متیٰ 2

فصلِ دوّم

سِتاره-شِناسا عیسیٰ ره مُوپاله

1بعد از تَوَلُدِ عیسیٰ دَ بَیت-لَحَمِ یهُودیه، دَ زمانِ هیرودیس پادشاه، چند سِتاره-شِناس از سرزمِینای مشرِق دَ شارِ اورُشَلیم اَمَد 2و پُرسان کده گُفت: ”کُجا یَه امُو نَوزَیده شُده که پادشاهِ یهُودیا اَسته؟ چُون مو سِتارِه شی ره دَ سرزمِینای مشرِق دِیدی و اَمَدے که اُو ره پرَستِش کُنی.“ 3وختِیکه هیرودیس پادشاه اِی توره ره شِنید، اُو و پگِ مردُمِ اورُشَلیم قد ازُو وَرخطا شُد 4و اُو تمامِ پیشوایونِ عالی مقام و عالِمای دِین ره از قَومِ اِسرائیل جم کد و از وا پُرسان کد که مسیح دَ کُجا باید تَوَلُد شُنه. 5اُونا دَزُو گُفت: ”دَ بَیت-لَحَمِ یهُودیه؛ چُون دَ وسِیلِه پَیغمبر اینی رقم نوِشته شُده:

6’و تُو، اَی بَیت-لَحَم، دَ سرزمِینِ یهُودیه

دَ مینکلِ حُکمرانای یهُودا از هیچ نِگاه کمتَر نِیَستی،

چراکه از تُو یگ حُکمران ظهُور مُونه

که قَوم مه اِسرائیل ره رهبری#۲‏:۶ دَ جای «رهبری» دَ زِبونِ یونانی «چوپونی» نوِشته یَه. مُوکُنه.‘“

7اوخته هیرودیس، سِتاره-شِناسا ره تاشَکی کُوی کد و دَ بارِه وختِ ظهُورِ سِتاره، ازوا تحقِیق کد. 8بعد ازُو اُونا ره دَ بَیت-لَحَم رَیی کده گُفت: ”بورِید و امُو نِلغه ره خُوب اوگَل کُنِید؛ غَیتِیکه اُو ره پَیدا کدِید دَز مه خبر بِدِید تا ما ام بییُم و اُو ره پرستِش کنُم.“ 9بعد از شِنِیدونِ تورِه پادشاه، سِتاره-شِناسا دَ راهِ خُو رَیی شُد و سِتارِه ره که اُونا دَ مشرِق هُوش کدُد پیش پیشِ ازوا مورَفت تا دَ بَلِه سر امزُو جای رسِیده ایسته شُد که نِلغه دَ اُونجی بُود. 10وختِیکه اُونا سِتاره ره دِید، اُونا قد خوشی کَلو خوشحالی کد. 11امی که اُونا دَ داخِلِ خانه رفت و نِلغه ره قد آبِه شی مریَم دِید، رُوی دَ خاک اُفتَده امُو نِلغه ره پرستِش کد و صندُوقای خزانِه خُو ره واز کده سَوغات ها، یعنی طِلّا، کُندُر و مُر#۲‏:۱۱ «کُندُر و مُر» مَوادهای خوشبُوی از شِلِیمِ دِرخت اَسته. دَزُو تقدِیم کد. 12و ازی که دَ خاو دَزوا اَخطار دَده شُد که دُوباره پیشِ هیرودیس نَرَوه، اُونا از راهِ دِیگه پس سُون وطن خُو رفت.

دُوتا کدو دَ مِصر

13بعد از رفتونِ سِتاره-شِناسا، ملایکِه خُداوند دَ خاو دَ یوسُف ظاهِر شُده گُفت: ”باله شُو، نِلغه و آبِه شی ره گِرِفته دَ مِصر دُوتا کُو و دَ امُونجی بِشی تا غَیتِیکه تُو ره خبر بِدُم، چراکه هیرودیس دَ زُودی نِلغه ره مُوپاله تا اُو ره نابُود کُنه.“ 14اوخته یوسُف باله شُد و نِلغه و آبِه شی ره گِرِفته دَ وختِ شاو سُون مِصر رَیی شُد 15و تا مرگِ هیرودیس دَ امُونجی مَند. دَ امزی رقم تورِه که خُداوند دَ وسِیلِه پَیغمبر گُفته بُود پُوره شُد:

”باچِه خُو ره از مِصر کُوی کدُم.“

16وختی هیرودیس دِید که سِتاره-شِناسا اُو ره بازی دَده، اُو کَلو قار شُد و نفرا ره رَیی کد و تمامِ بچکِیچا ره دَ بَیت-لَحَم و اطراف شی که دُو ساله و کمتَر از دُو ساله بُود دَ قتل رَسَند، مُطابِق دَ زمانی که اُو از سِتاره-شِناسا تحقِیق کدُد. 17اوخته توره های که دَ وسِیلِه اِرمیا پَیغمبر گُفته شُدُد، پُوره شُد:

18”یگ آواز دَ رامه شِنِیده شُد،

آوازِ مَخته-و-چخرا و ماتمِ کٹه،

راحیل#۲‏:۱۸ مردُمِ بَیت اُللَحَم و اطراف شی اَولادِه راحیل و یعقُوب بُود. بَلدِه بچکِیچای خُو چخرا مُونه و آرام نَمُوشه،

چراکه اُونا دِیگه وجُود نَدره.“

پس اَمَدو دَ وطن

19پس از مرگِ هیرودیس، ملایکِه خُداوند دَ مِصر دَ خاو دَ یوسُف ظاهِر شُده 20گُفت: ”باله شُو، باچه و آبِه شی ره گِرِفته پس دَ سرزمِینِ اِسرائیل بورُو، چُون کسای که قَصدِ جانِ نِلغه ره کدُد، مُرده.“ 21اوخته یوسُف باله شُده باچه و آبِه شی ره گِرِفت و پس دَ سرزمِینِ اِسرائیل رفت.

22مگم وختی شِنِید که آرخِلاوس دَ جای آتِه خُو هیرودیس دَ بَلِه یهُودیه حُکمرانی مُونه، اُو از رفتو دَ اُونجی ترس خورد و بعد ازُو که دَ خاو دَزُو اَخطار دَده شُد، اُو دَ منطقِه جلِیلیه رفت 23و دَ اُونجی رسِیده دَ یگ شار دَ نامِ ناصِره جای-دَ-جای شُد. دَمزی رقم تورِه که دَ وسِیلِه پَیغمبرا گُفته شُدُد ”اُو ناصِری گُفته مُوشه،“ پُوره شُد.

Currently Selected:

متیٰ 2: HAZ

Highlight

Copy

Compare

Want to have your highlights saved across all your devices? Sign up or sign in

Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:

Scripture taken from Hazaragi Bible.

Learn More About Hazaragi Bible