Sam 30
30
Sam 30
Tarai lepo fakeli ke leghu te thatai leme
Noa khoze mae Devet mala koze kate faruma Suga Blahi hatimare ie.
(Vese lao ka God)
1 LOD, rei kaina tufuni lepo fakeligho, eigna ghoe neke fakahrighau rei,
ni ghoe theome sakrera mae nogu naokare mala hneahnegha ka glemegu rei ie.
2 LOD, nogu God, rei neke tahngi ari ka ghoe mala toghoghau,
ni ghoe neke fakeli fapuloghau.
3Ghoe neke fakahrighau,
ni theome sakreghau ka gleme.
(Vese lao ka mavitu)
4Kilo uluza LOD, ghotolu te ghatho boheza magne ra!
Ghotolu mala tufuni kilo uluza nahngagna te blahi.
5Magne di'atagna ka khata hnimoto hmo'eni lana,
ni puhigna te keli ie au fatheve the'o ka huigna.
Nanoni ie jame tahngi bongigna ie,
ni hneahnegha ie kaina ke mei boibongi fufugho.
(Vese lao ka God)
6Kate laseza te rei au fakeli ie, rei ne lepo eu'ani,
“Theome tangomana kahe goifata kaina te tapla faparighau rei ie.”
7 LOD, ghoe tufuni keli harighau lui rei,
ni koikofi fakelighau jateula kahe nogu bara thina maku te au falithughau.
Ni kate phopolo ghoe nathamu naflomure,
rei neke tufuni hmau nogu lui.
8 LOD, rei neke kilogho ghoe;
LOD, rei toregho mala toghoghau.
9Rei neke lepo eu'ani,
“LOD, jame leme rei ie, hna kaina te atha ghoe ie?
Jame tei rei ka nodi nau mae tela leme hui re, hna goifata kaina te toghoza ihei ie?
Mae te leme hui ie theome tangomana te lepo fakeligho ghoe ie!
Mae te leme hui ie theome tangomana te thuturiza kahe goifata te eira ghoe re.
10 LOD, rogi meighau ni kokhonighau.
LOD, togho meighau!”
11Gignoa igne, ghoe kela ho'i fapulora di'agnagnafa teke eira rei ra, kela ragi hneahnegha rei,
ghoe atha koko hui di'agnagnafa teke eira rei ra, ke famei hneahnegha ie tagu.
12Eigna teuwae, rei kaina theome au famuu gignoa igne.
Rei kaina kilo ulugho ka khoze.
LOD nogu God,
rei kaina lepo fakeligho tifa e tifa.
Currently Selected:
Sam 30: ggaNTP
Highlight
Copy
Compare
Share
Want to have your highlights saved across all your devices? Sign up or sign in
© 2025 SIL Solomon Islands
