Yahudi bau kaji pang Balaʼ Alatala ke yasakeke samate kaji. 22Konang kalangan rea panulung Alatala, kaji bauʼ telas jangka ano ta ke manang pang ta umin sarungan lako sarea tau, ode rea. Apa ade kaji sanapat ta nongka lin ke ade kamo yasanapat ling Nabi Musa ke nabi-nabi saman dunung ampo. 23Kaji sanapat luk Raja Basalamat Ade Yajangiʼ Ling Alatala mesti menderita.#26:23 menderita: Tau-tau Yahudi yaarap Raja Basalamat Ade Yajangiʼ Ling Alatala dadi Raja paling rea pang bao dunia. Taunan no nyadu luk Raja ade paling rea nan mesti menderita ke yasamate, manaling Kitab Suci kamo yasanapat luk Diri mesti yalangan sarea denan (Kitab Zabur 22 ke Kitab Yesaya 53:3-11). Nan sala sopo alasan kakuda kasakit benar umin taunan nyadu luk Isa tutu-tutu Raja Basalamat Ade Yajangiʼ Ling Alatala. Ke Diri dadi tau ade mula telas kalis kamate, mabau Diri sarungan mengas lako tau-tau Yahudi ke lako tau-tau ade siong tau Yahudi."
Paul yaajak Raja Agripa umin dadi tau turit Isa
24Muntu Paul bakarante umin bela diri, beling mo Festus kenang seda ade keras, "Gila kau nan Paul! Pangetomu ade peno nan pina kau gila!"
25Konang nyamung Paul, "Gubernur Festus ade mulia, nongka kaji gila. Pangkeling ade kaji sanapat nan tutu-tutu ke lis kalis pamikir kaji ade sehat. 26Raja Agripa kamo to ade kaji sanapat nan, nan bua kaji baraning bakarante kewa ruris rora pang angkang Raja ade kaji hormat. Kaji sadu luk nonda sanompo luk ade nopoka yamenong ling diri, apaling sarea luk nan nongka dadi pang katokal ade kasio. 27Raja Agripa ade kaji hormat, sia nyadu ke lako apa ade kamo yasanapat ling nabi-nabi? Kaji pikir pasti sia nyadu!"
28Teris Raja Agripa beling lako Paul, "Ba musampina mubau sanadiku tau Kristen pang waya ade sangara ta ke?"
29Nyamung Paul, "Kaji eneng doa lako Alatala, mabau le lema, siong sia bae konang sarea tau ade menong pangkeling kaji ano ta dadi sama mara kaji, nyadu lako Isa. Konang no kaji roa sia sarea dadi tau ade yatahan ke rante besi mara kaji ta."
30Teris koat mo raja, gubernur Festus ke Bernike, ke sarea tau ade tokal barema ke taunan. 31Muntu taunan lis, taunan bakarante sakatan nya, ta ling, "Tau ta nongka boat apa-apa ade pantas umin yahukum mate atawa yabui."
32Karing beling mo Raja Agripa lako Festus, "Tau nan sabenar bauʼ mo tusabebas aji nya nongka eneng yaadili ling Raja Roma#26:32 Raja Roma: Pang saman nan sarea wilaya nan yajaja ling Raja Roma, dadi Raja Roma ta lebe tingi kalis Raja Agripa ke Gubernur Festus.."
©️2025 The Seed Company