Rom 12
12
Nakahra te ngaguza God
1Eume kheragura, eigna God te kokhonighita lui gne, rei toreghamu mala lisa lao ghotolu nakahramire jateula kahe faafara eu ka God. Kahe faafara te kahra ni blahi mala kelitagnaza God. Igne tufuni puhi te mala tufru soruza ghotolu God ie. 2Tovi lisa laoghamu thaimi mala leghuza puhi di'a te au ka nauthoglu igne, ni lisa laoghamu thaimi ka God mala hoho'i magne nakahramire, kate gu'ari magne gaoghatho valu ka ghotolu. Ka puhi igne, ghotolu kaina tangomana te kofu falaseza hna te ngaguza God ie, kate eira koba ghotolu puhi te keli ni kohlo, ni puhi te kelitagna ra teu God re.
3Eigna u noa kokofakasa teke gumei God ie, rei te lepoza ka ghotolu te hui, tovi fahaehagheghamu lui thaimi. Ni ghathoghamu thaimi ka puhi te gizami ghotolu te leghuza nomi fatutu'ani teke gu'ari harighamu God ie. 4Tati te hui ie, au kahe thono lana ni au chuku hnimotogna, euwateuwe sopa hnimoto teure, au nodi soasopa nafnata gloku te mala eira re. 5Jateula teuwae eu tati, meubame chuku nanoni, tati jateula kahe thono eulana, eigna tati te hui ie fatutu'aniza Kraes. Ka puhi teugne, tati te hui mei kaheni baludi keha nanonire ka kahe thono. 6Tati te hui ie God neke gumei soasopa kokofakasai, leghuza noa nahma magne harighita ie. Jame atha tati u kokofakasa te mala thuturiza goeghozegna God jateula mae profet teuwe, tati thuturiza goeghozegna God ie leghuza noda fatutu'ani ie, neubane bi'o ba ichoni tati noda fatutu'ani re. 7Jame atha tati u kokofakasa te mala toghora nanonire, tati mala toghora nanonire. Jame atha tati u kokofakasa te mala fagriu ie, tati mala fagriu. 8Jame atha tati u kokofakasa te mala fakeli gnagnafadi nanonire, tati mala eiza teuwae. Euwateuwe, jame atha tati u kokofakasa te mala toghora nanonire ka gobigna nafnata puhi ie, tati mala eiza teuwae ka puhi te keli. Jame atha tati u kokofakasa te mala batura nanonire, tati mala koukofu fakelira nanonire. Euwateuwe, jame atha tati u kokofakasa te mala kokhonira ni keli harira teu nanonire, tati mala eiza teuwae balu hneahnegha.
9Kate nahmara ghotolu nanonire, nahmara kate tufuni tutu'ani. Kofu uchuza hna te di'a ie, ni loku famaku ka gnagnafamire hna te keli ie. 10Farinahmai jateula tabusigna eu ka Kraes. Ghatho bohera keha tabusignami ka khilo'au re ke tulaomini thaimi. 11Tovi tho'a kate loku hariza God ie, ni kaliti fakelighamu thaimi mala au heta koba ka nomi fatutu'ani re. Uve, loku hariza Lod ka gnagnafami fate'o. 12Hneahnegha koba ka hna teke na'alepoza God ka ghotolu ie. Kate au paapara ie, au famuu, ni tarai koba. 13Tufa nodi nanoni khilo'au te the'o nodire. Ni kalitira ihei te posa mei ka sugamire.
14Ghotolu toreza God mala fablahira ihei te fapaaparaghamu re, ni tovi toreza God mala fapaapara ra. 15Ghotolu mala hneahnegha baludi ihei te hneahnegha re, ni tahngi baludi ihei te tahngi re. 16Ghotolu mala au faudu ka keliphari. Tovi fahaehaghe, ni fafaudu ka ihei te au faparira thaidire. Euwateuwe, tovi ne fua lalase hui thaimi euwa.
17Tovi ho'i fapulo hna nasapla teke ei harighamu ihei ie, ni eiza lana hna te keli ka nathadi nanoni te hui re. 18Athi hnetamire koba mala au ka keliphari baludi nanoni te hui re. 19Kheragura, tovi foli fapulo hna nasapla teke eiza nanonire tami ie, ni lisa lao ka God mala foli fapulora, jateula Lod te lepo ka i'ini te blahi ia, “Rei kaina foli fapulo ka ihei te tapla fasapla ni rei kaina ie fapaapara ra.”#12:19 Diutronomi 32:35.
20Euwateuwe, u i'ini te blahi ie eulanauwa lepo eu'ani,
“Ne rofo noa na nou mae naoka ie ni, fei gea.
Euwateuwe, ne roa ko'u na magne ni, fako'uza.
Te eiza ghoe igne ie, magne kaina fua maamaza noa lui malani ke hoho'i magne puhignare ka ghoe.”#12:20 Provebs 25:21,22.
21Tovi sakreza puhi te di'a ie mala tapla faparighamu, ni tapla fapariza puhi te di'a ie na euwa, kate eiza hna te keli ie.
© 2025 SIL Solomon Islands