ضَرب اُلمَثَل_ها 26
26
فصلِ بِیست و شَشُم
1امُو رقمِیکه بَرف بارِیدو دَ تایستو و بارِش دَ فصلِ دِرَو خُوب نِییه،
پس اِحترام کدو دَ آدمِ بےعقل ام سَم نَمییه.
2امُو رقم که مُرغَک دَ وختِ پَرواز کدو بالَک مِیزَنه
و غُچی#۲۶:۲ غُچی یعنی قَرقُلاج. دَ وختِ پَر زَدو دَ جای نَمِیشِینه،
امُو رقم نالَتِ بےدلِیل ام دَ سرِ کس نَمِیشِینه و تاثِیر نَدره.
3قَمچی بَلدِه اَسپ، نُخته بَلدِه خَر
و اَدَب چوب بَلدِه پُشتِ آدمای بےعقل اَسته.
4دَ سَوالِ آدمِ بےعقل جوابِ بےعقلی نَدی،
نَشُنه که تُو ام رقمِ ازُو وَری شُنی.
5آدمِ بےعقل ره دَ مُطابِقِ بےعقلی شی جواب بِدی،
تاکه اُو خود خُو ره دانا حِساب نَکُنه.
6کسی که پَیغام ره دَ دِستِ آدمِ بےعقل رَیی مُونه،
اُو رقمِ امزُو کسی اَسته که پای خُو ره مُنٹی کده
یا یگ پیله زهر ره وُچی کده بَشه.
7مَثَلِ که از دانِ آدمِ بےعقل بُر مُوشه،
رقمِ پای های شَل وَری سُست-و-بےحَرکت اَسته.
8اِحترام کدو دَ آدمِ بےعقل،
مِثلِ سنگ ایشتو دَ پَلَخمو یَه.
9مَثَلِ که از دانِ آدمِ بےعقل بُر مُوشه
رقمِ خاری اَسته که دَ دِستِ آدمِ نِشه گور موره،
یعنی بےتاثِیر اَسته.
10کسی که آدمِ بےعقل یا آدمِ راهرَو#۲۶:۱۰ آدمِ راهرَو یعنی مُسافِر که نابَلَد اَسته. ره دَ وظِیفه مُقرَر مُونه
رقم میرگَنِ بےتجربه وَری اَسته که تِیر شی هر کس ره اَوگار مُونه.
11امُو رقم که سَگ دَ بَلِه قَی کَدَگی خُو پس مییه،
آدمِ بےعقل ام بےعقلی خُو ره تِکرار مُونه.
12امُو آدم ره مِینگری که دَ نظرِ خود خُو دانا اَسته؟
نِسبَت دَ امزُو نفر بَلدِه آدمِ بےعقل اُمِید کَلوتر اَسته.
13آدمِ ٹمبل مُوگه: ”دَ راه شیر اَسته!
شیر دَ کُوچه ها و بازار میگَرده!“
14درگه دَ سرِ لَخَک خُو دَور مُوخوره،
و ٹمبل دَ بَلِه جاگِه خُو.
15آدمِ ٹمبل دِست خُو ره دَ کاسه دِراز مُونه؛
مگم از بَس که کَلو سُسته، اُو ره پس دَ دان خُو بُرده نَمِیتنه.
16آدمِ ٹمبل دَ نظر خُو هُوشیارتَر
از هفت نفرِ اَسته که جوابِ عاقِلانه مِیدیه.
17آدم که دَ یَگو دعوا مُداخِله کُنه که مربُوط دَ خود شی نَبَشه،
رقمِ شخصی اَسته که از گوشای کُٹه گِرِفته کش مُونه.
18آدمِ دیونه که تِیرهای آتِشی
و کُشتَنی ره ایله مُونه،
19مِثلِ امزُو آدم اَسته که همسایِه خُو ره بازی مِیدیه
و بعد ازُو مُوگه: ”ما خُو شوخی کدُم!“
20از نَبُودونِ خاشه آتِش گُل مُوشه،
از نَبُودونِ آدمِ بَدگوی جنجال خلاص مُوشه.
21رقمی که زُغال بَلدِه قوغ و خاشه بَلدِه آتِش اَسته،
امُو رقم آدمِ فِتنهگَر بَلدِه جنگ-و-جنجاله.
22توره های آدمِ شَیطو رقمِ لُغمه های خوراکِ مَزهدار اَسته
که قُورت مُوشه و دَ وجُودِ اِنسان مُومَنه.
23رقمی که طوس، رُوی دُرُشتِ ظرفِ گِلی ره لَخشُم مُونه،
امُو رقم لبای لَخشُم ام بَدی های دِل ره تاشه مُونه.
24آدمِ بَد، نفرَت-و-کِینِه خُو ره قد لبای خُو پوش مُونه،
دَ حالِیکه دِل شی پُر از فِریب-و-چال اَسته.
25هر چند که تورِه ازُو نَرم-و-چرب بَشه، دَزُو باوَر نَکُو،
چراکه دَ دِل شی هفت چِیزِ نفرَت اَنگیز وجُود دَره.
26هر قدر که نَفرَتِ ازُو قد حِیله-و-نَیرَنگ تاشه شُنه،
باز ام بَدی شی دَ پیشِ مردُم معلُومدار مُوشه.
27کسی که دَ دِیگا چاه بِکَنه، خود شی دَمزُو چاه موفته
و کسی که سُونِ دِیگه کس سنگ لول مِیدیه، امُو سنگ پس دَور خورده دَ خود شی مُوخوره.
28دروغ گُفتو دَ حقِیقت نفرَت کدو از مردُم اَسته
و نتِیجِه چاپلُوسی خرابی اَسته.
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 United Bible Societies Association and Pamir Ministries. Used by permission. All rights reserved.