اوّلِ قُرِنتیا 16

فصلِ شوزدَهُم

جم کدونِ کومَک بَلدِه ایماندارای ضرُورتمَند

1آلی دَ بارِه جم کدونِ کومَک بَلدِه مُقَدَّسِین: امُو رقم که دَ جماعت های ایماندارای غلاتیه هِدایَت دَدُم، شُمو ام امُو رقم کُنِید. 2دَ روزِ اوّلِ هر هفته،#۱۶‏:۲ یعنی دَ روزِ یگ شَمبِه. هر کُدَم شُمو یگ هدیه دَ مُطابِقِ عاید خُو جدا کده پس-انداز کُنِید تا دَ وختِ اَمَدون مه دَ پَیسه جم کدو ضرُورَت نَشُنه. 3و غَیتِیکه ما بِرَسُم، کسای ره که شُمو تایِید کُنِید، قد خط ها رَیی مُونُم تا هدیِه شُمو ره دَ اورُشَلیم بُبره. 4و اگه صَلاح شُد که ما ام بورُم، اوخته اُونا قد ازمه یگجای موره.

نقشِه پولُس بَلدِه سَفرِ آینده

5وختِیکه از ولایتِ مَقدونیه تیر شُدُم، دَ پیشِ ازشُمو مییُم؛ چُون قَصد دَرُم که از مَقدونیه تیر شُنُم 6و اِمکان دَره که قد شُمو بُمنُم و حتیٰ زِمِستو ره دَ اُونجی تیر کنُم تا شُمو مَره دَ هر جایی که بورُم کومَک کده رَیی کُنِید. 7اِم دفعه نَمیخایُم که شُمو ره دَ سرِ راه بِنگرُم، چُون اُمِیدوار اَستُم که یگ مُدَت ره قد شُمو بُمنُم اگه مَولا اِجازه بِدیه. 8مگم تا وختِ «عِیدِ روزِ پِنجاهُم» دَ اِفِسُس مُومنُم، 9چراکه یگ درگِه کٹه و تاثِیرگُذار بَلدِه خِدمت مه واز شُده، ولے مُخالِفا ام کَلو اَسته.

10اگه تِیموتائوس دَ پیش شُمو مییه، توخ کُنِید که دَ مینکل شُمو بِدُونِ ترس بُود-و-باش کُنه، چُون اُو ام دَ کارِ مَولا مَشغُول اَسته، امُو رقم که ما اَستُم. 11پس هیچ کس اُو ره خار-و-حقِیر حِساب نَکُنه. اُو ره دَ صُلح-و-سلامَتی سُون راهِ شی رَیی کُنِید تا پیشِ ازمه بییه، چُون ما قد دِیگه بِرارو چِیم دَ راهِ ازُو اَستُم.#۱۶‏:۱۱ یا ما چِیم دَ راهِ ازُو و دِیگه بِرارو اَستُم. 12دَ بارِه بِرار مو اَپولُس، ما اُو ره کَلو تشوِیق کدُم که قد دِیگه بِرارو دَ پیش شُمو بییه، لیکِن هیچ راضی نَشُد که دَ امزی زمان بییه؛ مگم وختِیکه فرصت پَیدا کُنه، اُو مییه.

13هُوشیار بَشِید، دَ ایمان خُو قایم-و-اُستوار بُمنِید، قَوی و مردِ جان خُو بَشِید. 14بیلِید که تمامِ کارای شُمو قد مُحَبَت قَتی بَشه.

15اَی بِرارو، شُمو مِیدَنِید که خانَوارِ اِستیفان اوّلِین کسای بُود که از ولایتِ اَخَیا#۱۶‏:۱۵ مُلکِ یونان یگ وخت دَ دُو منطقه تقسِیم بُود: «مَقدونیه» و «اَخَیا.» ایمان اَوُرد و خودون ره بَلدِه خِدمتِ مُقَدَّسِین وَقف کد. پس از شُمو خاهِش مُونُم 16که شُمو امزی رقم مردُما اِطاعَت کُنِید و ام از هر کسی که قد ازوا کار و زَحمت مُونه. 17از اَمَدونِ اِستیفان و فورتُوناتُس و اَخَئِیکاس خوش شُدُم، چراکه کمبُودی شُمو ره اُونا پُوره کد؛ 18چُون اُونا روحِ ازمه و ازشُمو ره تازه کد. پس امی رقم آدما ره بِنَخشِید.

سلام های آخِری

19جماعت های ایماندارای ولایتِ آسیا،#۱۶‏:۱۹ بَلدِه معلُومات دَ بارِه آسیا دَ فهرِستِ لُغات رُجوع کُنِید. دَز شُمو سلام مِیرسَنه؛ اَکِیلا و پرِسکِلا#۱۶‏:۱۹ دَ زِبونِ یونانی «پرِسکا» نوِشته یَه که اِختِصارِ «پرِسکِلا» اَسته. قد جماعتِ ایماندارای که دَ خانِه ازوا اَسته، ام بَلدِه شُمو دَ نامِ مَولا سلام های گرم رَیی مُونه. 20تمامِ بِرارو دَز شُمو سلام رَیی مُونه. یگدِیگِه خُو ره قد رُوی ماخی مُقَدَّسانه سلام بُگِید.

21ما پولُس امی دُعا-و-سلام ره قد دِستِ خود خُو نوِشته کدیم. 22اگه کُدَم کس مَولا عیسیٰ ره دوست نَدره، دَزُو نالَت باد. «یا مَولا، بیه!» 23فَیضِ مَولا عیسیٰ نصِیب شُمو شُنه. 24مُحَبَت مه دَ وسِیلِه مسیح عیسیٰ نصِیبِ پگ شُمو شُنه. [آمین.]#۱۶‏:۲۴ «آمین» دَ بعضی نُسخه ها نوِشته نِییه.

Currently Selected:

اوّلِ قُرِنتیا 16: HAZ

Highlight

Copy

Compare

Want to have your highlights saved across all your devices? Sign up or sign in

Text of this book may be quoted in any form (written, visual, electronic or audio) up to and inclusive of five hundred (500) verses without express written permission of the publisher, provided the verses quoted do not amount to a complete book of the Bible nor do the verses quoted account for 25% of the total text of the work in which they are quoted. Notice of copyright must appear on the copyright page of the work as follows:

Scripture taken from Hazaragi Bible.

Learn More About Hazaragi Bible