Sam 7
7
Sam 7
Toreza noa keliphari God
Noa khoze ni tharai eu mae Devet gna puhi bi'o teke eiza mae Kus vikegna mae Benjemen hariza magne.
(Vese lao ka God)
1 LOD nogu God, rei mei mala polo nogu ka ghoe.
Fakahrighau, ni atha famaghanighau ka khamedi mae te hrubi tafirighau re.
2Me the'o ghoe ie, hatimare kaina jateula laeon eu mei palaghau rei tei ka hnimoto ahia te the'o kahe nanoni te mala toghoghau.
Ka hnimoto teuwae hatimare kaina saka reurekuza thonogu rei ie jateula pohe.
3 LOD nogu God, ne eiza na rei ki nasapla hariza ihei,
4ba, jame ei fadi'a la rei ki puhi hariza ki mae kheragu fafaudu,
ba fite atha la rei ki noa goifata mae nogu naoka ie.
5Teuwe, ghoe tangomana te sakrera nogu mae naokare hrubighau ni athighau,
tapla choghaghau ni ani falemeghau eu rei.
6 LOD, mei toghoghau.
Nogu mae naokare la fua di'atadi ka rei.
Mei mala kegra fotighau, di'atamura ni figri pogrura eu sonighoe.
Lepo faheta tadi ni fagriura mala au fakeli hatimare ka puhi te kohlo.
7Atha faudu meira nanonire tamu,
ni ghoe mala hokro ka nou sape noilaghi ie ni funei frunira hatimare fate'o.
8 LOD, ghoe lana te tangomana fatera nanoni te hui re.
Phile meighau, ghoe laseza te rei kohlo ka nathamu.
9God, ghoe lana te tufuni kohlo ie,
ghoe kofu falasera gaoghathomi gheati ni hna goifata fate'o te ngagughamira gheatire.
Fanotora puhi di'a te eira nanoni te di'are, ni toghora nanoni te kohlo re mala kegra maku.
(Vese lao ka mavitu)
10God ie nogu glave te mala barifotighau ie.
Ni eulanauwa fakahrira eu ihei te leghuza ie.
11God fate ra nanonire ka puhi te kohlo.
Ni ihei te eira puhi te di'are magne fapaapara ra fatheve.
12Meuni theome hoho'i hatimare puhidire meuwe,
God kaina zaha vigno eu noa naflahi mala magra ie, mala falemera hatimare.
Ni lohlo fapitu noa nabaghe ie mala kalera hatimare ka noa thuna ie.
13Magne kulu tarabanara hui noa goifata mala magra re.
Ni la kulu ghaghao hui noa thuna te au kha'aghi ka pha'udire.
14Kofiza ghotolu! Nanoni te di'a puhidire ghathoza lana te mala eiza puhi te di'a ie.
Hatimare rogheza mala eiza puhi te di'a ni mala phiapitara nanonire.
15U dengedeu te e'ei hatimare mala khale keha nanonire teuwe,
hatimare thaidi lana te khale tadire.
16Eume, puhi di'a te eira hatimare re ke pulo ka thaidi,
ni puhidi hatimare te di'a mala choghara keha nanonire, teke choghara thaidire.
17Rei kaina koze lepo fakeliza LOD mae te tufuni ulu ie.
Ni rei kaina lepo fakeliza magne, eigna magne ne fate leghuza puhi te tufuni kohlo ie.
Currently Selected:
Sam 7: ggaNTP
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Solomon Islands
