ضَرب اُلمَثَل_ها 2
2
فصلِ دوّم
1باچِه مه، اگه تورای مَره قبُول کُنی
و دستُورای مَره محکم بِگِیری،
2اگه دَ حِکمت گوش بِدی
و دِل تُو سُون بِینایی بَشه،
3اگه دانایی ره طلب کُنی
و آواز خُو ره بَلدِه بِینایی بِلند کُنی،
4و اگه حِکمت ره مِثلِ نُقره ڈُنڈَل#۲:۴ «ڈُنڈَل کدو» یعنی پالِیدو. کُنی
و مِثلِ یگ خزانِه تاشه شُده بِطَلبی،
5اُو غَیت معنای «ترسِ خُداوند» ره مُوفامی،
و شِناختِ خُدا ره حاصِل مُوکُنی،
6چراکه خُداوند حِکمت ره عطا مُونه،
و از دانِ ازُو عِلم و دانِش بُر مُوشه.
7اُو پیروزی ره بَلدِه آدمای صادِق نِگاه مُونه
و بَلدِه کسای که دَ راهِ راست رَیی یَه، اُو یگ سِپر اَسته،
8تاکه راهِ اِنصاف-و-عدالت نِگاه شُنه.
اُو از رَوِشِ مومنِین خُو حِمایت مُونه.
9پس دَمزی رقم تُو مُوفامی که عدالت، اِنصاف و صداقت چی اَسته
و هر راهِ راست-و-خُوب ره دَرک کده مِیتنی.
10چُون حِکمت دَ دِل تُو داخِل مُوشه
و دانِش جان تُو ره پُر از خوشی مُونه.
11بِینایی از تُو مُحافِظَت مُونه
و دانایی تُو ره حِفظ کده
12از راهِ بَد نِجات مِیدیه
و از آدمی که تورای خراب مُوگیه، تُو ره دُور نِگاه مُوکُنه،
13یعنی ازُو آدمای که راهِ راست ره ایله کده
و دَ راه های ترِیکی گُناه رَیی اَسته.
14اُو رقم آدما از کارای بَد لِذَت مُوبَره
و از تورای بَد خوش شی مییه.
15راه های امزُو کسا کَج اَسته
و اُونا طرِیق های دُرُست ره ایله کده.
16حِکمت تُو ره از خاتُونِ زِناکار
و از تورای نَرم-و-چرب خاتُونِ بیگَنه نِجات مِیدیه.
17اِی رقم خاتُو شُوی خُو ره که دَ وختِ جوانی گِرِفتُد، ایله مُونه
و قَولِ پاک ره که دَ غَیتِ توی کدو دَ حُضُورِ خُدا دَدُد، پُرمُشت مُونه.
18خانِه ازُو گِردآوِ مَرگ اَسته،
چُون راه های امزُو خاتُو سُون دُنیای مُرده ها موره.
19کسای که پیشِ ازُو موره هیچ کُدَم شی پس نَمییه
و اُونا دَ راهِ حَیات نَمِیرَسه.
20پس دَ راهِ آدمای نیک قَدَم بیل
و دَ راهِ آدمای دُرُستکار ثابِت بُمَن.
21چُون آدمای راستکار پایِه شی دَ زمی محکم اَسته،
و مردُمِ پاک-و-بےعَیب دَ جای خُو باقی مُومَنه.
22مگم بَدکارا از رُوی زمی نابُود مُوشه
و رِیشِه آدمای چالباز از زمی کَنده مُوشه.
Currently Selected:
ضَرب اُلمَثَل_ها 2: HAZ
Highlight
Copy
Compare
Share
Want to have your highlights saved across all your devices? Sign up or sign in
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 United Bible Societies Association and Pamir Ministries. Used by permission. All rights reserved.