زبُور 22
22
فصلِ بِیست و دوّم
سرُودِ غَم و پیروزی
بَلدِه سردِستِه خانِنده ها. دَ صَوتِ «آهُو بَرِه صُبح»#۲۲:۰ عِبارَتِ «آهُو بَرِه صُبح» دَ زِبونِ عِبرانی واضِح نِییه. خانده شُنه. زبُورِ داوُود.
1اَی خُدای مه، اَی خُدای مه، چرا مَره ایله کدے؟
چرا از نِجات دَدون مه
و از توره های پُرناله-و-فِغان مه خود ره دُور گِرِفتے؟
2اَی خُدای مه، ما دَ غَیتِ روز ناله-و-فریاد مُونُم، ولے تُو جواب نَمِیدی؛
دَ غَیتِ شاو ام مِینالُم و آرامی نَدرُم.
3ولے تُو مُقَدَّس اَستی،
اَی خُدای که دَ تَخت شِشتے
و بَنی اِسرائیل تُو ره حمد-و-ثنا مُوگیه.
4بابهکَلونای مو دَزتُو تَوَکُل کد؛
اُونا تَوَکُل کد و تُو اُونا ره خلاصی دَدی.
5اُونا پیشِ ازتُو ناله-و-فریاد کد و نِجات پَیدا کد.
اُونا دَزتُو تَوَکُل کد و شرمِنده نَشُد.
6ولے ما یگ کِرم اَستُم، نَه اِنسان.
ما رِیشخندِ آدما اَستُم و دَ وسِیلِه مردُم تحقِیر-و-تَوهِین مُوشُم.
7ھرکسی که مَره مِینگره، دَ بَلِه مه رِیشخَندی مُونه.
اُونا لب خُو ره تُرد مُونه و سر خُو ره شور دَده مُوگیه:
8”دَ خُداوند تَوَکُل کُو!
بیل که خُداوند اُو ره خلاصی بِدیه.
بیل که اُو ره نِجات بِدیه، اگه از شی خوش-و-راضی اَسته.“
9 اَی خُداوند، تُو بُودی که مَره از کَورِه آبِه مه بُرو اَوُردی
و غَیتِیکه دَ شِیرِ آبِه خُو بُودُم، دَزمه اِطمِینان دَدی.
10ما از رَحمِ آبِه خُو دَزتُو تعلُق دَشتُم
و از کَورِه آبِه مه، تُو خُدای مه اَستی.
11از مه دُور نَبَش،
چراکه مُشکِلات-و-سختی نزدِیک اَسته
و هیچ یار-و-مَدَدگار نِییه.
12نَرگاو های کَلو دَور مَره گِرِفته،
نَرگاو های زورتُوی باشان مَره محاصِره کده.
13اُونا دان های خُو ره دَ بَلِه مه کٹه واز کده
مِثلِ شیرای دَرِنده و غُران.
14ما مِثلِ آو اَلّی لَوُو شُدیم
و پگِ استُغونای مه بَند بَند جدا شُده.
دِل مه رقمِ مُوم دَ مَنِه جِسم مه آو شُده.
15قُوَت مه از دِست رفته و رقمِ کوزِه گِلی خُشک شُده
و زِبون مه دَ کام مه چسپِیده.
تُو مَره دَ خاکِ مَرگ شَندے،
16چُون سَگا دَور مَره گِرِفته؛
یگ ڈلِ شرِیر-و-بَدکار مَره محاصِره کده؛
دِستا و پایای مَره سُلاخ کده.#۲۲:۱۶ دَ جای «سُلاخ کده» دَ بعضی نُسخه ها «رقمِ شیر» نوِشته یَه.
17ما مِیتنُم که پگِ استُغونای خُو ره حِساب کنُم.
اُونا توخ مُونه و چِیم خُو ره دَزمه دوخته.
18اُونا کالای مَره مَنِه خُو تقسِیم کده
و دَ بَلِه لِباس مه پِشک اَندخته.
19مگم تُو، اَی خُداوند، از مه دُور نَبَش!
اَی قُوَت مه، بَلدِه کومَک مه عَجَله کُو!
20جان مَره از دَمِ شمشیر خلاص کُو
و زِندگی#۲۲:۲۰ دَ جای «زِندگی» دَ زِبونِ عِبرانی «یگانه» نوِشته یَه. مَره از چنگِ سَگا.
21مَره از دانِ شیرا نِجات بِدی
و از شاخای گاوای وَحشی؛
دُعای مَره قبُول کُو!
22ما نام تُو ره دَ بِرارون خُو اِعلان مُونُم
و دَ مینکلِ جماعت تُو، تُو ره سِتایش مُونُم.
23اَی کسای که از خُداوند مِیترسِید، اُو ره حمد-و-ثنا بُگِید؛
اَی تمامِ نسلِ یعقُوب، اُو ره بُزُرگی-و-جلال اِعلان کنِید؛
اَی تمامِ نسلِ اِسرائیل، ازُو ترس دَشته بَشِید.
24چُون اُو مُصِیبتِ آدمِ مُصِیبت زَده ره خار و حقِیر حِساب نَکده
و رُوی خُو ره ازُو دَور نَدَده،
بَلکِه وختی دَ پیشِ ازُو ناله-و-فریاد کد اُو گوش گِرِفت.
25حمد-و-ثنای که دَ مینکلِ جماعتِ کٹه مُوگیُم، از طرفِ ازتُو مییه.
ما نَذر های خُو ره دَ حُضُورِ کسای اَدا مُونُم که از تُو#۲۲:۲۵ دَ جای «از تُو» دَ زِبونِ عِبرانی «ازُو» نوِشته یَه. ترس دَره.
26آدمای غرِیب نان خورده سیر مُوشه؛
کسای که دَ طلبِ خُداوند اَسته اُو ره سِتایش مُونه؛
دِل های شُمو تا اَبَد زِنده باد!
27تمامِ گوشه های زمی کارای خُداوند ره دَ یاد خُو میره
و سُون خُداوند تاو مُوخوره
و تمامِ طایفه های مِلَّت ها دَ حُضُورِ ازُو#۲۲:۲۷ دَ جای «ازُو» دَ زِبونِ عِبرانی «ازتُو» نوِشته یَه. پرستِش مُونه،
28چراکه پادشاهی دَ خُداوند تعلُق دَره
و اُو دَ بَلِه مِلَّت ها حُکمرانی مُونه.
29پگِ دَولتمَندای زمی که از ناز-و-نِعمت برخوردار اَسته ام اُو ره سَجده مُونه،
تمامِ کسای که دَ تَی خاک موره دَ حُضُورِ ازُو زانُو مِیزَنه؛
هیچ کس نَمِیتنه که جان خُو ره زِنده نِگاه کنه.
30نسلِ نَو دَزُو خِدمت مُونه؛
و دَ نسل های آینده دَ بارِه خُداوند خبر مِیدیه.
31اُونا مییه و بَلدِه قَومی که دَ آینده تَوَلُد مُوشه عدالتِ خُداوند ره اِعلان مُونه
و مُوگیه که اُو امی کار ره کده.
Currently Selected:
زبُور 22: HAZ
Highlight
Share
Compare
Copy
Want to have your highlights saved across all your devices? Sign up or sign in
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 UBS. Used by permission. All rights reserved.
