زبُور 25
25
فصلِ ببِیست و پنجُم
دُعا بَلدِه هِدایَت و حِفاظَت
زبُورِ داوُود.
1اَی خُداوند، جان خُو ره دَزتُو مِیسپارُم.
2اَی خُدای مه، ما دَزتُو تَوَکُل مُونُم؛
نَیل که شرمِنده شُنُم؛
نَیل که دُشمنای مه دَ بَلِه مه خود ره کٹه کٹه کُنه.
3 اَرے، هر کسی که اُمِید شی دَزتُو یَه، نَیل که شرمِنده شُنه؛
بیل که کسای شرمِنده شُنه که بےدلِیل خیانَت مُونه.
4اَی خُداوند، راه های خُو ره دَزمه بُفامَن
و طرِیق های خُو ره دَزمه تعلِیم بِدی.
5مَره هِدایت کُو تا مُطابِقِ حقِیقت تُو رفتار کنُم و دَزمه تعلِیم بِدی،
چراکه تُو خُدای نِجات مه اَستی؛
اُمِید مه تمامِ روز دَزتُو یَه.
6اَی خُداوند، رَحمت و مُحَبَت خُو ره دَ یاد خُو بَیر،
چراکه اُونا از اَزَل بُوده.
7گُناه ھای جوانی و خطاهای مَره دَ یاد خُو نَیرُو.
مُطابِقِ رَحمت خُو مَره دَ یاد خُو بَیر،
بخاطرِ خُوبی خُو، اَی خُداوند.
8خُداوند نیک و عادِل اَسته؛
امزی خاطر اُو گُناهکارا ره دَ راهِ راست هِدایت مُونه.
9اُو آدمای فروتن ره سُون عدالت-و-اِنصاف راهنُمایی مُونه
و راه-و-طرِیق خُو ره دَزوا تعلِیم مِیدیه.
10پگِ راه ھای خُداوند رَحمت و حق اَسته
بَلدِه کسای که عهد و احکامِ ازُو ره نِگاه مُونه.
11اَی خُداوند، بخاطرِ نام خُو گُناهِ مَره بُبَخش،
چراکه گُناهِ مه کٹه یَه!
12کِی از خُداوند ترس دَره؟
خُداوند راهی ره دَزُو تعلِیم مِیدیه که اُو باید اِختیار کُنه.
13جانِ امزُو آدم آسُوده مُوشه،
و نسل شی وارِثِ زمی مُوشه.
14رازِ خُداوند پیشِ کسای اَسته که از شی ترس دَره
و اُو عھد خُو ره بَلدِه ازوا معلُومدار مُونه.
15چِیمای مه همیشه سُون خُداوند اَسته،
چُون اُو پایای مَره از دام خلاص مُوکُنه.
16سُون ازمه نظر کُو و دَ حق مه رحِیم بَش،
چُون بےکس و مُصِیبت زَده اَستُم.
17پریشانی های دِل مه کَلو شُده؛
مَره از سختی های مه خلاص کُو.
18دَ مُصِیبت و رَنج مه نظر کُو
و تمامِ گُناه های مَره بُبَخش.
19توخ کُو که دُشمنای مه چِیقَس کَلو یَه
و اُونا قد نَفرَتِ بےاندازه از مه بَد مُوبره.
20جان مَره حِفظ کُو و مَره خلاصی بِدی؛
نَیل که شرمِنده شُنُم،
چراکه ما دَزتُو پناه اَوُردیم.
21بیل که صداقت و راستی، از مه حِفاظَت کُنه،
چراکه اُمِید مه دَزتُو یَه.
22خُدایا، اِسرائیل ره از پگِ مُشکِلات شی خلاصی بِدی.
Currently Selected:
زبُور 25: HAZ
Highlight
Share
Compare
Copy
Want to have your highlights saved across all your devices? Sign up or sign in
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 UBS. Used by permission. All rights reserved.
