Sam 31
31
Sam 31
Noa tharai mae te farouronu ka God
Noa khoze mae Devet.
(Vese lao ka God)
1 LOD, rei mei ka ghoe mala koikofighau.
Tovi sakrera mae nogu naokare tapla sorughau.
Ghoe lana God te tufuni kohlo lui puhimu ie, rei tufuni toregho, fakahrighau.
2Rogighau ni fakahrighau gignoa igne.
Ghoe jateula kahe nogu thina maku mala polo rei.
3Tutu'ani lui, ghoe nogu thina maku mala polo rei.
Rei toregho, au ke ulugu mala batughau,
jateula teke na'alepoza ghoe.
4Tovi sakreghau mala khale rei ka dengedeu te kulu nana'a malagu rei teu hatimare re,
eigna ghoe nogu hnimoto mala polo rei mala theome deighau kahe hoholo.
5 LOD, rei tufuni lisa ari nakahragu ie ka khamemu.
Rei laseza te ghoe kaina fakahrighau rei, eigna ghoe God te leuleghu fata ie philera koba nou nanonire.
6Ghoe tufuni tho'anoura ihei te tufru sorura god te phiapita re,
ni rei farouronu nogu koba lana ka ghoe LOD.
7Rei kaina tufuni hneahnegha, eigna nou nahma ghoe ie tufuni bi'o.
Ghoe kofu falasera paapara te eira rei re,
ni ghoe eulanauwa, lasera hna te dufighau rei re.
8Ghoe theome sakrera nogu mae naoka rei re mala lokighau,
ni ghoe sakreza nasagla ie ka rei mala tei rei ka hnimoto ahia te ngagughau tei rei tagna ie.
9 LOD, kokhoni meighau, eigna gignoa igne rei la au ka puhi bi'o.
Rei tahngi la ghile hungu nathagure.
Thonogu ie la ghile glape soru, ni rei la fua di'agnagnafa.
10Rei la theome hneta, eigna rei la fua tahngi lui.
Nakahragu rei gne la hmone, eigna rei la fua paapara lui.
Nahnetagure la hui eigna nakhibogure, ni nahuligure la theome jongi fakeli.
11Nogu mae naoka, ni kheragu teu rei re la tho'anodighau, ni lepo fadi'aghau rei.
Mae te tufuni laseghau rei re fua hmau nodighau,
ni kate kofighau rei ka nabrau ie, hatimare pelo nodighau rei.
12Hatimare fate'o la kafua gatho iho nodighau, jateu tela leme hui la rei euwa.
Eume, rei gne jateula goifata te di'a tela tho'anodi hui nanonira eu lana.
13Rei la rogira hui nogu mae naoka tela buiburighau re.
Ni ka hnimoto ahia te tei rei ie, hatimare tufuni fahmauhmaughau lui rei.
Hatimare ei groghe harighau rei, groghe mala falemeghau rei.
14Ni LOD, rei farouronu nogu ka ghoe,
ghoe nogu God rei.
15Nakahragu rei ie ka khamemu ghoe lana.
Athi fajiflaghau ka khamedi nogu mae naoka te ngagura falemeghau re.
16Rei nou nanoni gloku ghoe, kofu meighau ni keli harighau.
Fakahrighau ka nou nahma te fua bi'o.
17 LOD, rei kilo arigho ghoe mala toghoghau.
Tovi sakrera nogu mae naokare famamazaghau.
Nanoni te di'a puhidire na jame te famamazara ghoe re,
hatimare gizadi te leme, euwateuwe fateira ka nodi nau mae te leme re.
18Hatimare tufuni fahaehaghe lui, ni lepo fapaipari ra nanoni te kohlo re.
Eume, fofoto naflodire mala theome lase phiapita hatimare.
19Ghoe eira koba gloku te keli te mala toghora ihei te ghatho bohegho re.
Ni koikofi fakelira ihei te fatutu'anigho ni toghora hatimare ke uludi nanonire.
20Ghoe phopolora nanoni teuware ka hnimoto te au thaimu ie, mala theome tangomana nanoni te di'a puhidire te choghara re.
Ghoe phopolora ka hnimoto te tufuni keli, mala theome tangomana mae naokare te lepo fadi'ara ni falemera teu hatimare re.
21 LOD, rei lepo fakeligho!
Kate mei falithughau nogu mae naokare, ghoe ne fatakleza te ghoe tufuni nahmaghau rei,
ne toghoghau rei.
22Rei ne tufuni hmau nogu lui, eigna rei gaoghathogu ie jaune na'i fajiflaghau hui lana ghoe ka thaimu neuwa.
Ni ghoe rogi meighau au lana rei kate kilo ari rei tamu ie.
(Vese lao ka mavitu)
23Ghotolu nanoni te fatutu'aniza LOD ra, nahmaza magne.
LOD gne, kaina koukofu fakelira nanoni te fatutu'ani re.
Ni magne kaina fapaapara ra nanoni te fahaehaghe re, leghura nakhibo teke eira hatimare re.
24Ghotolu nanoni te fatutu'anira, kegra heta,
ni au nomi rouronu ka LOD.
Currently Selected:
Sam 31: ggaNTP
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Solomon Islands
