زبُور 7
7
فصلِ هفتُم
دُعا بَلدِه اِجرای عدالت
اِی سرُود ره داوُود بخاطرِ کوشِ بِنیامِینی بَلدِه خُداوند خاند.
1اَی خُداوند، خُدای مه، دَز تُو پناه میرُم؛
مَره از دِستِ تمامِ کسای که دَ دُمبال مه اَسته خلاص کُو و مَره نِجات بِدی.
2نَشُنه که رقمِ شیر مَره پاره کده تِکه-و-پرچه کُنه
و هیچ کس ام نَبَشه که نِجات بِدیه.
3اَی خُداوند، خُدای مه، اگه ما اینی کارا ره کدیم:
اگه از دِست مه بےاِنصافی سر زَده،
4اگه دَ حقِ کسی که قد مه دَ صُلح-و-صفا بُوده بَدی کدیم،
یا دُشمون خُو ره بِدُونِ دَلِیل غارَت کدیم،
5بیل که دُشمو مَره دُمبال کده گِرِفتار کُنه
و زِندگی مَره دَ بَلِه زمی پایمال کُنه
و شان-و-شَوکت مَره دَ خاک بِزَنه. سِلاه.
6اَی خُداوند، قد قار خُو باله شُو
و خود ره دَ مُقابِلِ خَشمِ دُشمَنای مه بِلند کُو.
بَلدِه مه وَرخَی، تُو که قضاوَت ره حُکم کدے.
7بیل که جمعیَتِ قَوم ها دَ گِرد تُو جَم شُنه
و تُو دَ بَلِه ازوا دَ جای بِلند قرار بِگِیر.
8خُداوند قَوم ها ره قضاوَت مُونه.
اَی خُداوند، مُطابِقِ عدالت مه
و مُطابِقِ بےعَیبی مه دَ داد مه بِرَس.
9 اَی خُدای عادِل که فِکر ها و دِل های مردُم ره آزمایش مُونی،
بیل که شرارَتِ شرِیرو از بَین بوره
و آدمِ عادِل اُستوار شُنه.
10خُدا مِثلِ سِپر مُحافِظ مه اَسته،
امُو که آدمِ دِل-راست ره نِجات مِیدیه.
11خُدا قاضی عادِل اَسته،
خُدای که قار شی ھر روز دَ ضِدِ بَدکارا باله مُوشه.
12اگه آدمِ شرِیر توبه نَکنه،
خُدا دَ ضِدِ ازُو شمشیر خُو ره تیز مُونه
و کمون خُو ره خَم دَده آماده مُوکُنه.
13اُو سَلاح ھای کُشِندِه خُو ره آماده کده
تِیر های آتِشی خُو ره تَیار میله.
14اونه، آدم شرِیر دَ کَورِه شی شرارَت جای گِرِفته
قد ظُلم شِکامتُو شُده
و حِیله-و-مَکر مِیزَیه.
15اُو چاه کنده اُو ره غَوُج مُونه،
و دَ چاهی که کنده، خود شی موفته.
16ظُلمِ ازُو دَ سرِ خود شی مییه
و بےرَحمی شی دَ بَلِه تولغِه ازُو نازِل مُوشه.
17ما خُداوند ره بخاطرِ عدالت شی شُکر-و-سِپاس مُوگُم
و بَلدِه سِتایشِ نامِ خُداوندِ مُتعال سرُود میخانُم.
Currently Selected:
زبُور 7: HAZ
Highlight
Share
Compare
Copy
Want to have your highlights saved across all your devices? Sign up or sign in
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 UBS. Used by permission. All rights reserved.
