زبُور 51

دُعا بَلدِه بخشِشِ گُناه ها

بَلدِه سردِستِه خانِنده ها. زبُورِ داوُود. از وختِیکه ناتانِ نَبی دَ پیش داوُود رفت، بخاطری که داوُود قد بَتشِبَع خاو کدُد.

1اَی خُدا دَ مُطابِقِ لُطف-و-مِهربانی خُو دَزمه رَحم کُو!

دَ مُطابِقِ رَحمتِ بےپایان خُو گُناه ھای مَره پاک کُو.

2مَره از خطای مه کامِلاً شُشتوشوی بِدی

و مَره از گُناهِ مه پاک کُو!

3چُون ما از خطاهای خُو باخبر اَستُم

و گُناهِ مه ھر غَیت دَ پیشِ نظر مه اَسته.

4ما دَ ضِدِ ازتُو، تنها دَ ضِدِ ازتُو گُناه کدیم

و چِیزی ره که دَ نظرِ ازتُو بَد اَسته، انجام دَدیم.

پس تُو دَ حُکم خُو بَرحق اَستی

و دَ قضاوَت خُو بےعَیب.

5واقعاً که ما گُناهکار تَوَلُد شُدیم،

و گُناهکار بُودیم از غَیتِیکه آبِه مه مَره دَ کَورِه خُو پَیدا کد.

6اینه، تُو راستی دِل ره میخاهی

و دَ باطِن مه مَره حِکمت یاد مِیدی.

7 پس مَره قد علفِ زوفا صاف کُو تا پاک شُنُم،#لاویا ۱۴‏:۱‏-۷.

مَره شُشتوشوی بِدی و ما از بَرف کده سفیدتَر مُوشُم.

8بیل که آوازِ خوشی و خوشحالی ره بِشنَوُم؛

استُغونای ره که مَیده کدے، بیل که کَلو خوشحالی کُنه.

9گُناه ھای مَره دَ پیشِ رُوی خُو نَگِیر

و پگِ خطاھای مَره پاک کُو.

10اَی خُدا، دِلِ پاک دَ وجُود مه خَلق کُو

و قد روحِ مُستَحکم باطِن مَره تازه کُو.

11مَره از حُضُور خُو دُور پورته نَکُو

و روح اُلقُدس خُو ره از مه نَگِیر.

12خوشی نِجات خُو ره دَز مه پس بِدی؛

مَره اُستوار نِگاه کُو و روحی بِدی که اِطاعَت کنُم.

13اوخته ما راه-و-طرِیق تُو ره بَلدِه خطاکارا تعلِیم مِیدُم

و گُناهکارا پس سُونِ ازتُو دَور مُوخوره.

14اَی خُدا، مَره از جُرمِ خُونِ ریختَنده شُده خلاصی بِدی،

اَی خُدای نِجات مه؛

تا زِبون مه دَ بارِه عدالت تُو دَ آوازِ بِلند سرُود بِخانه.

15یا مَولا، لَبای مَره واز کُو

تا دان مه سِتایشِ ازتُو ره بَیان کُنه.

16تُو دَ قُربانی دِلچسپی نَدَری، اگه مِیدَشتی، میوُردُم؛

تُو دَ وسِیلِه قُربانی سوختَنی خوش نَمُوشی.

17قُربانی قابِلِ پِسَندِ خُدا، روحِ شِکسته یَه؛

اَی خُدا، تُو دِلِ مَیده و توبه-کار ره خار-و-حقِیر حِساب نَمُونی.

18بخاطرِ خوشی خُو دَ حقِ صَهیون اِحسان کُو؛

دیوال ھای اورُشَلیم ره آباد کُو.

19اوخته تُو از قُربانی های مُناسِب خوش مُوشی؛

از قُربانی های که کامِلاً سوختَنده مُوشه،

اَرے، از نَرگاو های که دَ بَلِه قُربانگاهِ تُو تقدِیم مُوشه.

Currently Selected:

زبُور 51: HAZ

Highlight

Copy

Compare

Want to have your highlights saved across all your devices? Sign up or sign in

Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:

Scripture taken from Hazaragi Bible.

Learn More About Hazaragi Bible