دوّمِ تِسالونِیکیا 3
3
فصلِ سِوّم
درخاستِ دُعا
1آخِرِکار، اَی بِرارو، دَ حقِ ازمو دُعا کُنِید که کلامِ مَولا دَ تیزی پَخش شُنه و دَ پیشِ مردُمِ دِیگه ام اِحترام پَیدا کنه، امُو رقم که شُمو ام اُو ره دَ اِحترام قبُول کدِید. 2دُعا کُنِید که مو از چنگِ آدمای فاسِد و بَدکار خلاص شُنی، چراکه پگِ مردُم ایماندار نِییه. 3لیکِن مَولای مو وفادار اَسته؛ اُو شُمو ره قَوی مُونه و دَ مُقابِلِ شرِیر-و-بَدکار از شُمو مُحافِظَت مُونه. 4وختِیکه دَ بارِه شُمو فِکر مُونی، مو دَ مَولا عیسیٰ اِطمِینان دَری که هر دستُوری که دَز شُمو بِدی، شُمو اُو ره ام آلی و ام دَ آینده پُوره مُونِید. 5مَولا عیسیٰ دِل های شُمو ره یاری کُنه تا مُحَبَتِ خُدا و صبرِ مسیح ره خُوبتَر پَی بُبرِید.
پرهیز از ٹمبلی
6اَی بِرارو، مو دَ نامِ مَولای مو عیسیٰ مسیح دَز شُمو اینی حُکم ره مِیدی: از هر بِرارِ مسیحی که ٹمبلی مُونه و دَ مُطابِقِ تعلِیم-و-رَوایاتی که از مو یاد گِرِفته عمل نَمُوکُنه، دُوری کُنِید. 7چُون خودون شُمو مِیدَنِید که چِطور باید از مو سرمَشق بِگِیرِید. مو دَ مینکلِ شُمو ٹمبلی نَکدی 8و نانِ مُفت ره از هیچ کس نَخوردی، بَلکِه شاو و روز دَ زَحمت و مُشَقَت کار مُوکدی تاکه بارِ دوشِ یَگون شُمو نَشُنی. 9اُوطور نِییه که دَ بَلِه شُمو حق نَدَشتی، لیکِن خودون مو میخاستی که بَلدِه شُمو یگ اُلگُو بَشی تاکه از مو سرمَشق بِگِیرِید. 10و حتیٰ دَمزُو وخت که قد شُمو بُودی، اینی حُکم ره دَز شُمو دَده بُودی: ”هر کسی که نَمیخایه کار کُنه، اُو حقِ نان خوردو ره ام نَدره.“ 11چُون مِیشنَوُم که یَگون شُمو ٹمبل اَستِید و هیچ کار نَمُونِید، بَلکِه ایله‌گوی اَستِید.#۳:۱۱ «ایله‌گوی» یعنی «دَ کارِ دِیگرو چنگَک اَندختو.» 12دَ امزی رقم آدما دَ نامِ مَولا عیسیٰ مسیح حُکم مِیدُم و اُونا ره نصِیحَت مُونُم که دَ آرامی کار کده نان خُو ره بُخوره. 13و شُمو، اَی بِرارو، از نیکی کدو مَنده-و-دِلزَده نَشُنِید. 14اگه یَگو کس از گُفتِه مو که دَمزی خط نوِشته کدی نَمُوشه، اوخته اُو ره نشانی کنِید و هُوش کنِید که قد ازُو رفت-و-اَمَد نَکنِید، تاکه اُو از رفتار خُو شرمِنده شُنه. 15لیکِن اُو ره دُشمون خُو حِساب نَکُنِید، بَلکِه اُو ره مِثلِ یگ بِرارِ ایماندار سرزَنِش کُنِید.
16دَ آخِر، سروَرِ سلامَتی دَز شُمو هر زمان و دَ هر حالت صُلح-و-سلامَتی بِدیه. مَولا قد پگ شُمو بَشه. 17ما پولُس، امی دُعا-و-سلام ره قد دِستِ خود خُو نوِشته کدیم. دَ تمامِ نامه های مه اینَمی نشانی مه یَه که ما امی رقم نوِشته مُونُم: 18فَیضِ مَولای مو عیسیٰ مسیح نصِیبِ پگ شُمو شُنه. آمین.
Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:
Scripture taken from Hazaragi Bible.
Copyright © 2025 United Bible Societies Association and Pamir Ministries. Used by permission. All rights reserved.